Kwa Aefeso 3:1-21
3 Manje inepano Paulo, niri mudjeri ndawa niri kusaidi ya Yesu Khrisitu komasoti ndawa yothandiza imwepo wanthu wa makhaindi yanango—
2 shuwadi, mudabva kuti nidatambira udindo ukulu wokuthandizani kuti muphindule na kukoma ntima kukulu kwa Mulungu,
3 komasoti kuti adaniululira chintsintsi chopatulika mobverana na vomwe nidanemba mwachigwato m’mbuyo umu.
4 Ndipomwapa mukawerenga vinthu vimwivi mungakwanise kuzindikira kuti chintsintsi chopatulika chonena va Khrisitu ninkuchibvesa bwino.
5 M’mibadwo ya m’mbuyo, chintsintsi chimwichi chiribe kuululiwa kwa wana wa wanthu ninge momwe Mulungu wachiululira manjeuno kwa atumi na aneneri wake ochena kupitira mwa mzimu.
6 Chintsintsi chimwichi ni chakuti wanthu wa makhaindi yanango omwe ni obverana na Yesu Khrisitu adzatambire vinthu vomwe Khrisitu adzatambire ndipo adzakhale mbali ya thupi. Iwo adzatambire pomwe vinthu vomwe Mulungu watipolomisa ndawa ya ntontholo wabwino.
7 Nidakhala ntumiki wa vimwevi mobverana na mphaso ya fovolo ya kukoma ntima kukulu kwa Mulungu, yomwe nidapasiwa pomwe adanipasa mphanvu yake.
8 Kukoma ntima kukulu kumuku kudaperekewa kwa inepano munthu mng’ono pakunilinganiza na mng’ono maninge pa ochena wose. Nidapasiwa kukoma ntima kumuku kuti nilengeze kwa wanthu wa makhaindi yanango ntontholo wabwino wonena va chuma chiribe polekedzera cha Khrisitu,
9 komasoti kuti nithandize aliyese kuti awone momwe chintsintsi chopatulika mwicho chinkufambisiriwa. Kwa magole yazinji, Mulungu yemwe adalenga vinthu vose wakhala ankubisa chintsintsi chimwichi.
10 Vidakhala teno kuti kupitira mu mpingo, maboma na maulamuliro yomwe yali m’malo yakudzulu manje yadziwe mbali zosiyanasiyana za nzeru za Mulungu.
11 Vimwevi ni vobverana na cholinga chosapera chomwe iye adakhala nacho chofotokoza va Khrisitu, yemwe ni Yesu ambuya wathu.
12 Kupitira mwa iye, tinaufulu muyu woyankhula ndipo tikwanisa kufika kwa Mulungu mosashupa komasoti mosakaikira ndawa tikhulupirira Yesu.
13 Ndipomwapa nikukukumbirani kuti ayi kufoka ndawa ya mabvuto yomwe ninkugumana nayo ndawa ya imwepo, pakuti mabvuto yomwe inkugumana nayo aya yachitisa kuti mutambire ulemerero.
14 Ndipomwapa ninkugwada pamaso pa Ababa,
15 omwe achitisa kuti banja iriyose ikhale na dzina kudzulu na dziko yapasi.
16 Ninkukumbira kuti Mulungu yemwe anaulemerero ukulu akuchitiseni kuti umunthu wanu wankati ukhale wamphanvu pophatisa basa mphanvu yomwe mzimu wake upereka.
17 Ninkukumbira pomwe kuti mwachikhulupiriro chanu, m’mitima yanu mukhale Khrisitu na chikondi. Muzike mizu komasoti mukhale okhazikika pa fundasau,
18 kuti imwepo pabodzi na ochena wose mukwanise kubvesa bwino mfupimfupi, ntalintali, kutalimpha na kunoka kwa chonadi,
19 komasoti kuti mudziwe chikondi cha Khrisitu chomwe chiposha kudziwa vinthu kuti mudzadziwe na makhalidwe yose yomwe Mulungu apereka.
20 Manje kwa iye yemwe angakwanise kuchita vikulu maninge kuposha vomwe tikumbira panango kuganiza mobverana na mphanvu yake yomwe inkuphata basa mwa isepano,
21 kwa iye kukhale ulemerero kupitira mwa mpingo komasoti kupitira mwa Khrisitu Yesu, kumibadwo yose mpakana kalekale. Ame.
