Kwa Aefeso 4:1-32
4 Ndipomwapa inepano, yemwe niri mudjeri ndawa ya Ambuya, ninkukugwigwirirani kuti mumbachite vinthu mobverana na kuchemera komwe adakuchemerani.
2 Nthawe zose mumbachite vinthu modzichepesa,* mopfatsa, modekha komasoti kupirirana ndawa ya chikondi.
3 Mumbayesese na ntima wose kusunga mbverano womwe tiugumana mothandiziwa na mzimu uchena, pakukhala mwa ntendere womwe uli ninge chomangira chomwe chitibveranisa.
4 Panathupi ibodzi na mzimu ubodzi, mobverana na chidikhiro chibodzi chomwe adakuchemererani.
5 Pali pomwe Ambuya m’bodzi, chikhulupiriro chibodzi, ubatizo ubodzi,
6 na Mulungu m’bodzi yemwe ni Ababa pomwe wa wanthu wose. Iye ni nkulu kuposha aliyese, achita vinthu pakuphatisira basa isepano tose ndipo mphanvu yake iphata basa kwa wose.
7 Manje aliyese wa isepano apasiwe kukoma ntima kukulu mobverana na momwe Khrisitu adamupimira mphaso yafovolo mweyi.
8 Ndawa Malemba yanena kuti: “Padakwira pamalo yapadzulu, adatenga wanthu omwe enze ku ukapolo ndipo adapereka amuna kuti akhale mphaso.”
9 Manje ko mawu yakuti “padakwira” yatanthauza chani? Yatanthauza kuti pakuyamba wenze adabuluka pasi, kutanthauza padziko yapasi.
10 Muyo yemwe adabuluka pasi ndiye m’bodzibodzi uyo yemwe adakwira nkukakhala padzulu maninge kuposha kudzulu kose, kuti vinthu vose vikwanirisiwe.
11 Ndipo pa mphaso zomwe adapereka, anango adawapereka kuti akhale atumi, anango aneneri, anango alaliki* ndipo anango anyakabusa na apfunzisi,
12 na cholinga chakuti athandize* wochena mwawo, kuti ambafambe munjira yabwino, kuti ambaphate basa yotumikira anango komasoti kuti amange mpingo womwe uli ninge thupi ya Khrisitu,
13 mpakana tose tidzakhale wobverana pa vomwe tikhulupirira komasoti pakumudziwa bwinobwino Mwana wa Mulungu. Vikadzateno, tidzakhale wanthu achikulire, omwe afika pa nsinkhu wa munthu nkulu ninge momwe Khrisitu wenzere.
14 Ndipomwapa osati tikhale pomwe wana. Osati timbatengeketengeke ninge kuti tinkugwinyiwa na mabimbi ndipo osati timbatengeke nkumbayenda uku na uku na mphepo iriyose ya vinthu viribe chilungamo vomwe wanthu apfunzisa pakupeka mabodza mochenjera.
15 Koma timbayankhule vazedi na kuwonesa chikondi. Tikateno tidzakhale wachikulire mu vinthu vose ndipo tidzakwanise kuchita vinthu mobverana na Khrisitu, yemwe ni msolo.
16 Tiri ninge thupi, ndipo ndawa ya iye, vidzo vose va thupi mweyi ni volumatidzana bwino ndipo vithandiza thupi mwiyo kuti imbaphate bwino basa. Chidzo chirichose cha thupi mweyi chikambaphata bwino basa yake, thupi mweyi ikula bwino ndipo tidzapitirize kukondana.
17 Ndipomwapa ninkunena komasoti kuchitira umboni mwa Ambuya, kuti ayi kuti mupitirize kufamba ninge momwe wanthu wa makhaindi yanango afambira, pakutewedza maganizo yawo yalibe na basa.
18 Iwo ali mu mdima wa maganizo ndipo ali kutali na moyo womwe uchokera kwa Mulungu, ndawa ya ubulutu wawo komasoti ndawa ya kuuma kwa mitima yawo.
19 Pakuti iwo akwanisalini pomwe kuzindikira makhalidwe yabwino, adadzipereka wokha ku khalidwe yochitisa manyazi kuti achite vonyantsa vakhaindi iriyose mwadyera.
20 Koma imwepo mulibe kupfunzira kuti Khrisitu ali teno.
21 Yesu ambapfunzisa chonadi, mwakuti peno mudabva vomwe angapfunzisa komasoti peno mudapfunzisiwa na iye, ndiye kuti vinthu vimwevo mukuvidziwa bwino.
22 Mupfunzisiwa kuti muvule umunthu wakalekale womwe ubverana na makhalidwe yanu yakalekale, womwe unkuipisiwa pomwe ndawa ya vilakolako voyipa va umunthu muyo.
23 Ndipo mupitirize kuchinja kuti mukhale anyowani pa kaganizidwe kanu komasoti momwe muwonera vinthu.
24 Ndipo muvale umunthu unyowani womwe udalengewa mobverana na vomwe Mulungu afuna. Mukachita vimwevi mudzakwanise kuchita vomwe viridi volungama na vokhulupirika.
25 Ndipomwapa, pakuti manje mwaleka kuchita vinthu viribe chilungamo, aliyese wa imwepo ambayankhule chaivo kwa munzake, ndawa ndise vidzo volumatidzana.
26 Peno mwakalipa, ayi kuti muchimwe. Dzuwa osati ichome mudakali wokalipa.
27 Ayi kumupasa mpata Ndyerekezi.
28 Munthu yemwe ni mbava aleke kuba, koma ambaphate basa mwakhama. Ambaphate basa yabwino na manja yake kuti ambakwanise kugumana vinthu vomwe angakwanise kugawana na munthu alibe kanthu.
29 Mawu yowola ayi kuti yambabule pakamwa panu, koma pambabule mawu yabwino yokhayokha kuti yalimbikise anango nakuti yathandize wanthu omwe ankuyabvesera.
30 Komasoti, ayi kumbakwinyiririsa mzimu uchena wa Mulungu, womwe Mulungu muyo adauphatisa basa pakukuyikhani chidindo kuti mudzamasuliwe na malipiro pantsiku ya chipulumuso.
31 Kuzondana maninge, kuwawiwa ntima, ukali, kupopota, mawu yopweteka komasoti vinthu vose voipa vichosewe mwa imwepo.
32 Koma mumbakomerane ntima, mumbawonesane chifundo chikulu komasoti mumbakhululukirane na moyo wose, ninge momwe imwembo Mulungu adakukhululukirani na moyo wose kupitira mwa Khrisitu.
Mawu ya m’nyantsi
^ Panango kuti: “na maganizo yodzichepesa.”
^ Panango kuti: “olalikira ntontholo wabwino.”
^ Panango kuti: “apfunzise.”
