Kwa Aefeso 5:1-33
5 Ndipomwapa mumbatewedzere Mulungu, ninge wana wake wapamoyo,
2 ndipo pitirizani kuwonesa chikondi ninge momwe Khrisitu adatikondera* nkudzipereka yekha ndawa ya isepano* ninge chopereka komasoti ninge ntsembe yapfungo yabwino kwa Mulungu.
3 Nkhani za chigololo* komasoti chonyantsa cha khaindi iriyose panango umbombo ayi kuti vitomolewe pagulu yanu, ndawa wanthu wochena afunikalini kuchita vimwevi.
4 Ayi kutomola olo nkhani zofotokoza khalidwe yochitisa manyazi, nkhani zopusa panango nthabwala zotukwana ndawa ni vinthulini vabwino. Koma mumbatembeje Mulungu.
5 Ndawa nkhani mweyi mukuidziwa ndipo mukuibvesa bwino, kuti munthu wachigololo,* wopsyipiziwa panango wa umbombo,* womwe ni kutumikira mafano, adzangenelini mu Ufumu wa Khrisitu na wa Mulungu.
6 Munthu osati akusokonezeni na mawu yalibe na basa, ndawa ukali wa Mulungu udzafike pa wanthu osabvera omwe ankuchita vinthu vomwe natomola ivi.
7 Ndipomwapa ayi kumbachita vomwe iwo achita.
8 Ndawa pakuyamba mwenze ninge mdima, koma manjeuno muli ninge kugwerewera pakuti ndimwe obverana na Ambuya. Pitirizani kufamba ninge wana wa kugwerewera.
9 Ndawa vipaso va kugwerewera ni chirichose chabwino, chirichose cholungama na chaicho.
10 Nthawe zose mumbatsimikizire kuti chobvumizika kwa Ambuya nchiponi.
11 Ndipo musiye kuchita nawo basa zosaphindulisa za mumdima. Koma mumbawonese pachena kuti ni vinthu voipa.
12 Ndawa vinthu vomwe iwo achita mwachintsintsi ni vochitisa manyazi olo kuvitomola.
13 Manje vinthu vomwe vinkuululiwa viwonekera pachena ndawa ya kugwerewera, pakuti chirichose chomwe chawonekera chikhala kugwerewera.
14 Ndipomwapa pali mawu yakuti: “Muka wogona iwe! Muka kwa akufa ndipo Khrisitu adzagwerewere kwa iwepo.”
15 Ndipomwapa samalani maninge kuti mukambafamba, ayi kuti mumbafambe ninge wanthu alibe nzeru, koma ninge wanthu wanzeru.
16 Mumbaphatise basa bwino nthawe* yanu ndawa ntsiku zimwezi ni zoipa.
17 Ndipomwapa lekani kuchita vinthu ninge wanthu alibe nzeru, koma pitirizani kuzindikira vomwe Yahova* afuna.
18 Ndipo ayi kumbaledzera na vinyu, ndawa kuledzera kungachitise kuti muchite vinthu voipa maninge,* koma pitirizani kudzadziwa na mzimu.
19 Mumbayimbire pabodzi masalimo, nyimbo zotamanda Mulungu na nyimbo zauzimu. Mumbayimbe nyimbo zotamanda Yahova* m’mitima yanu.
20 Nthawe zose mumbatembeje Mulungu, Ababa wathu, pa vinthu vose mudzina ya Ambuya wathu Yesu Khrisitu.
21 Aliyese ambabvere munzake ndawa yolemekeza Khrisitu.
22 Akazi ambabvere amuna wawo ninge momwe achitira pakubvera Ambuya,
23 ndawa mwamuna ni msolo wa nkazi wake ninge momwe viriri na Khrisitu yemwe ni msolo wa mpingo, pakuti iye ni wopulumusa thupi mweyi.
24 Ndipo ninge momwe viriri kuti mpingo ubvera Khrisitu, akazimbo ambabvere amuna wawo pa chirichose.
25 Imwepo amuna, pitirizani kukonda akazi wanu ninge momwe Khrisitu adakondera mpingo nkudzipereka yekha ndawa ya mpingo muyo,
26 na cholinga chakuti auchenese pakuusambika m’madzi ya mawu ya Mulungu.
27 Adachita vimwevi kuti iye atambire mpingo muyo uli wokhuza komasoti waulemerero, ulibe makwinya panango kuthunduwira* panango chirichose chatene, koma kuti ukhale wochena na ulibe chilema.
28 Molingana na vimwevi, amuna ambakonde akazi wawo ninge momwe akondera mathupi yawo. Mwamuna yemwe akonda nkazi wake adzikonda yekha,
29 ndawa palibe munthu yemwe adazondako kale thupi yake. Koma aidyesa na kuikonda ninge momwe Khrisitu achitira na mpingo
30 ndawa ndise vidzo va thupi yake.
31 “Ndipomwapa mwamuna adzasiye ababa wake na amayi wake nkukhala na nkazi wake ndipo awiri mwawo adzakhale thupi ibodzi.”
32 Chintsintsi chopatulika chimwechi ni chikulu. Manje ninkuyankhula va Khrisitu na mpingo.
33 Koma aliyese wa imwepo ambakonde nkazi wake ninge momwe adzikondera yekha komasoti nkazi ambalemekeze maninge mwamuna wake.
Mawu ya m’nyantsi
^ Vingachitike kuti adanena kuti “adakukonderani.”
^ Vingachitike kuti adanena kuti “imwepo.”
^ Mu Chigiriki ni porneía.
^ Onani matanthauzo ya mawu yanango pa mbali yakuti: “uhule.”
^ Panango kuti: “womana.”
^ Mawu yake chaiyo ni yakuti: “mumbagule nthawe.”
^ Onani vakumapeto A5.
^ Panango kuti: “mosaganiza bwino.”
^ Onani vakumapeto A5.
^ Panango kuti: “nthyonthyolozi; madontholozi.”
