Kwa Afilipi 1:1-30
1 Ine Paulo na Timoteyo, anyabasa wa Yesu Khrisitu, ninkunembera wochena wose womwe ali ku Filipi kuphatanidzapo onyang’anira na atumiki othandiza kuti:
2 Kukoma ntima kukulu na ntendere vochokera kwa Mulungu Ababa wathu na kwa Yesu Khrisitu Ambuya wathu vikhale na imwepo.
3 Nthawe zose nikambaganizira va imwepo, nitembeja Mulungu wangu.
4 Nichita vimwevi nikambachita mapemphero yogwigwirira kuti akuthandizeni. Nichita mapemphero yogwigwirira mwaya nili wokondwa.
5 Ndawa ya vomwe munkuchita pakuthandizira ntontholo wabwino kundochokera pa ntsiku yoyambirira mpakana pano.
6 Ndawa yakuti ndine wotsimikiza kuti ule yemwe adayamba basa yabwino kwa imwepo adzaimalizise mpakana kudzafika ntsiku ya Yesu Khrisitu.
7 Nivobveka kumbakuganizirani teneuyu ndawa yakuti ndimwe wapamoyo, munkugawana nane kukoma ntima kukulu, matcheni yanidamangiwa nayo mudjeri, pakuteteza na kukhazikisa mwalamulo basa ya ntontholo wabwino.
8 Mulungu ankudziwambo kuti nakusuwani mose imwepo na chikondi chosapera ninge cha Yesu Khrisitu.
9 Ndipo ine ninkupitiriza kupemphera kuti chikondi chanu chipitirize kukula, mukhale wodziwa vinthu bwinobwino na ozindikira vinthu maninge.
10 Chitani vimwevi kuti mumbatsimikizire kuti vinthu vofunika maninge ni viponi kuti osati muphonyese chinthu na kukalipisa anango mpakana ntsiku ya Khrisitu.
11 Muchite vimwevi kuti mudzadziwe pomwe na vipaso volungama kupitira mwa Yesu Khrisitu kuti Mulungu atamandiwe na kulemekezewa.
12 Manje abale, nifuna kuti mudziwe kuti vomwe vidanichitikira vire vilibe kuimisa basa ya ntontholo wabwino, koma vathandiza kuti ipite patsogolo.
13 Pakuti munthu aliyese kuphatanidzapo Masocha Yoteteza Mpfumu yadziwa kuti ine namangiwa ndawa ya Khrisitu.
14 Abale azinji alimba ntima mwa Ambuya ndawa ya kumangiwa kwangu, ndipo manjeuno ankupitiriza kulalikira mawu ya Mulungu alibe mantha.
15 Ni shuwadi kuti anango ankulalikira va Khrisitu ndawa yakuti ankunichitira njiru ndipo ankupikisana nane, koma anango ankulalikira na cholinga chabwino.
16 Amwawa omalizira omwe anacholinga chabwino, alalikira va Khrisitu ndawa ya chikondi, ndawa iwo adziwa kuti nidasaluliwa kuti niteteze ntontholo wabwino.
17 Koma oyamba awa ankuchita vimwevi na cholinga chofuna kugegedzana, osati na cholinga chabwino. Iwo andofuna kuniingizira mabvuto pomwe nili mudjeri.
18 Ko vimwevi vabweresa phindu iponi? Phindu yake ni yakuti, ntontholo wonena va Khrisitu unkupitiriza kulalikiriwa, peno monamizira panango mwa chonadi. Ine ninkukondwera ndawa ya vimwevi, ndipo nipitirize kukondwera.
19 Ndawa ninkudziwa kuti mapemphero yanu yogwigwirira yachitise kuti nipulumusiwe mothandiziwa na mzimu wa Yesu Khrisitu.
20 Vimwevi nivobverana na shungu yangu yamphanvu na chidikhiro chakuti munjira iliyose nidzachitelini manyazi, koma ndawa ya kuyankhula molimba ntima Khrisitu alemekezewe manjeuno, ninge momwe vakhala vinkuchitikira nthawe zose pakuphatisira basa thupi yangu peno nikhale na moyo panango nife.
21 Pakuti kwa inepano, nikakhala moyo nikhala na moyo kuti nimbatumikire Khrisitu ndipo nikafa ndiye kuti naphindula.
22 Peno nipitirize kukhala na moyo na thupi yaninayo ino, ndiye kuti basa yangu iyingizirike, ndipo vati nisalule nilewelini.
23 Napanikizika na vinthu vimwevi viwiri, koma chomwe ninkufuna ni kumasuka kuti nikakhale na Khrisitu, ndawa mwechi ndicho chinthu chabwino maninge.
24 Podiya kuti vili teno, ninkuwona kuti vingakhale bwino kuti nipitirize kukhala na thupi yaninayo ino kuchitira imwepo.
25 Manje pakuti natsimikizira vimwevi, ninkudziwa kuti nipitirize kukhala na moyo ndipo nipitirize kukhala na imwepo kuti mupite patsogolo nakuti mukhale wokondwa ndawa ya chikhulupiriro chanu.
26 Shuwadi, kuti nikadzabwera pomwe kumuko, mudzakondwe maninge ndawa yakuti mutewera Yesu Khrisitu.
27 Koma chomwe nikundofuna ni chakuti makhalidwe yanu yakhale yobverana na ntontholo wabwino wa Khrisitu, kuti peno nabwera kudzakuwonani panango inepano kulibe, nimbabve va imwepo kuti munkupitiriza kukhala obverana. Ndipo na ntima ubodzi munkuyesesa mobverana kuti mupitirize kukhulupirira ntontholo wabwino.
28 Ndipo munkugopalini olo pang’ono wanthu womwe ankukutsutsani. Umoyu ni umboni wakuti adzadzongewe, koma kwa imwepo ni umboni wakuti mudzapulumusiwe ndipo umboni moyu ni wochokera kwa Mulungu.
29 Viriteno ndawa yakuti imwepo mudapasiwa mwayi. Sikuti mudandopasiwa mwayi wokhulupirira Khrisitu basi, koma kuti mumbabonere pomwe ndawa ya iye.
30 Ndipomwapa imwepo munkugumanambo na mabvuto yomwe mudawona inepano ninkugumana nayo na yomwe munkubva kuti ninkupitiriza kugumana nayo.
