Kwa Afilipi 2:1-30
2 Mumbachite vose vamungakwanise kuti mumbalimbikisane mwa Khrisitu, mumbanyamalisane mwachikondi, mumbakonde kuchitira vinthu pabodzi, mumbawonesane chikondi chikulu na chifundo.
2 Mukambachita vimwevi, mudzanichitise kuti nimbakhale wokondwa maninge. Mumbawonese kuti munamaganizo yolingana, munachikondi cholingana komasoti kuti ndimwe wobverana maninge ndipo maganizo yanu ni yabodzi.
3 Ayi kumbachita chirichose na ntima wokonda kugegedzana panango ndawa yodzikuza, koma modzichepesa* mumbawone anango kuti akuposhani.
4 Ayi kumbandoganizira vofuna vanu vokha, koma mumbaganizire pomwe vofuna va anango.
5 Khalani na maganizo ninge yomwe Yesu Khrisitu wenze nayo.
6 Olo kuti ambawoneka ninge Mulungu, alibe kuganizirako voyesa kutenga udindo wa Mulungu kuti akhale wolingana naye.
7 Alibe kuchita vimwevo, koma adabvuma kusiya vose nkukhala ninge kapolo ndipo adakhala munthu.*
8 Kuposha pamwapa, padakhala munthu,* adakhala wodzichepesa ndipo adakhala wobvera mpakana kufa pa muti wodzudzikirapo.*
9 Ndipomwapa Mulungu adamukwiza nkumupasa udindo wapadzulu ndipo adamukomera ntima nkumupasa dzina yomwe palibe inango yolingana nayo.
10 Adachita vimwevi kuti mudzina ya Yesu, wose agwade peno ali kudzulu, padziko yapasi panango pasi pa dongo.
11 Komasoti kuti aliyese afike pakubvuma kuti Yesu Khrisitu ni Ambuya, vomwe vidzapereke ulemerero kwa Mulungu Ababa.
12 Abale na alongo wangu wapamoyo, imwepo nthawe zose mumbabvera panthawe yomwe nenze namwe pabodzi. Sikuti mudachita vimwevi panthawe yomwe tenze pabodzi basi, koma olo manjeuno patiri kwakekwake munkupitiriza kubvera maninge. Molingana na vimwevi, aliyese apitirize kuyesesa kuchita vimwevi mwamantha na kunjenjemera kuti adzapulumuke.
13 Ndawa Mulungu ndiye yemwe akulimbikisani. Akupasani ntima wofuna kuchita vinthu vomwe iye akonda, nkukupasani pomwe mphanvu yochitira vinthu vimwevo. Iye achita vinthu vimwevi ndawa yakuti vimukondweresa maninge.
14 Mukambachita vinthu, mumbapewe kung’ung’udzika na kugegedzana,
15 kuti mukhale osaphonya komasoti mulibe chifukwa chokunenerani voipa. Mukhale wana wa Mulungu alibe chilema pakati pa m’badwo wosokonezeka maganizo na wobendabenda. Pakati pa m’badwo moyu imwepo munkugaka ninge vovunikira mudziko ino.
16 Pomwe munkuchita vimwevi, muphate mwamphanvu mawu ya moyo. Mukateno, nidzakhale na chifukwa chokhalira wokondwa mu ntsiku ya Khrisitu, ndawa nidzadziwe kuti sikuti nidandothamangambo papezi panango kuchita khama palibe na basa.
17 Podiya kuti ninkuthiriwa ninge ntsembe ya chakumwa, ninkuthumizira pa ntsembe zomwe imwepo munkupereka na pa utumiki wopatulika womwe imwepo munkuchita mokhulupirika. Ndipomwapa ninkukondwa ndipo ninkukondwera pabodzi na imwepo.
18 Ninkukulimbikisani kuti mukondwembo nane pabodzi.
19 Koma inepano ninkudikhira kuti, Ambuya Yesu anibvumize kutumiza Timoteyo kwa imwepo manjemanje apa, kuti nidzalimbikisiwe nikadzabva momwe vinthu viliri kwa imwepo.
20 Ndawa niribe munango yemwe anakhalidwe yabwino ninge Timoteyo, yemwe angasamaliredi vosowa vanu mwachilungamo.
21 Wanthu azinji akundoganizira vofuna vawo vokha, osati va Yesu Khrisitu.
22 Koma imwepo munkudziwa chitsanzo chabwino chomwe Timoteyo adawonesa, kuti ninge mwana na ababa wake, watumikira ninge kapolo pabodzi na inepano pakulalikira ntontholo wabwino.
23 Ndipomwapa ninkudikhira kuti nikutumizireni munthu moyu nikandodziwa momwe vinthu vikhalire kwa inepano.
24 Shuwadi, ninkukhulupirira kuti Ambuya abvumize kuti inepanombo nibwere mwakankulumize.
25 Apa manje ninkuwona kuti vingakhale bwino kuti nikutumizireni Epafurodito. Moyu ni m’bale wangu, nsocha mwanzangu na nyabasa mwanzangu. Iye ni wotumika wanu komasoti anithandiza pa vosowa vangu.
26 Ninkufuna kumutumiza ndawa yakuti anashungu ya kukuwonani mose, ndipo ankushupika maganizo ndawa mudabva kuti ambadwala.
27 Iye ambadwaladi ndipo wenze adakhala pang’ono kufa. Koma Mulungu adamubvera chifundo, ndipo chifundo chimwecho alibe kuchitira iye yekha, koma adachitira pomwe inepano kuti osati nimbandokhala wokwinyirira.
28 Ndipomwapa ninkumutumiza mwakankulumize kwa imwepo kuti mukamuwona mukhale wokondwa nakuti nkhawa zangu zichepe.
29 Ndipomwapa ninge mwamunchitira nthawe zose, mutambireni bwino ninge mwamunchitira potambira wotewera wa Ambuya. Mumutambire mwantsangala ndipo abale ninge mwawa mumbawalemekeze maninge.
30 Ndawa wenze adakhala pang’ono kufa pomwe angaphata basa ya Khrisitu* ndipo adaikha moyo wake pangozi kuti adzanitumikire m’malo mwa imwepo, pakuti mudakakwanisalini kubwera kuno kuti mudzanithandize.
Mawu ya m’nyantsi
^ Panango kuti: “na maganizo yodzichepesa.”
^ Panango kuti: “wooneka ninge munthu.”
^ Panango kuti: “pewenze na maonekedwe ya munthu.”
^ Onani matanthauzo ya mawu yanango.
^ Panango kuti: “Ambuya.”
