Kwa Afilipi 3:1-21
3 Pomalizira abale wangu, pitirizani kukhala wokondwa ninge wotewera Ambuya. Kubwerezera kunemba vinthu vomwe nidanemba kale, kwa ine ni bvutolini, koma ni chitetezo kwa imwepo.
2 Chenjerani na wanthu womwe achita vinthu ninge mbwaya. Chenjerani na wanthu womwe adzonga anzawo. Chenjerani na wanthu womwe achita mdulidwe.
3 Ndawa isepano tidachita mdulidwe chaiye, ise womwe tikuchita utumiki wopatulika motsogolerewa na mzimu wa Mulungu. Tidzitama mwa Khrisitu Yesu ndipo tithembalini vinthu vomwe wanthu aviwona kuti ni vofunika,
4 olo kuti inepano, kuposha aliyese, ninavifukwa vothembera vinthu vomwe wanthu aviwona kuti ni vofunika.
Peno panamunthu munango yemwe ankuganiza kuti anavifukwa vothembera vinthu vomwe wanthu aviwona kuti ni vofunika, ine ninkumuposha muyo ndawa yakuti:
5 Nidachitiwa mdulidwe pa ntsiku ya 8, ndine wa ntundu wa Izirayeli, ndine wadzinza ya Benjamim, ndine Muheberi wobadwa kwa Aheberi. Kulewa va chilamulo, ndine Mfalisi.
6 Kunena va kudzipereka, ningadzudza mpingo. Kunena va kuchita chilungamo potewedza chilamulo, nidawonesa kuti nilibe chifukwa choninamizirira.
7 Koma vinthu vomwe venze vaphindu kwa ine, ninkuviwona kuti vilibe na phindu* ndawa ya Khrisitu.
8 Shuwadi, niwona kuti vinthu vose vilibe na phindu ndawa yakuti nidadziwa Khrisitu Yesu Ambuya wangu, chomwe ni chinthu chofunika maninge. Ndawa ya iye nidataya vinthu vose ndipo niviwona ninge hopo ya vinyaswa,* kuti nikhale paushamwali chaiwo na Khrisitu,
9 komasoti kuti nimbawonewe kuti ndine wotewera wake. Koma sikuti ndine wolungama ndawa yakuti ninkuchita vose motewedza Chilamulo, koma ndawa yakuti nikhulupirira Khrisitu. Chilungamo chimwechi ni chochokera kwa Mulungu ndipo chibwera ndawa ya chikhulupiriro.
10 Cholinga changu ni chakuti nimudziwe nakuti nidziwe mphanvu za yemwe adamumukisa kwa akufa. Nikufuna pomwe kubonera ninge momwe iye adabonerera, mpakana kubvuma kufa ninge momwe iye adafera.
11 Nachita vimwevi kuti peno vingakwanisike nidzakhale na mwayi wodzamuka kwa akufa pa kumuka koyamba.
12 Sikuti natambira kale mphoto mwiyo panango kuti nakhala kale wangwiro neye. Koma ninkuyesesa basi kuti nikaitambire mphoto mwiyo ndawa ninkudziwa kuti cholinga cha Khrisitu Yesu pakunisalula chenze chimwechi.
13 Abale, sikuti ninkudziwona kuti natambira kale mphoto mweyi, koma panachinthu chibodzi chomwe ninkuchita: Ninkuyebwa vinthu vakumambuyo ndipo ninkuyesesa kuti nikagumane vakutsogolo.
14 Ninkuyesesa kuti nikwanirise cholinga changu chokatambira mphoto. Mphoto mweyi ni kukakhala na moyo kudzulu ndipo Mulungu adzaipereke kwa wanthu omwe adawachemera pophatisira basa Yesu Khrisitu.
15 Ndipomwapa, naboni tose omwe ndise wolimba mwauzimu, tikhale na maganizo mwaya. Ndipo peno munamaganizo yosiyana na mwaya, Mulungu adzakuululireni maganizo chaiyo.
16 Olo kuti tapita kale patsogolo, naboni tipitirize kupita patsogolo pochita vatinkuchita kale.
17 Abale mose, muyesese kumbanitewedzera ndipo mumbawonesese omwe ankuchita vinthu mobverana na chitsanzo chomwe tidakupasani.
18 Pakuti pali azinji omwe nimbawatomola kawirikawiri. Koma manjeuno niwatomola uku ninkulira ndawa yakuti iwo ni azondi wa muti wodzudzikirapo* wa Khrisitu.
19 Wanthu mwawa ankudikhira kuchenekewa ndipo Mulungu wawo ni mimba zawo. Iwo adumba na vinthu vomwe ambafunika kuchita navo manyazi ndipo andoganizira vinthu va padziko yapasi.
20 Koma ise ndise nzika zakudzulu ndipo tinkudikhira mwachidwi wotipulumusa wochokera kumuko yemwe ni Ambuya Yesu Khrisitu.
21 Iye adzachinje thupi yathu yonyozeka iyi kuti ilingane na thupi yake yolemekezeka. Adzachite vimwevi pophatisa basa mphanvu zake zikulu zomwe zimuthandiza kugonjesa vinthu vose kuti vikhale pasi pake.
Mawu ya m’nyantsi
^ Panango kuti: “nidavisiya.”
^ Panango kuti: “vinyalala.”
^ Onani matanthauzo ya mawu yanango.
