Kwa Agalatiya 1:1-24
1 Inepano Paulo, ndine ntumi, osati wochokera kwa wanthu panango woikhiwa na wanthu, koma woikhiwa na Yesu Khrisitu komasoti Mulungu Ababa womwe adamumukisa kwa akufa.
2 Inepano pabodzi na abale wose omwe ali nane, tikupereka moni ku mipingo ya ku Galatiya:
3 Kukoma ntima kukulu na ntendere vochokera kwa Mulungu Ababa wathu na Ambuya Yesu Khrisitu, vikhale namwe.
4 Iye adadzipereka ndawa ya machimo yathu, kuti atipulumuse kudziko yoipa iyi, mobverana na chifuniro cha Mulungu yemwe ni Ababa wathu.
5 Ulemerero ukhale na Mulungu muyo mpakana kalekale. Ame.
6 Ine ninkudabwa kuti mwapatuka kamangu* kuchoka kwa Mulungu yemwe adakuchemerani kupitira mu kukoma ntima kukulu kwa Khrisitu ndipo mwayamba kubvesera ntontholo wabwino wa khaindi inango.
7 Koma muyo sikuti ni ntontholo wabwino, kundoti pali wanthu anango omwe ankukusokonezani ndipo ankufuna kudzonga ntontholo wabwino wonena va Khrisitu.
8 Peno isepano panango mngelo wochokera kudzulu angalengeze nkhani inango kwa imwepo nkumbanena kuti ankulengeza ntontholo wabwino, koma nkhani mwiyo nkukhala yosiyana na ntontholo wabwino womwe tidaulengeza kwa imwepo, muyo akhale wotembererewa.
9 Ninge momwe tanenera kale, ninkunena pomwe kuti: Aliyese yemwe ankulengeza nkhani kwa imwepo nkumbanena kuti ni ntontholo wabwino, koma ni yosiyana na yomwe mudatambira, muyo akhale wotembererewa.
10 Ko manjeuno ninkufuna kuti nimbakondewe na wanthu panango Mulungu? Panango ko nikundofuna kukondweresa wanthu? Vidakakhala kuti nikukondweresa wanthu, nidakakhalalini kapolo wa Khrisitu.
11 Ndawa nikufuna kuti mudziwe abale, kuti ntontholo wabwino womwe nidalengeza kwa imwepo ulibe kuchokera kwa wanthu.
12 Ntontholo moyu niribe kuutambira kwa munthu ndipo niribe kuchita kupfunzisiwa, koma Yesu Khrisitu ni yemwe adaniululira ntontholo moyu.
13 Imwepo mudabva vomwe nimbachita penenze Muyuda, kuti nimbadzudza maninge mpingo wa Mulungu ndipo nidapitiriza kuudzonga.
14 Nimbachita bwino maninge muchipembedzo cha Ayuda kuposha anzangu azinji wa mudzinza yangu womwe enze wa nsinkhu wangu, ndawa nenze wodzipereka maninge pa miyambo ya azibereki wangu.
15 Koma pomwe Mulungu, yemwe adanichitisa kuti nibadwe komasoti kunichemera kupitira mwa kukoma ntima kwake kukulu, adawona kuti ni bwino kuti
16 aulule va mwana wake kupitira mwa ine, na cholinga chakuti nilengeze kwa wanthu wa makhaindi yanango ntontholo wabwino wonena va iye, niribe kuyenda kukakambirana na munthu aliyese nthawe mwiyo.
17 Niribe kuyenda pomwe ku Yerusalemu kwa omwe adakhala atumi ine nikalibe kukhala, koma nidayenda ku Arabiya, patsogolo pake nidabwerera pomwe ku Damasiko.
18 Manje payadapita magole yatatu, nidayenda ku Yerusalemu kukacheza kwa Kefa* ndipo nidakhala naye kwa ntsiku 15.
19 Atumi anango wose niribe kuwawona koma nidandowonako Yakobo, m’bale wake wa Ambuya.
20 Vomwe ninkukunemberani ivi, ninkukutsimikizirani pamaso pa Mulungu kuti ninkunamalini.
21 Patsogolo pake nidayenda m’madera ya Siriya na Kilikiya.
22 Koma wanthu wa m’mipingo ya ku Yudeya yomwe yenze yobverana na Khrisitu, ambanidziwalini bwinobwino.
23 Iwo ambandobva kuti: “Munthu yemwe kalekale ambatidzudza ule komasoti kudzonga mipingo, manje akulengeza ntontholo wabwino.”
24 Ndipomwapa wanthu mwawa adayamba kulemekeza Mulungu ndawa ya inepano.
