Kwa Agalatiya 2:1-21
2 Manje payadapita magole 14, nidayenda pomwe ku Yerusalemu na Baranaba ndipo nidatenga pomwe Tito.
2 Nidayenda kumuko ndawa nidauziwa m’masomphenya kuti niyendeko. Ndipo abale nidawafotokozera ntontholo wabwino womwe ninkuulalikira kwa wanthu wa makhaindi yanango. Koma nidachita vimwevi mwachintsintsi kwa abale wothembeka wokha pakufuna kutsimikizira kuti utumiki wangu unkuyendalini papezi.
3 Ndipo olo kuti Tito yemwe nenze naye pabodzi wenze Mgiriki, alibe kuchichimiziwa kuti achitiwe mdulidwe.
4 Koma nkhani mweyi idayambika ndawa ya abale omwe alibe chilungamo omwe adangena pagulu yathu mwakazizizi kuti adzatitape nkamwa, na cholinga chakuti asokoneze ufulu womwe tinkukondwa nawo mobverana na Khrisitu Yesu, nkutisandusa akapolo.
5 Wanthu mwawa tiribe kuwabvera olo pang’ono, kuti imwepo mupitirize kukhala na chonadi cha ntontholo wabwino.
6 Koma pakunena va wanthu omwe ambawoneka ninge wapadera wale, inepano niribe navo basa peno iwo enze wotani, ndawa Mulungu anyang’analini momwe munthu ankuwonekera, amuna wothembeka mwawo alibe kunipfunzisako chinthu chinyowani.
7 Koma padawona kuti napasiwa basa yolalikira ntontholo wabwino kwa wanthu wosachitiwa mdulidwe, molingana na Petulo yemwe adapasiwa basa yakuti alalikire ntontholo wabwino kwa wanthu wochitiwa mdulidwe,
8 pale yemwe adapasa Petulo mphanvu kuti akhale ntumi kwa wanthu wochitiwa mdulidwe ndiye adapasambo inepano mphanvu kuti nikhale ntumi kwa wanthu wa makhaindi yanango.
9 Iwo padazindikira kukoma ntima kukulu komwe nidapasiwa, Yakobo, Kefa* na Yohani, omwe enze ninge vipilala, adaphata bentsa inepano na Baranaba pakuwonesa kuti abverana na vakuti isepano tiyende kwa wanthu wa makhaindi yanango ndipo iwo ayende kwa wanthu wochitiwa mdulidwe.
10 Iwo adandotikumbira kuti timbakumbukire wosauka ndipo nayesesa kuchita vimwevi mwachilungamo.
11 Koma Kefa* padabwera ku Antiokeya, nidamutsuula maso na maso ndawa vimbachita kuwonekeratu kuti ambachita vinthu vophonyeka.
12 Ndawa akanati kufika wanthu anango wochokera kwa Yakobo, iye ambadya pabodzi na wanthu wa makhaindi yanango. Koma wanthu mwawo padafika, iye adaleka kuchita vimwevi ndipo adadzipatula, ndawa ambagopa wanthu mwawo wochitiwa mdulidwe.
13 Ayuda anangombo adabverana naye pakuchita vinthu viribe chilungamo vimwevi. Olo Baranaba nayembo adachita nawo vinthu viribe chilungamo vimwevi.
14 Koma panidawona kuti ambachitalini vinthu mobverana na chonadi cha ntontholo wabwino, nidauza Kefa* pamaso pa wose kuti: “Peno iwepo, olo kuti ndiwe Muyuda, ukukhala ninge wanthu wa makhaindi yanango, osati ninge Ayuda, ndawa chani ukufuna kuchitisa wanthu anango kuti ambatewedze chikhalidwe cha Ayuda?”
15 Isepano omwe ndise wa khaindi ya Chiyuda, osati wochimwa wochokera kwa wanthu wa makhaindi yanango,
16 tinkudziwa kuti munthu awonewa kuti ni wolungama, osati ndawa yotewedza chilamulo, koma ndawa yokhulupirira Yesu Khrisitu basi. Ndipomwapa isepano tinkukhulupirira Yesu Khrisitu kuti tiwonewe wolungama ndawa yokhulupirira Khrisitu, osati ndawa yotewedza chilamulo. Tachita vimwevi ndawa palibe munthu yemwe awonewa kuti ni wolungama ndawa yotewedza chilamulo.
17 Manje peno isepano tagumaniwa pomwe kuti ndise ochimwa pomwe tinkuyesesa kuti tiyesewe wolungama kupitira mwa Khrisitu, ko ndiye kuti Khrisitu wakhala ntumiki wa uchimo? Ndivolini.
18 Peno ninkumanga pomwe vinthu vomwe nidagwesa, ndiye kuti ninkuwonesa kuti ndine wophwanya malamulo.
19 Ndawa peno nimbatewedza chilamulo, nidafa kuchilamulo kuti nikhale moyo nkumbatumikira Mulungu.
20 Nidakhomererewa pamuti pabodzi na Khrisitu. Ndinelini pomwe yemwe ninkukhala na moyo, koma Khrisitu ndiye yemwe anamoyo ndipo ni wobverana na inepano. Shuwadi, moyo womwe ninkukhala manje, ninkukhala mokhulupirira Mwana wa Mulungu, yemwe adanikonda nkudzipereka yekha ndawa ya inepano.
21 Ninkulambalini kukoma ntima kukulu kwa Mulungu, ndawa peno munthu akhala wolungama ndawa yotewedza chilamulo, ndiye kuti Khrisitu adandofa palibe na basa.
Mawu ya m’nyantsi
^ Wodziwika pomwe kuti Petulo.
^ Wodziwika pomwe kuti Petulo.
^ Wodziwika pomwe kuti Petulo.
