Kwa Agalatiya 3:1-29
-
Basa za Chilamulo komasoti chikhulupiriro (1-14)
-
Wolungama adzakhale na moyo ndawa ya chikhulupiriro (11)
-
-
Polomisi ya Abulahamu imbathembalini Chilamulo (15-18)
-
Khrisitu ni mbadwa ya Abulahamu (16)
-
-
Komwe Chilamulo chidachokera komasoti cholinga chake (19-25)
-
Ndimwe wana wa Mulungu ndawa ya chikhulupiriro (26-29)
-
Opfunzira wa Khrisitu ni mbadwa za Abulahamu (29)
-
3 Wanthu wa ku Galatiya wopusa imwe! Ko nimbani yemwe adakupusisani, imwepo omwe mudakhala ninge mwawona Yesu Khrisitu ali khomererewe pamuti?
2 Ninkufuna kuti nikubvunzeni chinthu chibodzi: Ko mudatambira mzimu ndawa ya basa za chilamulo panango ndawa yokhulupirira vomwe mudabva?
3 Ko ndimwe wopusa tene kani? Mudayamba na kuthemba mzimu, ko manje munkufuna kumaliza na kuthemba nzeru za wanthu omwe ni wochimwa?
4 Ko kushupika kose kule kudondoyenda papezi? Ninkukhulupirira kuti kulibe kuyenda papezi.
5 Ko manje yemwe akupasani mzimu na kuchita vinthu vamphanvu pakati panu, achita vimwevi ndawa yakuti imwepo munkuchita basa za chilamulo panango ndawa yakuti mudakhulupirira ntontholo wabwino womwe mudabva?
6 Ndoganizirani va Abulahamu. Iye “adakhulupirira vomwe Yahova* adamuuza ndipo ambawonewa kuti ni wolungama.”
7 Imwepo munkudziwa kuti omwe apitiriza kukhala na chikhulupiriro ndiwo wana wa Abulahamu.
8 Kalekale malemba yadaneneratu kuti Mulungu adzawone wanthu wa makhaindi yanango kuti ni wachilungamo ndawa ya chikhulupiriro. Ndipomwapa adalengezeratu ntontholo wabwino kwa Abulahamu kuti: “Kupitira mwa iwepo, makhaindi yose yadzadalisiwe.”
9 Ndipomwapa yemwe anachikhulupiriro champhanvu ankudalisiwa pabodzi na Abulahamu, yemwe wenze na chikhulupiriro.
10 Wose womwe athemba basa za chilamulo ni wotembererewa, ndawa Malemba yanena kuti: “Munthu aliyese yemwe ankupitirizalini kutewedza vinthu vose vomwe vidanembewa mu mpukutu wa Chilamulo ni wotembererewa.”
11 Kuingizira pamwapa ni vodziwikiratu kuti palibe munthu yemwe Mulungu angamuwone kuti ni wachilungamo ndawa ya chilamulo, ndawa “wolungama adzakhale na moyo ndawa ya chikhulupiriro chake.”
12 Manjeuno Chilamulo chithembalini chikhulupiriro. Koma “aliyese yemwe ankuchita va m’Chilamulo adzakhale na moyo ndawa ya chilamulo mwicho.”
13 Khrisitu adatigula nkutimasula ku temberero ya Chilamulo. Adachita vimwevi pokhala temberero m’malo mwa isepano, ndawa Malemba yanena kuti: “Munthu aliyese womanikiwa pamuti ni wotembererewa.”
14 Cholinga chake chenze chakuti pakuphatisa basa Yesu Khrisitu, makhaindi ya wanthu yagumane madaliso yomwe Abulahamu adapolomisiwa, kuti tidzatambire mzimu wopolomisiwa ndawa ya chikhulupiriro chathu.
15 Abale, nipereke chitsanzo mobverana na vomwe vichitikira wanthu: Pangano ikakhazikisiwa, podiya kuti ni pangano ya wanthu, palibe yemwe angaimalise panango kuthimizirapo mpfundo zinango.
16 Manje mapolomisi yadaperekewa kwa Abulahamu na kwa mbadwa yake. Malemba yanenalini kuti: “Kwa mbadwa zako,” ninge kuti mbadwa mwizo ni zizinji. Koma yankunena kuti, “kwa mbadwa yako,” kutanthauza kuti ni ibodzi, yemwe ni Khrisitu.
17 Komasoti inepano ninkunena kuti: Pakuyamba, Mulungu adachita pangano na Abulahamu ndipo payadapita magole 430 adapereka Chilamulo kwa wanthu wake. Koma Chilamulo mwicho chiribe kumalisa pangano na polomisi yomwe Mulungu adachita na Abulahamu kuti polomisi mwiyo osati iphate pomwe basa.
18 Ndawa peno Mulungu apereka vinthu pophatisa basa chilamulo ndiye kuti vithembalini pomwe polomisi. Koma mokoma ntima Mulungu wavipereka kwa Abulahamu pophatisa basa polomisi.
19 Manje ndawa chani Chilamulo chidaperekewa? Adatipasa Chilamulo mwechi kuti machimo yawonekere, mpakana idzafike mbadwa yomwe idapasiwa polomisi mweyo. Angelo adapereka Chilamulo mwicho pakuphatisa basa djanja ya mkhalapakati.
20 Peno pangano yandochitika na munthu m’bodzi pakhalalini mkhalapakati. Ndimo mwevenzerembo na Mulungu, wenze yekha panthawe yomwe angapereka polomisi mweyi.
21 Manje ko Chilamulo chitsutsa mapolomisi ya Mulungu? Neye chitsutsalini. Ndawa adakati padaperekewa lamulo yopasa moyo, sembe tinkuwonewa kuti ndise wolungama ndawa yotewedza chilamulo.
22 Koma Malemba yawonesa kuti wanthu ankutongewa na uchimo, kuti polomisi yomwe ikhalapo ndawa yokhulupirira Yesu Khrisitu, iperekewe kwa wanthu omwe ankumukhulupirira.
23 Koma olo nteno, chikhulupiriro mwicho chikanati kufika, chilamulo ndicho chimbatinyang’anira ndipo chidatiikha pa ukapolo. Panthawe mweyo timbadikhira chikhulupiriro chomwe chenze chidasala pang’ono kuwonekera.
24 Ndipomwapa Chilamulo chidakhala wotitsogolera yemwe adatitsogolera kwa Khrisitu, kuti tiwonewe kuti ndise wanthu wolungama ndawa ya chikhulupiriro.
25 Koma pakuti chikhulupiriro mwicho manje chafika, tinkutsogolerewalini pomwe na wotinyang’anira.*
26 Ndipo mose imwepo ndimwe wana wa Mulungu ndawa mukhulupirira Yesu Khrisitu.
27 Ndawa mose imwepo omwe mudabatiziwa ndipo ndimwe obverana na Khrisitu mwakhala na makhalidwe ninge ya Khrisitu.
28 Palibe Muyuda panango Mgiriki, palibe kapolo panango womasuliwa ku ukapolo, palibe pomwe mwamuna panango nkazi ndawa mose ndimwe abodzi mwa Yesu Khrisitu.
29 Ndipo peno ndimwe wopfunzira wa Khrisitu, ndimwedi mbadwa za Abulahamu, wotambira vinthu mobverana na polomisi mwiyo.
