Kwa Agalatiya 4:1-31
4 Manje ninkunena kuti, wotambira chuma cha banja akakhala mwana mng’ono, iye asiyanalini na kapolo, podiya kuti ni munichiro wa vinthu vose.
2 Koma apitiriza kutsogolerewa na amuna onyang’anira wana komasoti wanthu onyang’anira vinthu va abwana wawo, mpakana ntsiku yomwe ababa wake adaikhiratu.
3 Ni chibodzibodzimbo isepano. Petenze wana, tenze akapolo ndawa timbaphatisira basa mpfundo zomwe wanthu wa mu dziko iyi aphatisira basa.
4 Koma nthawe paidakwana, Mulungu adatumiza Mwana wake, yemwe adabadwa kupitira mwa nkazi ndipo ambatsogolerewa na chilamulo.
5 Adachita vimwevi kuti apereke malipiro yomasulira wanthu omwe ambatsogolerewa na chilamulo na cholinga chakuti Mulungu atitenge nkukhala wana wake.
6 Manje pakuti ndimwe wana wake, Mulungu muyo watumiza mzimu wa Mwana wake m’mitima yathu ndipo mzimu muyo unkukuwa kuti: “Abba,* Ababa!”
7 Ndipomwapa aliyese pa imwepo ni kapololini, koma ni mwana. Ndipo peno ndiwe mwana, ndiye kuti ndiwe pomwe wotambira vinthu vomwe Mulungu adzakupase.
8 Podiya kuti viri teno, panthawe yomwe mumbamudziwalini Mulungu, mwenze akapolo wa vinthu vomwe ni milungulini chaiyo.
9 Koma manje mwamudziwa Mulungu, panango tinene kuti manje mwadziwiwa na Mulungu. Manje munkubwerera pomwe tani ku mpfundo zomwe wanthu wa mu dziko iyi aphatisa basa, zomwe zilibe na basa komasoti zosathandiza, nkumbafuna kukhala pomwe akapolo wazene?
10 Munkuchita vikondwerero pa ntsiku, minyezi, nthawe na pagole vomwe munkuganiza kuti ni vapadera.
11 Nkhawa yangu ni yakuti panango basa yomwe nidaphata pakukuthandizani yandoyenda papezi.
12 Ninkukukumbirani abale wangu kuti mukhale ninge inepano ndawa inembo pakuyamba nenze ninge imwepo. Mulibe kuniphonyera chinthu.
13 Koma munkudziwa kuti nidagumana mwayi wolengeza ntontholo wabwino nthawe yoyamba kwa imwepo ndawa yakuti nimbadwala.
14 Ndipo olo kuti matenda yangu yenze mayesero kwa imwepo, mulibe kunyantsiwa panango kuipidwa nane. Koma mudanitambira ninge mngelo wa Mulungu panango ninge Yesu Khrisitu.
15 Manje ko chimwemwe chemwenze nacho pakuyamba pale chili kuponi? Ndawa ninkutsimikiza kuti vidakakhala vokwanisika, mudakakwanisa kukolowola maso yanu nkunipasa.
16 Ko pano nakhala mzondi wanu ndawa nakuuzani chaivo?
17 Wanthu anango ankuyesesa maninge kuti akupumpseni na cholinga chakuti mumbawatewere. Iwo ankuchitalini vimwevi na volinga vabwino, koma ankufuna kuti akuchoseni kwa inepano, kuti imwepo mumbawatewere.
18 Viribwino peno munthu ankukuikhirani nzeru maninge na volinga vabwino osati pokhapokha nikakhala namwe pabodzi, koma nthawe zose.
19 Imwe wana wangu, inepano nayamba pomwe kubva kuwawa ndawa ya imwepo ninge mayi yemwe wasala pang’ono kubereka. Nipitirize kubva kuwawa kumoku mpakana mudzayambe kuonesa makhalidwe ya Khrisitu.
20 Manjeuno nidakakonda kukhala namwe pabodzi kuti nikuyankhuleni mwa njira inango, ndawa mwanimalisa nzeru.
21 Niuzeni, imwepo omwe mufuna kumbatewedza Chilamulo, ko mukubvalini vomwe Chilamulo mwicho chikunena?
22 Mwakulinganiza, Malemba yanena kuti Abulahamu adabereka wana awiri amuna, munango kwa kapolo wake nkazi ndipo munango kwa nkazi wake yemwe wenzelini kapolo.
23 Koma mwana yemwe adabadwa kwa kapolo ule adabadwa ninge momwe wana wose abadwira, pomwe mwana munango yemwe adabadwa kwa nkazi yemwe wenzelini kapolo adabadwa kupitira mu polomisi.
24 Vinthu vimwevi vinatanthauzo yophiphirisira, ndawa azimayi mwawa ankuimira mapangano yawiri. Yoyamba ni pangano ya pa phiri ya Sinai, yomwe ibereka wana kuti akhale akapolo. Pangano mwiyo ni Hagara ule.
25 Manjeuno, Hagara muyo ankutanthauza Sinai, phiri yomwe iri ku Arabiya ndipo ntsiku zino ankulingana na Yerusalemu, ndawa ali pa ukapolo pabodzi na wana wake.
26 Koma Yerusalemu wa m’dzulu ni kapololini ndipo ni mayi wathu.
27 Ndawa Malemba yanena kuti: “Kondwa iwepo nkazi wosabereka, yemwe ukanati waberekako mwana. Kuwa mokondwa iwepo nkazi yemwe ukanati wabvako ululu wa pobereka, ndawa wana wa nkazi wosiyiwa ni azinji kuposha wana wa nkazi yemwe anamwamuna.”
28 Manje imwepo abale, ndimwe wana omwe mudabadwa ndawa ya polomisi ya Mulungu molingana na Isaki.
29 Koma molingana na momwe venzere panthawe mwiyo, kuti munthu yemwe adabadwa ninge momwe wana wose abadwira adayamba kudzudza yemwe adabadwa kupitira mwa mzimu, ni momwembo viriri ntsiku zino.
30 Podiya kuti viri teno, ko Malemba yanena chani? “Thamangisani kapolo nkazi moyu pabodzi na mwana wake moyu pano. Ndawa mwana wa kapolo moyu adzatambirelini chuma chabanja pabodzi na mwana wa nkazi yemwe ni kapololini.”
31 Ndipomwapa abale, isepano ndise wana wa nkazi yemwe ni kapololini, osati wa nkazi yemwe ni kapolo.
Mawu ya m’nyantsi
^ Mwaya ni mawu ya mu Chiaramu yotanthauza kuti “Ababa!”
