Kwa Agalatiya 6:1-18
6 Abale, peno munthu wapatuka mosazindikira nkuyamba kufamba munjira yophonyeka, imwepo omwe ndimwe oyenerera mwauzimu yesesani kumuthandiza munthu muyo koma mopfatsa maninge. Koma pomwe munkuchita vimwevi musamale kuchitira kuti namwembo mungayesewe.
2 Pitirizani kunyamulirana vinthu volemera. Mukambachita vimwevi mudzakhale kuti munkukwanirisa chilamulo cha Khrisitu.
3 Ndawa peno munthu munango ankudziwona kuti ni wofunika koma alilini teno, ankudzinamiza yekha.
4 Koma aliyese payekha ayese vochita vake kuti awone kuti ni votani. Akachita teno adzakhale na chifukwa chokhalira wokondwa na vomwe wachita, osati modzilinganiza na munthu munango.
5 Ndawa aliyese afunika kunyamula ntolo* wake.
6 Komasoti aliyese yemwe ankupfunzisiwa mawu mwaya, agawane vinthu vose vabwino na yemwe ankumupfunzisa.
7 Ayi kudzinamiza, Mulungu apusisikalini. Chirichose chomwe munthu wabzala, adzakolole pomwe chimwicho.
8 Ndawa yemwe ankubzala na cholinga chophindulisa thupi yake, adzakolole impfa kuchokera mu thupi yake mwiyo. Koma yemwe ankutewedza mzimu wa Mulungu, adzakolole moyo wosapera kuchokera ku mzimu muyo.
9 Ndipomwapa, ayi kuti tisiye kuchita vabwino, ndawa panthawe yake tidzakolole tikaleka kuneta.*
10 Manje peno tingakwanise, naboni tichitire wose vabwino, koma makamaka abale na alongo wathu omwe atumikira Mulungu.
11 Onani mawu yakuluyakulu yomwe nakunemberani na djanja yangu.
12 Wose omwe ankufuna kuti ambaoneke ninge wabwino pamaso pa wanthu, ni omwe ankukuchichimizani kuti muchitiwe mdulidwe. Iwo ankuchita vimwevi kuti osati adzudziwe ndawa ya muti wodzudzikirapo* wa Khrisitu.
13 Ndawa olo mwawo omwe ankuchitiwa mdulidwe sikuti atewedza Chilamulo, koma ankufuna kuti muchitiwe mdulidwe na cholinga chakuti ambadzikwize na vomwe vachitika pathupi yanu.
14 Inepano ninkufunalini kudzikwiza ndawa ya chinthu chinango chirichose, kuchosapo ndawa ya muti wodzudzikirapo* wa Ambuya wathu Yesu Khrisitu. Kwa inepano, dziko idagemuliwa kuti iphewe kupitira mwa iye, koma mobverana na kuwona kwa dziko mweyi, inepano nidagemuliwa kuti niphewe kupitira mwa iye.
15 Ndawa kuchitiwa mdulidwe panango kusachitiwa mdulidwe ni kofunikalini, koma chofunika ni kukhala wolengewa pomwe.
16 Koma wose omwe atewedza lamulo mweyi ya momwe tifunika kukhalira, omwe ni Izirayeli wa Mulungu, akhale na ntendere ndipo Mulungu awawonese chifundo.
17 Kuyambira manje, osati pagumanike munthu woniboneresa. Ndawa thupi yangu mweyi inavidindo vowonesa kuti ndine kapolo wa Yesu.
18 Abale, kukoma ntima kukulu kwa Ambuya wathu Yesu Khrisitu kukhale namwe ndawa ya khalidwe yomwe muwonesa. Ame.
Mawu ya m’nyantsi
^ Moyu ni ntololini chaiye koma kukwanirisa udindo.
^ Panango kuti: “kufoka.”
^ Onani matanthauzo ya mawu yanango.
^ Onani matanthauzo ya mawu yanango.
