Kwa Aheberi 1:1-14
1 Kalekale, Mulungu ambayankhula na azibereki wathu pakuphatisa basa aneneri. Adachita vimwevi kazinjizinji komasoti munjira zosiyanasiyana.
2 Kumapeto kwa ntsiku zino, iye wayankhula na isepano pakuphatisa basa Mwana wake yemwe adamusankhula kuti akhale wotambira vinthu vose vomwe adamusungira. Komasoti kupitira mwa iye, Mulungu adachitisa kuti pakhale nthawe zosiyanasiyana.
3 Iye awonesa bwino ulemerero wa Mulungu na makhalidwe chaiyo ya Mulungu muyo. Komasoti mawu yake yamphanvu yathandiza kuti vinthu vipitirize kukhalapo. Ndipo padatichenesa nkutichosera machimo yathu, adakhala kudjanja yamakulu ya Wolemekezeka kudzulu.
4 Iye wakhala woposha angelo, mwakuti dzina yomwe watambira ninge malipiro ni yapadzulu maninge kuposha yawo.
5 Mwakulinganiza, ko Mulungu adauzako kale mngelo mponi kuti: “Iwepo ndiwe mwana wangu. Lero ine nakhala baba wako”? Komasoti kuti: “Inepano nidzakhale baba wake ndipo iye adzakhale mwana wangu”?
6 Koma pakunena va nthawe yomwe adzatumize pomwe mwana wake woyamba kubadwa muyo padziko yapasi, iye wanena kuti: “Angelo wose wa Mulungu amugwadire.”
7 Ndipo pakunena va angelo, iye ati: “Achitisa kuti angelo wake akhale wamphanvu ndipo achitisa atumiki wake kukhala ninge moto wangandanganda.”
8 Koma ponena va Mwana wake, iye ati: “Mulungu ni mpando wako wachifumu mpakana kalekale ndipo Ufumu wako udzatonge mwachilungamo.
9 Umbakonda chilungamo ndipo umbaipidwa na kusabvera malamulo. Ndipomwapa Mulungu, Mulungu wako, adakudzodza na mafuta ya chikondwerero chikulu kuposha mafumu yanzako.”
10 Iye ankunena pomwe kuti: “Ambuya, pakuyamba mudakhazikisa fundasau ya dziko yapasi, ndipo kudzulu ni basa ya manja yanu.
11 Vinthu vimwevi vidzamale, koma imwepo mudzakhaleko mpakana kalekale. Molingana na chovala, vose vimwivi vidzamale.
12 Mudzapetepete vinthu vimwevi ninge mkhanjo komasoti ninge chovala ndipo vidzachinjiwe, koma imwepo mudzachinjelini ndipo mudzakhaleko mpakana kalekale.”
13 Koma ko ni mngelo mponi yemwe adamuuzako kuti: “Khala kudjanja yangu yamakulu mpakana nidzaikhe azondi wako kuti akhale chopondapo mapazi yako”?
14 Angelo wose atumikira anango. Mulungu awatumiza kuti akatumikire omwe iye adzawapulumuse.