Kwa Aheberi 10:1-39
-
Ntsembe za nyama zenze zosakwana (1-4)
-
Chilamulo chimbaimira vinthu vabwino (1)
-
-
Ntsembe ya Khrisitu ni yothandiza mpakana kalekale (5-18)
-
Njira inyowani na yamoyo (19-25)
-
Osati tileke kusonkhana pabodzi (24, 25)
-
-
Adawachenjeza pankhani ya kuchimwa mwadala (26-31)
-
Timbakhale olimba ntima na wachikhulupiriro kuti tipirire (32-39)
10 Pakuti Chilamulo chimbandochitira umboni vinthu vabwino vomwe vinkubwera kutsogolo ndipo ni vinthulini chaivo, vingachitiselini omwe atumikira Mulungu kukhala wangwiro pakuphatisa basa ntsembe zomwe apereka mosalekedza gole iriyose.
2 Vidakakhala teno, ko ntsembe mwizo adakalekalini kuzipereka? Adakaleka ndawa vidakakhala kuti wanthu ochita utumiki wopatulika mwawo achenesewa, adakakhalalini pomwe na chikumbuntima chakuti ni ochimwa.
3 Koma mosiyana na vimwevi, gole iriyose ntsembe zimwezi zimbawakumbusa va machimo yawo.
4 Ndawa ni vosakwanisika kuti magazi ya ng’ombe zimuna na mbuzi yachoseretu machimo.
5 Manje padabwera padziko iyi, iye adati: “‘Ntsembe za nyama komasoti ntsembe zinango mulibe kuzifuna, koma mudanikonzera thupi.
6 Ntsembe zoshoka zantero na ntsembe zamachimo mulibe kuzibvuma.’
7 Manje inepano nidati: ‘Onani! Inepano nabwera (mu mpukutu mudanembewa va ine) kudzachita vomwe mufuna, imwepo Mulungu wangu.’”
8 Padanena kuti: “Ntsembe zanyama, ntsembe zoshoka zantero, ntsembe zamachimo komasoti ntsembe zinango mulibe kuzifuna panango kuzibvuma,” zomwe ni ntsembe zoperekewa mobverana na Chilamulo,
9 adanena pomwe kuti: “Onani! Inepano nabwera kudzachita vomwe mufuna.” Ankuchosa chinthu choyamba kuti akhazikise chachiwiri.
10 Tachenesewa na “vofuna” vimwevo, kupitira m’thupi ya Yesu Khrisitu yomwe adaipereka ntsembe kabodzi kokha.
11 Komasoti, wantsembe aliyese aima pamalo yake kuti achite utumiki wopatulika na kupereka ntsembe zibodzibodzi mwizo mobwerezabwereza, zomwe zingachoseretulini machimo.
12 Koma munthu moyu adapereka ntsembe ibodzi ya machimo yomwe ni yothandiza mpakana kalekale, ndipo adakhala kudjanja yamakulu ya Mulungu.
13 Kuyambira nthawe mweyo, akudikhira mpakana pomwe azondi wake adzaikhiwe kuti akhale chopondapo mapazi yake.
14 Pakundophatisa basa ntsembe ibodzi yokha, iye ankuchitisa wanthu omwe ankuchenesewa kukhala wangwiro mpakana kalekale.
15 Nawombo mzimu uchena unkuchitira umboni kwa isepano, ndawa udanena kuti:
16 “‘Pangano yomwe nidzachite nawo ntsiku zimwizo zikadzapita ni iyi: Nidzaikhe malamulo yangu m’mitima yawo ndipo nidzayanembe m’maganizo mwawo,’ wanena teno Yahova.”*
17 Patsogolo pake udanena pomwe kuti: “Ndipo nidzakumbukirelini pomwe machimo yawo komasoti vochita vawo vowonesa kusabvera malamulo.”
18 Manje vimwevi vikakhululukiriwa, ntsembe yamachimo ikhala iribe basa.
19 Ndipomwapa abale, tilimba ntima* nkungena m’malo yochena ndawa ya magazi ya Yesu.
20 Iye ndiye adatifungulira njira mweyi yomwe ni yanyowani komasoti yamoyo ndipo ipitirira nguwo yogwatiza, yomwe ni thupi yake.
21 Pakuti tiri na wantsembe nkulu maninge wonyang’anira nyumba ya Mulungu,
22 naboni tifike kwa Mulungu na ntima wose komasoti tiri na chikhulupiriro chose, ndawa mitima yathu yachenesewa kuti osati tikhale pomwe na chikumbuntima choipa, ndipo mathupi yathu yasambikiwa m’madzi yochena.
23 Naboni tipitirize kulengeza pachena chidikhiro chathu ndipo ayi kuti tigunduzike, ndawa yemwe watipolomisa ni wokhulupirika.*
24 Ndipo naboni tiganizirane* kuti tirimbikisane* pa nkhani yowonesana chikondi komasoti kuchita vabwino.
25 Osati tileke kusonkhana pabodzi, ninge momwe ankuchitira wanthu anango omwe adadjaira kulova kumisonkhano. Koma naboni timbalimbikisane maninge, makamaka manjeuno pomwe munkuwona kuti ntsiku mwiyo inkufendera.
26 Peno tinkuchitira dala machimo patsogolo pakuti tachidziwa kale bwinobwino chonadi, palibe pomwe ntsembe inango yomwe ingaperekewe ndawa ya machimo yathu mwayo.
27 Koma pali chidikhiro chinango chopasa mantha cha chiweruzo, na ukali wogaka moto womwe udzadzonge wanthu mwawo otsutsa.
28 Munthu aliyese yemwe wanyalanyaza Chilamulo cha Mose akufa palibe aliyese womuchitira chifundo, peno wanthu awiri panango atatu apereka umboni.
29 Manje kuli tani munthu yemwe wapondaponda Mwana wa Mulungu, yemwe ankuwona magazi ya pangano yomwe adachenesewa nayo ninge chinthu chiribe na basa, yemwe ankunyoza pomwe mzimu womwe Mulungu awonesera kukoma ntima kukulu? Munthu moyu afunika kulangiwa maninge.
30 Ndawa yakuti tinkumudziwa yemwe adati: “Kubwezera ni kwangu, nidzabwezere ndinepano.” Yemwe adanena pomwe kuti: “Yahova* adzapereke chilango kwa wanthu wake.”
31 Kulangiwa na Mulungu wamoyo ni kopasa mantha.
32 Koma olo nteno, pitirizani kukumbukira ntsiku zakalekale. Pale pamudatambira kugwerewera kochokera kwa Mulungu, mudagumana na mabvuto yakulu.
33 Nthawe zinango mumbanyozewa* komasoti kudzudziwa pagulu ndipo nthawe zinango mumbathandiza wanthu anango omwe ambagumana na mabvuto ninge mwaya.
34 Mumbachitira chifundo wanthu omwe enze mu djeri, ndipo mumbapitiriza kukhala wokondwa podiya kuti vinthu vanu vinkutengewa, pakudziwa kuti munachuma chabwino maninge na chokhalisa.
35 Ndipomwapa, ayi kuleka kukhala wolimba ntima ndawa mudzadalisiwe maninge.
36 Mufunika kumbapirira na kuchita vomwe Mulungu afuna kuti mudzatambire vomwe Mulungu muyo wapolomisa.
37 “Kwasala kanthawe kang’onong’ono” ndipo “yemwe ankubwera afikedi, achebwelini.”
38 “Koma wolungama wangu adzakhale na moyo ndawa ya chikhulupiriro chake” ndipo “peno angabwerere m’mambuyo, inepano ningakondwerelini naye.”
39 Isepano tirilini mu gulu ya wanthu omwe ankubwerera m’mambuyo nkuyenda kukadzongewa, koma ndise wanthu okhala na chikhulupiriro chomwe chingatithandize kudzagumana moyo.
Mawu ya m’nyantsi
^ Onani vakumapeto A5.
^ Panango kuti: “tichita chikanga.”
^ Panango kuti: “wothembeka.”
^ Panango kuti: “tiikhirane nzeru.”
^ Panango kuti: “tipasane mphanvu.”
^ Onani vakumapeto A5.
^ Panango kuti: “mumbafumuliwa.”
