Kwa Aheberi 11:1-40
11 Chikhulupiriro ni kutsimikizira kuti vomwe unkudikhira vidzachitike, ni umboni wowoneka* wakuti vinthu vosawoneka virikodi.
2 Ndawa ya chikhulupiriro, wanthu* wakalekale enze na umboni wakuti Mulungu ankukondwa nawo.
3 Ndawa ya chikhulupiriro, tizindikira kuti mawu ya Mulungu yadachitisa kuti nthawe zosiyanasiyana zikhale m’malo mwake, mwakuti vinthu vowoneka vakhalako kuchokera ku vinthu vosawoneka.
4 Ndawa ya chikhulupiriro, Abele adapereka kwa Mulungu ntsembe yapadzulu kuposha ya Kaini. Ndipo ndawa ya chikhulupiriro, Mulungu adamupasa umboni wakuti wenze wolungama ndawa adatambira mphaso zake. Podiya kuti adafa, iye akupitiriza kuyankhula kupitira mu chikhulupiriro chake.
5 Ndawa ya chikhulupiriro, Inoki adatengewa kuti aleke kufa modzudzika, mwakuti alibe kugumanika kulikose ndawa Mulungu adamutenga.* Akanati kumufulusa, Mulungu adamupasa umboni wakuti ankukondwa naye.
6 Komasoti, palibe chikhulupiriro ni vosakwanisika kukondweresa Mulungu. Ndawa aliyese yemwe afuna kutumikira Mulungu afunika kukhulupirira kuti iye aliko ndipo apereka malipiro kwa wanthu omwe amufagafaga na ntima wose.
7 Ndawa ya chikhulupiriro, Nowa padachenjezewa na Mulungu pankhani ya vinthu vomwe venze vikanati vawoneka, adawonesa kugopa Mulungu ndipo adamanga chingalawa kuti banja yake ipulumukiremo. Ndawa ya chikhulupiriro, adatsutsa dziko ndipo adawonesa kuti ni wolungama ndawa ya chikhulupiriro chimwicho.
8 Ndawa ya chikhulupiriro, Abulahamu padachemerewa, adabvera nkuyenda kumalo yomwe ambadikhira kuyatambira ninge chinthu chomwe adapolomisiwa. Iye adayendadi, olo kuti ambadziwalini komwe ambayenda.
9 Ndawa ya chikhulupiriro, ambakhala ninge mulendo mudziko yomwe adapolomisiwa. Iye ambakhala m’matenti pabodzi na Isaki na Yakobo, omwe Mulungu adawapolomisambo kuti adzawapase dziko.
10 Ndawa ambadikhira thaundi chaiyo, thaundi yomwe Mulungu ndiye adakonza mapulani yake na kuimanga.
11 Ndawa ya chikhulupiriro, Sara nayembo adakhala na mphanvu yokhala na mimba olo kuti wenze adapitirira kale magole yobereka, ndawa ambawona kuti yemwe adamupolomisa ni wokhulupirika.*
12 Ndipomwapa, kuchokera kwa mwamuna m’bodzi, yemwe wenze ninge wakufa, kudabadwa wana azinji ninge nyenyezi zakudzulu komasoti osawerengeka ninge nchenga wa m’mphepete mwa nyanja.
13 Wose mwawa adafa ali na chikhulupiriro, olo kuti mapolomisi mwayo yalibe kukwanirisiwa panthawe yomwe iwo enze na moyo. Koma adayawona yali patali ndipo adayatambira. Adalengeza pomwe pachena kuti iwo enze alendo komasoti wanthu osakhalisa mudziko mwiyo.
14 Ndawa wanthu omwe alengeza vinthu vimwevi apereka umboni wakuti ankufagafaga mwakhama malo yawoyawo.
15 Koma adakakhala kuti ambandoganizira komwe adachokera, adakachigumana chifukwa chakuti abwererere.
16 Koma manje akufunisisa malo yabwino maninge yomwe ni yakudzulu. Ndipomwapa Mulungu achitalini manyazi kuchemerewa kuti Mulungu wawo, ndipo wawakonzera thaundi.
17 Ndawa ya chikhulupiriro, pomwe Abulahamu adayesewa, venze ninge wapereka kale Isaki ntsembe. Ndipomwapa munthu moyu yemwe adatambira mapolomisi mokondwa, wenze wokonzeka kupereka ntsembe mwana wake yemwe wenze m’bodzi yekha.
18 Wenze wokonzeka kuchita vimwivo podiya adauziwa kuti: “Mbadwa zomwe nidakupolomisa zidzachokere mwa Isaki.”
19 Koma ambadziwa kuti akafa, Mulungu ali na mphanvu zomumukisa. Mwakuti Mulungu adamubwezeradi mwana wake muyo ndipo vimwevi vimbaimira vinthu vinango vam’tsogolo.
20 Ndawa ya chikhulupiriro, Isaki nayembo adadalisa Yakobo na Esau, ndipo adawauza vomwe vidzachitike m’tsogolo.
21 Ndawa ya chikhulupiriro, Yakobo padasala pang’ono kumwalira, adadalisa wana amuna wa Yosefe m’bodzi na m’bodzi, ndipo patsogolo pake adatumikira Mulungu ali tsamire mpsyimbo yake.
22 Ndawa ya chikhulupiriro, Yosefe padasala pang’ono kufa, adafotokoza va kufuluka kwa Aizirayeli, ndipo adapereka malangizo* yofotokoza va mabonzo* yake.
23 Ndawa ya chikhulupiriro, Mose padabadwa, azibereki wake adamubisa kwa minyezi yatatu, ndawa adawona kuti mwana muyo wenze wokhuza. Iwo alibe kugopa lamulo ya mpfumu.
24 Ndawa ya chikhulupiriro, Mose padakula adalamba kuchemerewa mwana wa mwana nkazi wa Farao,
25 ndipo adasalula kudzudziwa pabodzi na wanthu wa Mulungu, m’malo mochita machimo nkukondwa kwa nthawe ing’ono.
26 Iye adachita vimwevi ndawa ambawona kuti kunyozeka kwake ninge Wodzodzewa kuli ninge chuma chodula maninge kuposha chuma cha ku Iguputo, ndawa ambaganizira maninge malipiro yomwe adzatambire.
27 Ndawa ya chikhulupiriro adachoka ku Iguputo, koma osati ndawa yogopa mpfumu. Iye adapitiriza kupirira modekha ninge ankuwona Wosawoneka.
28 Ndawa ya chikhulupiriro, iye adachita Pasika ndipo adamwaza magazi pamafelemu kuti mngelo wa Mulungu osati aphe wana wawo oyamba kubadwa.
29 Ndawa ya chikhulupiriro, wanthu wa Mulungu mwawo adayambuka pa Nyanja Ifuwira pali pouma ninge pamtunthu, koma Aiguputo padayesa kupita, nyanja mwiyo idawamiza.
30 Ndawa ya chikhulupiriro, mpanda wa Yeriko udagwa wanthu padayenda mouzungulira kwa ntsiku 7.
31 Ndawa ya chikhulupiriro, Rahabi hule ire ilibe kuphewa pabodzi na wanthu osabvera, ndawa iye adatambira bwino wanthu omwe ambayendeza thaundi mwaire.
32 Ko nipereke pomwe vitsanzo vinango? Nthawe inkunichepera kuti nipitirize kufotokoza va Gidiyoni, Baraki, Samisoni, Yefita, Davide komasoti Samueli na aneneri anango.
33 Ndawa ya chikhulupiriro, wanthu mwawa adawina mafumu pankhondo, adachita chilungamo, adapolomisiwa vinthu vinango ndipo adafunga pakamwa pa mphondolo.
34 Alibe kupsa na moto, alibe kuphewa na chibemba, enze ofoka koma adapasiwa mphanvu, adamenya nkhondo mwamphanvu komasoti adathamangisa magulu ya nkhondo.
35 Akazi adatambira wanthu wakufa omwe adamukisiwa. Koma wanthu anango adadzudziwa ndawa alibe kubvuma kusiya chikhulupiriro chawo kuti amasuliwe. Iwo adachita vimwevi kuti adzamukisiwe pa kumuka kwabwino maninge.
36 Anango adagumana na mabvuto ndawa adanyozewa komasoti kukwapuliwa. Kuingizira pamwapo adamangiwa komasoti kufungiriwa mudjeri.
37 Adamenyewa na minyala, adayesewa, adagwatiwa pakati, adaphewa na chibemba komasoti adafambafamba alivale vikumba va nkhosa na vikumba va mbuzi. Ambasowa vinthu, ambadzudziwa ndipo ambagumana na mabvuto yanango.
38 Iwo enze wabwino maninge, osafunikira kukhala mudziko ninge mweyi. Adafambafamba mu vipululu, m’mapiri, mu mphako na m’madindi yapadziko yapasi.
39 Koma olo kuti wose mwawa Mulungu adawapasa umboni wakuti akukondwa nawo ndawa ya chikhulupiriro chawo, alibe kuwona kukwanirisiwa kwa polomisi mweyo.
40 Viriteno ndawa Mulungu adawoneratu chinthu chabwino maninge chakuti awapase, kuti iwo osati akhale wangwiro palibe isepano.
Mawu ya m’nyantsi
^ Panango kuti: “wosatsutsika.”
^ Panango kuti: “azibereki wathu.”
^ Mawu yake chaiyo, ni yakuti “adamufulusa.” Vimwevi vinkuwonesa momwe Inoki adafera ndipo panango Mulungu adamufulusa panango kumuthawisa kuti afe mwantendere m’malo mwakuti achite kuphewa na wanthu.
^ Panango kuti: “wothembeka.”
^ Panango kuti: “lamulo.”
^ Panango kuti: “mafupa.”
