Kwa Aheberi 12:1-29
12 Manje, pakuti tazunguliriwa na gulu ikulu tene ya mboni, nabonimbo titaye cholemera chirichose na chimo yomwe itikasha mosashupa. Ndipo tithamange mopirira mpikisano moyu watangena.
2 Tichite vimwevi pomwe tinkunyang’anisisa Yesu yemwe ni Mtumiki Nkulu na Wokwanirisa chikhulupiriro chathu. Ndawa yodziwa kuti adzakondwe kutsogolo, adapirira muti wodzudzikirapo.* Iye alibe kuikhira nzeru kuti vochitisa manyazi vimuchitikire ndipo manjeuno wakhala kudjanja yamakulu ya mpando wachifumu wa Mulungu.
3 Ndipomwapa ganizirani maninge va munthu yemwe adapirira mayankhulidwe yonyoza mwaya ya wanthu wochimwa, omwe pakuyankhula vimwevo ambandozidzonga wokha. Ganizirani va munthu moyu kuti osati munete nkubwerera m’mambuyo.
4 Pakulimbana na chimo mweyi, sikuti mwamenya nkhondo mpakana kufika pa kufa.
5 Ndipo mwayebweratu malangizo yokudandaulirani ninge yomwe baba auza wana wake kuti: “Mwana wangu, ayi kunyozera chilango cha Yahova,* panango kupunthuka* pomwe ankukutsuula.
6 Ndawa Yahova* alanga aliyese yemwe amukonda, ndipo akwapula aliyese yemwe iye amuwona kuti ni mwana wake.”
7 Mufunika kupirira kuti mupfunzisiwe. Mulungu ankuchita namwe vinthu ninge wana wake. Ni mwana wanyi yemwe ababa wake amulangizalini?
8 Koma peno mulibe kutambira chilango chomwe tose tifunika kutambira, ndiye kuti ndimwe wana wa munthu munango, osati wana wake chaiwo.
9 Ababa wathu wotibereka ambatilanga ndipo timbawalemekeza. Manje kuli tani Ababa wathu wa moyo wathu wauzimu? Ko tifunikalini kuwabvera maninge kuposha pamwapa kuti tikhale na moyo?
10 Ndawa ababa wathu mwawo wotibala, adatilanga kwa kanthawe kang’onong’ono mobverana na vomwe ambaviwona kuti ni vabwino, koma Mulungu atilanga kuti vinthu vitifambire bwino nakuti tikhale wochena ninge iye.
11 Ni shuwadi kuti palibe chilango chomwe chikomedza panthawe yomwe unkuchitambira, koma chikhala chowawa. Koma patsogolo pake, kwa wanthu omwe apfunzirapo kanthu pa chilango mwicho, chibala chipaso cha ntendere chomwe ni chilungamo.
12 Ndipomwapa limbisani manja yofoka komasoti nkhongono zomwe ziribe mphanvu,
13 ndipo pitirizani kuthamula njira zomwe mapazi yanu yankufambamo kuti chidzo chomwe chapwetekeka osati chichokeretu, koma chipolesewe.
14 Mumbayesese kukhala mwa ntendere na wanthu wose, komasoti kukhala wochena ndawa peno munthu ni wosachena adzawonelini Ambuya.
15 Muwonesese kuti munango osati akangire kutambira kukoma ntima kukulu kwa Mulungu, kuti osati pabule muju wa poizoni nkuyambisa mabvuto komasoti kuchitisa kuti azinji aipisiwe.
16 Muonesese pomwe kuti pagulu yanu osati pakhale wachigololo* panango aliyese wosatembeja vinthu vopatulika ninge Esau, yemwe adapereka udindo wake ninge woyamba kubadwa pouchinjanisa na chakudya chakundodya kabodzi basi.
17 Mukudziwa kuti patsogolo pake, pomwe ambafuna kutambira madaliso, adamulambira. Podiya kuti adayesesa na ntima wose uku ankulira, kuti ababa wake achinje maganizo, viribe kukwanisika.
18 Imwepo mulibe kufika paphiri yomwe mungakwanise kuigumirira, yogaka moto, yokhala na ntambo upsyipa, m’dima ukulu, yomenyewa na mphepo yamphanvu
19 komasoti yomwe padabveka kulira kwa lupenga na mawu ya munango ndipo wanthu padayabva, adakumbira kuti osati awauze pomwe mawu yanango.
20 Ndawa adachita mantha maninge na lamulo yakuti: “Olo nyama iriyose yomwe ingagumirire phiri mwiyo, iphwanyiwe na minyala.”
21 Komasoti, vomwe adawona kumuko venze vopasa mantha maninge mwakuti Mose adati: “Ninkuchita mantha ndipo ninkunjenjemera.”
22 Koma mwafika kuphiri ya Ziyoni na thaundi ya Mulungu wamoyo, Yerusalemu wa kudzulu, komwe kuli angelo azinji maninge,*
23 pansonkhano wawo ukulu. Kumuko kuli pomwe mpingo wa woyamba kubadwa, mpingo wa wale omwe madzina yawo yanembewa kudzulu. Kumuko kuli pomwe Mulungu Woweruza wa wose. Kuli pomwe wolungama omwe ankukhala na moyo mobverana na mphanvu ya mzimu uchena omwe athandiziwa kukhala wangwiro.
24 Kuli pomwe Yesu mkhalapakati wa pangano inyowani, komasoti magazi yomwe yadawaziwa, yomwe yayankhula munjira yabwino maninge kuposha magazi ya Abele.
25 Samalani kuti osati musiye* kumubvera muyo yemwe ankuyankhula. Ndawa peno womwe adalamba kubvera yemwe adapereka chenjezo ya Mulungu padziko yapasi alibe kupulumuka, manje kuli tani isepano? Nasembo tidzapulumukelini tikaleka kubvera yemwe ayankhula ali kudzulu.
26 Panthawe mwiyo, mawu yake yadagunduza dziko yapasi, koma manjeuno wapolomisa kuti: “Nidzagunduze pomwe kudzulu osati dziko yapasi yokha.”
27 Mawu yakuti “nidzagunduze pomwe,” yankuwonesa kuti vinthu vomwe adzavigunduze ivo vidzachosewe ndipo vinthu vimwevi viribe kukonzewa na Mulungu. Adzavichose kuti vomwe vikugunduzikalini visale.
28 Ndipomwapa, pakuti tidzatambire Ufumu womwe ungagunduzikelini, naboni tipitirize kukhala okhulupirika kuti Mulungu apitirize kutiwonesa kukoma ntima kukulu, kuti timbachite utumiki wopatulika munjira yobvumizika, mogopa Mulungu komasoti mwaulemu maninge.
29 Ndawa Mulungu wathu ali ninge moto wodzonga.
Mawu ya m’nyantsi
^ Onani matanthauzo ya mawu yanango.
^ Onani vakumapeto A5.
^ Panango kuti: “kudzimbuka.”
^ Onani vakumapeto A5.
^ Onani matanthauzo ya mawu yanango.
^ Panango kuti: “mamidyau na mamidyau.”
^ Panango kuti “munyalanyaze.”