Kwa Aheberi 13:1-25
13 Pitirizani kukonda abale.
2 Ayi kuyebwa kutambira alendo,* ndawa pakuchita vimwevi, anango adatambira angelo mosadziwa.
3 Mumbakumbukire omwe ali mudjeri ninge kuti mwamangiwa nawo pabodzi. Mumbakumbukire pomwe omwe ankudzudziwa, pakuti imwembo ndimwe wanthu.*
4 Ukwati ukhale wolemekezeka kwa wanthu wose, ndipo pogona pa wanthu wolowolana pakhale posapsyipiziwa, ndawa Mulungu adzaweruze wanthu wochita uhule* na chigololo.
5 Ayi kumbakonda kobiri, koma mumbakhutire na vomwe muli navo panthawe mwiyo. Ndawa Mulungu adati: “Nidzakusiyenilini panango kukutayani olo pang’ono.”
6 Tikhale wolimba ntima maninge ndipo tinene kuti: “Yahova* ndiye yemwe atithandiza. Nidzachitelini mantha. Munthu anganichite chani?”
7 Mumbakumbukire omwe ankukutsogolerani. Mwawa adakupfunzisani mawu ya Mulungu. Ndipo pomwe munkuganizira maphindu yobwera ndawa ya khalidwe yawo, tewedzerani chikhulupiriro chawo.
8 Yesu Khrisitu alibe kuchinja kuyambira dzulo mpakana lero ndipo adzachinjelini mpakana kalekale.
9 Ayi kusokeresewa na vipfunziso vosiyanasiyana vachilendo. Kukoma ntima kwa Mulungu ni komwe kungakuthandizeni kukhala wolimba, osati vakudya. Ndawa wanthu omwe andoganizira vakudya,* viwaphindulisalini.
10 Ise tinaguwa yantsembe yomwe wochita utumiki wopatulika ku chitenti, alibe ulamuliro wakudya va paguwa mwapo.
11 Ndawa nyama zomwe magazi yake, nkulu wa antsembe ambangena nayo m’malo yochena ninge ntsembe ya machimo, ambayenda kukazishoka kunja kwa nsasa.
12 Ndipomwapa nayembo Yesu adayenda kukadzudzikira kunja kwa nsuwo wa thaundi kuti achenese wanthu na magazi yake.
13 Naboni timutewere kunja kwa nsasa muko, uku tinkunyozewa ninge momwe iye adanyozerewa.
14 Ndawa pakali pano tiribe thaundi yokhazikika, koma tinkufunisisa thaundi yomwe inkubwera.
15 Naboni nthawe zose timbatamande Mulungu kupitira mwa Yesu. Kuchita vimwevi kuli ninge ntsembe yomwe tinkupereka kwa Mulungu ndipo tiphatisa basa milomo yathu pakulengeza dzina yake.
16 Komasoti ayi kuyebwa kuchita vabwino na kugawira anango vomwe muli navo, ndawa Mulungu akondwa na ntsembe zateno.
17 Mumbabvere omwe ankukutsogolerani ndipo mumbatewedze mofunisisa malangizo yawo ndawa iwo anyang’anira moyo wanu ndipo adzadawire mulandu. Ndipo mumbachite vimwevo kuti ambaphate basa yawo mokondwa osati modandaula, ndawa akachita teno vingakufambirenilini bwino.
18 Pitirizani kutipempherera, ndawa tinkukhulupirira kuti tiri na chikumbuntima chochena* ndipo tinkufuna kuchita vinthu vose mwachilungamo.
19 Koma makamaka ninkukulimbikisani kunipempherera, kuti nibwerere kumuko mwakankulumize.
20 Manje, Mulungu wantendere yemwe adamukisa nyakabusa nkulu wa nkhosa yemwe ali na magazi ya pangano yosapera, Ambuya wathu Yesu,
21 akupaseni vinthu vose vofunika kuti muchite vomwe iye afuna. Ndipo kupitira mwa Yesu Khrisitu, atithandize kuchita vinthu vomukondweresa. Mulungu atambire ulemerero mpakana kalekale. Ame.
22 Manje abale, ninkukukumbirani kuti mubvesere modekha mawu mwaya yolimbikisa, ndawa kalata yomwe nakunemberani iyi ni italilini.
23 Dziwani kuti m’bale wathu Timoteyo wamasuliwa ndipo peno angabwere manjemanje apa, nibwere naye pabodzi pakudzakuwonani.
24 Muniperekere moni kwa wanthu wose omwe ankukutsogolerani na kwa wochena anango wose. Abale wa ku Itália kuno ankukupasani moni.
25 Kukoma ntima kukulu kwa Mulungu kukhale namwe mose imwepo.
Mawu ya m’nyantsi
^ Panango kuti: “kuwonesa chifundo kwa wanthu omwe muwadziwalini.”
^ Mabaibolo yanango yanena kuti, “ninge kuti imwembo munkubonera nawo pabodzi.”
^ Onani matanthauzo ya mawu yanango.
^ Onani vakumapeto A5.
^ Kutanthauza malamulo pankhani ya vakudya.
^ Panango kuti: “chabwino.”
