Kwa Aheberi 2:1-18
2 Ndipomwapa, vinthu vomwe tidabva tifunika kuviganizira maninge kuposha momwe tichitira kale, kuti osati titengeke pang’onopang’ono nkusiya chikhulupiriro.
2 Ndawa peno mawu yomwe angelo adanena yenzedi yazedi, ndipo chilango chidaperekewa mwachilungamo pa chimo iriyose na kusabvera kulikose,
3 manje tidzapulumuke tani peno tinyalanyaza tene chipulumuso chikulu? Ambuya wathu ndiwo adayamba kunena va chipulumuso chimwechi ndipo wanthu omwe adamubva adatsimikizira vimwevo.
4 Nayembo Mulungu adachitira umboni va chipulumuso chimwechi pakuphatisa basa vizindikiro, vinthu vodabwisa, basa zamphanvu zosiyanasiyana komasoti mzimu uchena womwe adaupereka mobverana na vomwe iye afuna.
5 Dziko yapasi yomwe inkubwera, yomwe isepano tikunena, alibe kuipereka kwa angelo kuti aitonge.
6 Koma pa malo yanango pagumanika mawu yomwe mboni inango idanena kuti: “Munthu ni mbani kuti mumbamuganizire, panango mwana wa munthu ni mbani kuti mumbamusamalire?
7 Mudamuchepesa pang’ono pakulinganiza na angelo. Mudamuvazika ulemerero na ulemu ninge chisote chachifumu ndipo mudamuikha kuti ambatonge basa za manja yanu.
8 Mwaikha vinthu vose pasi pa mapazi yake.” Pakuti Mulungu adaikha vinthu vose pasi pa Mwana wake, ndiye kuti palibe chirichose chomwe adachisiya osachiyikha pasi pa Mwana muyo. Koma olo nteno, manjeuno tinkuwonalini kuti vinthu vose viri pasi pake.
9 Koma tinkuwona Yesu, yemwe adamuchepesa pang’ono pakulinganiza na angelo. Manjeuno amuvazika ulemerero na ulemu ninge chisote chachifumu ndawa yakuti adafa. Ndawa ya kukoma ntima kukulu kwa Mulungu, vimwevi vidamuchitikira kuti alawe impfa m’malo mwa munthu aliyese.
10 Vinthu vose vidakhalako kuti vipereke ulemerero kwa Mulungu komasoti vidakhalako kupitira mwa iye. Ndipomwapa, kuti athandize wana azinji kukhala na ulemerero, venze vofunika kuti achitise Ntumiki Nkulu wachipulumuso chawo kukhala wangwiro ndawa ya mabvuto yomwe adagumana nayo.
11 Ndawa wose, wochenesa na mwawo omwe achenesewa, achokera kwa m’bodzi. Ndipomwapa iye achitalini manyazi kuwachemera kuti “abale” wake,
12 pomwe ankunena kuti: “Nidzalengeze dzina yake kwa abale wangu. Nidzakutamandeni pakuimba nyimbo pakati pa mpingo.”
13 Komasoti pomwe ankunena kuti: “Inepano nidzamuthembe.” Komasoti kuti: “Onani! Inepano na wana omwe Yahova* wanipasa.”
14 Pakuti “wana” wose mwawo ni wamagazi na mnyompfu, iyembo adakhala wamagazi na mnyompfu. Adachita vimwevi kuti kupitira mu impfa yake, adzonge Ndyerekezi, yemwe ananjira yobweresera impfa.
15 Adachita pomwe vimwevi kuti amasule wose omwe enze mu ukapolo moyo wawo wose ndawa yogopa impfa.
16 Ndawa sikuti iye ankuthandiza angelo, koma ankuthandiza mbadwa za Abulahamu.
17 Ndipomwapa venze vofunika kuti iye akhale ninge “abale” wake pa vinthu vose, kuti akhale nkulu wa antsembe wachifundo na wokhulupirika pa vinthu va Mulungu, na cholinga chakuti apereke ntsembe yobisa machimo ya wanthu kuti tibverane pomwe na Mulungu.
18 Pakuti iye adabonera pomwe angayesewa, akwanisa kuthandiza wanthu omwe ankuyesewa.
Mawu ya m’nyantsi
^ Onani vakumapeto A5.
