Kwa Aheberi 3:1-19
3 Ndipomwapa, abale wathu ochena, omwe muli mu gulu ya wanthu ochemerewa kudzulu, ganizirani va Yesu, ntumi na nkulu wa antsembe yemwe tinkumubvuma.
2 Iye wenze wokhulupirika kwa Mulungu yemwe adamuikha kukhala ntumi na nkulu wa antsembe, ninge momwe Mose wenzere wokhulupirika mu nyumba yose ya Mulungu.
3 Yesu ankufunika kupasiwa ulemerero ukulu kuposha Mose, ndawa womanga nyumba akhala wolemekezeka kuposha nyumba mweyo.
4 Nishuwadi kuti nyumba iriyose idachita kumangiwa na munthu, koma yemwe adakonza vinthu vose ni Mulungu.
5 Mose wenze ntumiki wokhulupirika m’nyumba yose ya Mulungu ndipo utumiki wake muyo wenze umboni wa vinthu vomwe vidzanenewe kutsogolo.
6 Koma Khrisitu wenze mwana ndipo ambanyang’anira nyumba ya Mulungu mokhulupirika. Ise tidzakhale nyumba ya Mulungu muyo tikapitiriza kukhala na ufulu wa kuyankhula komasoti kuphata mwamphanvu chidikhiro chomwe tikondwa nacho mpakana mapeto.
7 Ndipomwapa, mobverana na vomwe mzimu uchena ukunena kuti: “Lero mukabva mawu ya Mulungu,
8 ayi kuumisa mitima yanu ninge momwe vidakhalira panthawe yomwe azibereki wanu adanikalipisa maninge, ninge mwevenzere pantsiku yomwe adaniyesa muchipululu.
9 Muchipululu mumo, azibereki wanu adaniyesa podiya kuti enze adawona basa zangu kwa magole 40.
10 Ndipomwapa nidanyantsiwa na m’badwo muyo, ndipo nidati: ‘Mitima yawo yasokera nthawe zose ndipo njira zangu ankuzidziwalini.’
11 Pamwapo nidalumbira niri wokalipa kuti: ‘Adzangenelini mu mpumulo wangu.’”
12 Chenjerani abale kuti pakati panu, munango osati achoke kwa Mulungu wamoyo nkukhala na ntima woipa ulibe chikhulupiriro.
13 Koma, pitirizani kulimbikisana ntsiku na ntsiku, nthawe iriyose yomwe mukuti: “Lero,” kuti mphanvu yonamiza ya uchimo osati iumise ntima wa aliyese wa imwepo.
14 Ndawa tichita nawo pabodzi vomwe Khrisitu ankuchita, peno vinthu vomwe timbathemba pakuyamba taviphata mwamphanvu mpaka mapeto.
15 Pale Malemba yanena kuti: “Lero mukabva mawu ya Mulungu, ayi kuumisa mitima yanu ninge momwe vidakhalira panthawe yomwe azibereki wanu adanikalipisa maninge.”
16 Ko pale ni mbani yemwe adabva koma nkukalipisa Mulungu? Ko ni wanthulini wale wose omwe adabula mu dziko ya Iguputo motsogolerewa na Mose?
17 Komasoti, ko Mulungu adanyantsiwa na mbani kwa magole 40? Ko niwanthulini wale omwe adachimwa, omwe adafera muchipululu?
18 Manje ko adalumbirira mbani kuti adzangenelini mu mpumulo wake? Ko niwalelini omwe alibe kumubvera?
19 Ndipomwapa, tinkuwona kuti adakakwanisalini kungena mu mpumulo muyo ndawa yakuti enze alibe chikhulupiriro.
