Kwa Aheberi 4:1-16
4 Ndipomwapa, pakuti polomisi yongena mu mpumulo wake idakalipo, samalani kuchitira kuti munango pa imwepo angakangire kukwanirisa vofunika kuti akangene mu mpumulo muyo.
2 Ntontholo wabwino udalalikiriwa kwa isepano, ninge momwe adaulalikirira kwa azibereki wathu. Koma mawu yomwe iwo adabva alibe kuphindula nayo, ndawa enze alibe chikhulupiriro cholingana na cha omwe adabvera mawu mwayo.
3 Isepano omwe tawonesa chikhulupiriro tinkungenadi mu mpumulo muyo. Pakunena va mpumulo muyo iye adati: “Pamwapo nidalumbira niri wokalipa kuti: ‘Adzangenelini mu mpumulo wangu,’” podiya kuti wenze adamaliza basa zake panthawe yomwe dziko imbakhazikisiwa.
4 Pakunena va ntsiku ya 7, pa malo yanango panamawu yomwe iye adanena kuti: “Ndipo Mulungu adapuma pa basa zake zose pa ntsiku ya 7.”
5 Manjeuno ankunena pomwe kuti: “Adzangenelini mu mpumulo wangu.”
6 Manje pakuti mwayi wongena mu mpumulo muyo udakalipo, ndipo omwe enze woyamba kubva ntontholo wabwino alibe kungenamo ndawa ya kusabvera,
7 paidapita nthawe, Mulungu adanena mu salimo ya Davide, ninge momwe tanenera kale mu kalata mweyi kuti: “Lero mukabva mawu ya Mulungu, ayi kuumisa mitima yanu.” Ndipomwapa wapatula ntsiku yomwe ankuichemera kuti, “Lero.”
8 Ndawa adakati Yoswa adawangenesa m’malo ya mpumulo, Mulungu adakanenalini pomwe patsogolo pake va ntsiku inango.
9 Ndipomwapa, mpumulo wa satade udakalipo kwa wanthu wa Mulungu.
10 Munthu yemwe wangena mu mpumulo wa Mulungu, ndiye kuti wapumula pomwe pa basa zake, ninge momwe Mulungu adapumulira pa basa zake.
11 Manje, naboni tichite vose vatingakwanise kuti tingene mu mpumulo muyo, na cholinga chakuti munango osati akhale wosabvera ninge azibereki wathu mwawo.
12 Ndawa mawu ya Mulungu ni yamoyo komasoti ni yamphanvu, ndipo ni yakuthwa kuposha chibemba chirichose chakuthwa kosekose. Yalasa munthu muntima mpaka kulekanisa moyo na mzimu* komasoti mabonzo na mafuta ya m’mabonzo. Mawu ya Mulungu yakwanisa pomwe kuzindikira vomwe munthu ankuganiza na volinga va ntima wake.
13 Palibe cholengewa chomwe Mulungu angakwaniselini kuchiona. Ndawa kwa iye vinthu vose viri powonekera ndipo akwanisa kuviwona bwinobwino mwakuti isepano tidzadawire kwa Mulungu muyo pa vochita vathu.
14 Ndipomwapa, pakuti tiri na nkulu wa antsembe wapadzulu, Yesu Mwana wa Mulungu, yemwe adayenda kudzulu, naboni tipitirize kulengeza vakuti timukhulupirira.
15 Ndawa nkulu wa antsembe yemwe tiri naye uyu, ni nkululini wa antsembe yemwe angaleke kutibvera ntsisi pa vofoka vathu. Koma ni nkulu wa antsembe yemwe adayesewa pa vinthu vose ninge isepano, ndipo adapitiriza kukhala alibe uchimo.
16 Ndipomwapa, naboni timbafike ku mpando wachifumu wa Mulungu ndipo timbapemphere na ufulu wa kuyankhula kuti atichitire chifundo komasoti kutiwonesa kukoma ntima kukulu pa nthawe yake.
Mawu ya m’nyantsi
^ Onani matanthauzo ya mawu yanango.