Kwa Aheberi 5:1-14
5 Nkulu wa antsembe aliyese wotengewa pakati pa wanthu, aikhiwa kuti ambaphate basa ya Mulungu m’malo mwa wanthu, kuti ambapereke mphaso na ntsembe zobisa machimo.
2 Akhala wodekha akambachita vinthu na wanthu omwe adziwalini chinthu komasoti ophonya, ndawa iyembo anavofoka vake.
3 Ndipo ndawa ya vimwevo, afunika kupereka ntsembe za machimo yake, ninge momwe aperekerambo ntsembe za machimo ya wanthu anango.
4 Munthu atambiralini ulemu moyu mwakufuna kwake, koma achita kupasiwa na Mulungu ninge momwe adachitira Aroni.
5 Ndimo mwaviririmbo na Khrisitu. Iye alibe kudzipasa yekha ulemerero pakudziikha yekha kukhala nkulu wa antsembe. Koma yemwe adamupasa ulemerero muyu ndiye adamuuza kuti: “Iwepo ndiwe mwana wangu. Lero ine nakhala baba wako.”
6 Ninge momwe vinkufotokozerewa pomwe pamalo yanango kuti: “Iwepo ndiwe wantsembe mpakana kalekale, molingana na untsembe wa Melekizedeki.”
7 Pomwe Khrisitu wenze padziko iyi, adapereka mapemphero yogwigwirira na yokumbira kwa yemwe adakakwanisa kumupulumusa ku impfa. Adapereka mapemphero mwaya mokuwa komasoti ankulira, ndipo adamubvera ndawa ambagopa Mulungu.
8 Olo kuti wenze Mwana wa Mulungu, adapfunzira kubvera ndawa ya mabvuto yomwe adagumana nayo.
9 Ndipo padakhala wangwiro, wenze na udindo wopulumusa mpakana kalekale wanthu wose omwe amubvera,
10 ndawa wasankhuliwa na Mulungu kuti akhale nkulu wa antsembe wolingana na untsembe wa Melekizedeki.
11 Tiri na vizinji vakuti tinene pankhani ya moyu, koma vinkushupa kuvifotokoza ndawa yakuti imwepo muchebwa kubvesa vinthu.
12 Pakufika pano mumbafunika kumbakwanisa kupfunzisambo anango. Koma virilini teno, ndipo mukufunika pomwe munango kuti akupfunziseni mpfundo zoyambirira za m’mawu yopatulika ya Mulungu, kuyambira kumayambiriro. Imwepo mwayamba pomwe kufuna nkaka, osati chakudya chotampfuna.
13 Aliyese yemwe andopitiriza kumwa nkaka adziwalini mawu ya chilungamo ndipo adakali kamwana.
14 Koma chakudya chotampfuna ni cha wanthu akulu mwauzimu, omwe akwanisa kusiyanisa vabwino na voipa ndawa yakuti aphatisa basa buya yawo yoganiza.
