Kwa Aheberi 6:1-20
6 Manje pakuti tamaliza kupfunzira mpfundo zoyambirira zonena va Khrisitu, naboni tiyesese mwakhama kuti tikhale akulu mwauzimu. Osati tichite kuyambira pomwe fundasau, yomwe ni kulapa basa zakufa, kukhulupirira Mulungu,
2 chipfunziso chonena va ubatizo, kudalisa,* kumuka kwa akufa na chiweruzo chosapera.
3 Mulungu akabvuma, tiyesesedi kuti tikule mwauzimu.
4 Pali wanthu omwe Mulungu adawavunikira, omwe adatambirako mphaso yafovolo yakudzulu, omwe adatambira mzimu uchena
5 komasoti omwe adabvako mawu yabwino ya Mulungu na madaliso yomwe yadzaperekewe padziko yomwe inkubwera.
6 Koma manje wanthu mwawa adagwa ndipo ni vosakwanisika kuwamusa pomwe kuti alape, ndawa ankumanika kachiwiri Mwana wa Mulungu ndipo ankumunyoza pachena.
7 Dothi itambira madaliso kuchokera kwa Mulungu ikamwa madzi ya nvula yomwe igwera padothi mwiyo kawirikawiri. Patsogolo pake ibulisa vomera vomwe vithandiza womwe ailima.
8 Koma ikabulisa minga na vitsamba vomwe vilasa, ilambiwa ndipo ikhala pang’ono kutembererewa. Mapeto yake ishokewa.
9 Koma olo kuti tinkuyankhula tene, tinkukaikiralini kuti pa nkhani ya vinthu vobweresa chipulumuso, imwepo abale wathu wapamoyo muli pabwino kusiyana na wale omwe adagwa.
10 Ndawa Mulungu ni wolungama ndipo angayebwelini basa yanu na chikondi chomwe mudachiwonesa pa dzina yake, pakutumikira wochena ndipo mukupitiriza kuwatumikira.
11 Koma tinkufuna kuti mose imwepo mupitirize kuwonesa khama yomwe mwenze nayo pakuyamba, kuti chidikhiro chanu chikhale chotsimikizika mpakana mapeto.
12 Muchite vimwevi kuti osati mukhale waulesi, koma mumbatewedzere wanthu omwe, ndawa ya chikhulupiriro na kudekha, ankutambira vinthu vomwe Mulungu adapolomisa.
13 Pomwe Mulungu adapolomisa Abulahamu, adalumbira pa dzina yake ndawa penze palibe munango nkulu kuposha iye yemwe adakamulumbirira.
14 Iye adati: “Shuwadi nidzakudalise ndipo nidzawandise mbadwa zako.”
15 Pamwapo Abulahamu padawonesa kudekha, adatambira polomisi mweyi.
16 Ndawa wanthu polumbira atomola munango nkulu kuposha iwo, ndipo lumbiro yawo imalisa kugegedzana kulikose ndawa lumbiro mwiyo itsimikizira mwalamulo vomwe munthu wanena.
17 Molingana na vimwevi, Mulungu adafuna kutsimikizira wanthu wotambira polomisi mwiyo kuti vomwe akufuna vingachinjelini. Ndipomwapa adachita kulumbira pa vinthu vimwevo vomwe adapolomisa.
18 Adachita vimwevo kuti pa vinthu viwiri vosachinjika, vomwe ndawa ya vimwevi ni vosakwanisika kuti Mulungu aname, isepano omwe tathawira kumalo yotetezeka tilimbikisiwe nkumbakhulupirira maninge vinthu vomwe tinkudikhira.
19 Chidikhiro chathu chimwichi chiri ninge ndangula* ya moyo wathu ndipo ni chotsimikizika komasoti chokhazikika. Chidikhiro chimwechi chitingenesa nkati, kuseri kwa nguwo yogwatiza
20 komwe Yesu, yemwe ni wokonza njira adangena ndawa ya isepano. Iye ni nkulu wa antsembe mpakana kalekale molingana na untsembe wa Melekizedeki.
Mawu ya m’nyantsi
^ Panango kuti: “kuikha manja.”
^ “Ndangula” ni chinthu chomwe achimangirira ku barko ndipo achithusa pasi pa nyanja kuti barko ikaimirira ileke kugwinyiwa na mphepo.
