Kwa Aheberi 7:1-28
7 Melekizedeki moyu wenze mpfumu ya thaundi ya Salemu komasoti wantsembe wa Mulungu Wam’dzulum’dzulu, ndipo adachunguzira Abulahamu pangachoka kukapha mafumu ndipo adamudalisa.
2 Abulahamu adamupasa chakhumi cha vinthu vose. Dzina yake mweyi itsumbudzuliriwa kuti: “Mpfumu Yachilungamo” komasoti mpfumu ya Salemu, kutanthauza “Mpfumu Yantendere.”
3 Pakuti wenze alibe ababa na amayi, wenze alibe ndandanda ya azibereki ndipo ntsiku yomwe adabadwa komasoti yomwe adamwalira inkudziwikalini, koma adamuchitisa kuti alingane na Mwana wa Mulungu, iye ni wantsembe mpakana kalekale.
4 Ndipomwapa mungawone kuti munthu moyu wenze wofunika maninge. Mwakuti m’bereki wathu Abulahamu, adamupasa chakhumi pa vinthu vabwino maninge vomwe adatenga kunkhondo.
5 Shuwadi mobverana na Chilamulo, wana amuna wa Levi omwe adapasiwa udindo wa untsembe, adalamuliwa kuti ambatambire vakhumi kuchokera kwa wanthu. Wanthu mwawa enze abale wawo podiya kuti abale wawo mwawo enze mbadwa za Abulahamu.
6 Koma munthu moyu, yemwe alibe kuchokera pa ndandanda yobadwira ya Levi adatambira chakhumi kuchokera kwa Abulahamu, ndipo adadalisa Abulahamu muyo yemwe adatambira mapolomisi kuchokera kwa Mulungu.
7 Ndipomwapa palibe angatsutse kuti mng’ono adadalisiwa na nkulu.
8 Alevi angatambira vakhumi ndipo ni wanthu wakuti ambafa. Koma munthu munango yemwe adatambira vakhumi, Malemba yamuchitira umboni kuti ali moyo.
9 Tinganene pomwe kuti Levi yemwe ambatambira vakhumi adapereka vakhumi kupitira mwa Abulahamu.
10 Ndawa Levi wenze akanati wabadwa pomwe m’bereki wake Abulahamu adagumana na Melekizedeki, koma wenze wakuti adzakhale mbadwa ya Abulahamu muyo.
11 Kukhala na antsembe wa dzinza ya Levi kwenze mbali ya Chilamulo cha Mose chomwe Aizirayeli adapasiwa. Manje vidakakhala kuti antsembe wa dzinza ya Levi angathandize wanthu kukhala wangwiro, ko padakafunika pomwe wantsembe ninge Melekizedeki? Ko vidakakhalalini vokwana kundokhala na wantsembe ninge Aroni?
12 Pakuti untsembe muyo unkuchinjiwa, ndiye kuti Chilamulombo chifunika kuchinja.
13 Munthu yemwe ankufotokozewa pamwapa ni wadzinza inango ndipo palibe aliyese wa dzinza mwiyo yemwe adatumikirako paguwa yantsembe.
14 Tose tinkudziwa kuti Ambuya wathu adachokera mu dzinza ya Yuda koma Mose alibe kunenako kuti antsembe adzachokere mu dzinza mweyi.
15 Vimwevi vinkubveka bwino manje ndawa pabwera wantsembe munango wolingana na Melekizedeki.
16 Iye wakhala wantsembe, osati mobverana na malamulo, yomwe yathemba vinthu vapadziko yapasi, koma mobverana na mphanvu ya moyo womwe ungadzongekelini.
17 Ndawa Malemba yadamuchitira umboni kuti: “Iwepo ndiwe wantsembe mpakana kalekale molingana na untsembe wa Melekizedeki.”
18 Ndipomwapa malamulo yoyamba mwayo yankuchosewa ndawa ni yosakwana komasoti ni yosathandiza.
19 Chilamulo chichitisalini chinthu chirichose kukhala changwiro. Koma chidikhiro cha vinthu vabwino chomwe adabweresa, chomwe chikutithandiza kufenderera Mulungu, chidachita vimwevi.
20 Komasoti vimwevi viribe kuchitika palibe lumbiro.
21 (Ndawa pali amuna anango omwe akhala antsembe palibe lumbiro, koma moyu wakhala wantsembe pakuchita kumulumbirira. Lumbiro mweyi ni ya yemwe adanena va wantsembe muyo kuti: “Yahova* walumbira kuti: ‘Iwepo ndiwe wantsembe mpakana kalekale,’ ndipo adzachinjelini nzeru.”)
22 Mobverana na vimwevi, Yesu wakhala chinthu chotsimikizira pangano yabwino maninge.
23 Komasoti pambafunika antsembe azinji ongena m’malo ndawa impfa imbachitisa kuti munthu osati apitirize kukhala wantsembe.
24 Koma pakuti iye adzakhale na moyo mpakana kalekale, palibe wantsembe yemwe adzamungene m’malo.
25 Ndipomwapa iye angakwanise kupulumusa wanthu omwe ankupemphera kwa Mulungu mu dzina yake, ndawa adzafelini ndipo ambawagwigwiririre kwa Mulungu.
26 Tifunikadi nkulu wa antsembe moyu ndawa yakuti ni wokhulupirika, yemwe aphonyalini, wosaipisiwa, wosiyana na wanthu ochimwa ndipo wakwiziwa padzulu maninge.
27 Mosiyana na akulu wa antsembe anango, iye afunikalini kuyamba wapereka ntsembe za machimo yake ntsiku iriyose, patsogolo pake nkupereka ntsembe za wanthu anango. Viri teno ndawa iye adadzipereka kabodzi kokha kuti akhale ntsembe yothandiza wanthu mpakana kalekale.
28 Chilamulo chiikha amuna omwe ni ofoka kukhala akulu wa antsembe. Koma mawu ya lumbiro yomwe yadanenewa patsogolo pa Chilamulo, yadaikha Mwana yemwe adakhala wangwiro mpakana kalekale.
Mawu ya m’nyantsi
^ Onani vakumapeto A5.
