Kwa Aheberi 9:1-28
9 Pangano yoyamba ire, yenze na malamulo yake ya utumiki wopatulika komasoti malo yake yochena ya padziko yapasi.
2 Ndawa padamangiwa chipinda choyamba cha chitenti ndipo muchipinda mumo mwenze choikhapo kandyero, meza na mikate yowonesa kwa Mulungu, ndipo chimbachemerewa kuti “Malo Yochena.”
3 Koma kuseri kwa nguwo yogwatiza yachiwiri, kwenze pomwe chipinda chinango chochemerewa kuti “Malo Yochena Maninge.”
4 Mumo mwenze chiweye* cha golide chofukizira ntsembe na likasa ya pangano yokukutidziwa na golide. Mu likasa mumo mwenze mtsuko wokhala na mana, mpsyimbo ya Aroni yomwe idaphukira maluwa ire komasoti minyala yosema ya pangano.
5 Padzulu pa likasa mwiyo penze akerubi waulemerero omwe vibvulibvuli vawo vimbafika pa chogwanankhirira. Koma ino ni nthawelini yofotokoza vinthu vimwevi chirichose pachokha-pachokha.
6 Vinthu vimwivi pavidakonzewa tene, nthawe na nthawe wantsembe ambangena muchipinda choyamba kukachita utumiki wopatulika.
7 Koma muchipinda chachiwiri mwicho, nkulu wantsembe yekha ndiye ambangenamo kabodzi kokha pa gole, ndipo ambangenalini alibe kutenga magazi. Magazi mwayo ambayapereka ndawa ya iye komasoti ndawa ya machimo ya wanthu yomwe ambayachita mosadziwa.
8 Ndipomwapa mzimu uchena utithandiza kubvesa bwino kuti njira yoyendera kumalo yochena yenze ikanati kuwonekera panthawe yomwe chitenti choyamba mwicho chenze chikalipo.
9 Chitenti chimwicho chenze chifaniziro cha nthawe ino ndipo mobverana na chifaniziro chimwicho, mphaso na ntsembe viperekewa. Koma olo kuti viri teno, vinthu vimwevi vichitisalini kuti munthu yemwe ankuchita utumiki wopatulika muyo akhale na chikumbuntima chochena.
10 Koma vindophata basa pa vakudya, vakumwa na miyambo yosiyanasiyana yochenesa vinthu na madzi. Vimwivo venze vofunika mobverana na malamulo yonena va thupi ndipo adavikhazikisa mpaka nthawe yokonza pomwe vinthu.
11 Koma olo nteno, pomwe Khrisitu adabwera ninge nkulu wa antsembe wa vinthu vabwino vomwe vakwanirisiwa, adapita na muchitenti chikulu na changwiro maninge chomwe chiribe kukonzewa na manja ya wanthu, kutanthauza kuti chigumanikalini padziko iyi.
12 Iye adangena m’malo yochena na magazi yake, osati na magazi ya mbuzi panango ya ng’ombe zimuna zing’onozing’ono. Adangena kabodzi kokha m’malo yochena mwayo ndipo adatipulumusa mpakana kalekale.
13 Ndawa peno magazi ya mbuzi na ya ng’ombe imuna komasoti dotha ya ng’ombe ikazi,* vomwe ambawaza navo wanthu opsyipiziwa vimbawachenesa mpakana kukhaladi ochena pamaso pa Mulungu,
14 kuli tani magazi ya Khrisitu, yemwe adadzipereka alibe chilema kwa Mulungu kupitira mwa mzimu uchena? Ko magazi mwayo yadzacheneselini vikumbuntima vathu ku basa zakufa, kuti tichite utumiki wopatulika kwa Mulungu wamoyo?
15 Ndipomwapa iye ni mkhalapakati wa pangano inyowani kuti wanthu omwe achemerewa atambire polomisi ya moyo wosapera. Vimwevi vakwanisika ndawa ya impfa yake, yomwe yenze ninge malipiro yowamasula ku machimo yomwe iwo enze nayo mu pangano yakale ire.
16 Pomwe pali pangano, pafunika pomwe kuti munthu wochita naye pangano muyo afe.
17 Ndawa pangano iphata basa peno munango wafapo, pakuti iphatalini basa peno munthu wochita naye pangano muyo ali na moyo.
18 Ndipomwapa olo pangano yoyamba ire iribe kukhazikisiwa palibe magazi.
19 Mose akauza wanthu wose mwawo lamulo iriyose ya m’Chilamulo, ambatenga magazi ya n’gombe zing’onozing’ono zimuna, magazi ya mbuzi komasoti madzi nkuwaza bukhu mwiyo na wanthu wose pophatisa basa ukuse wa nkhosa wofuwira maninge na tumiti twa hisope.
20 Iye ambawauza kuti: “Mwaya ni magazi ya pangano yomwe Mulungu wakulamulani kuti muisunge.”
21 Ndipo adawaza pomwe magazi yale pachitenti na vombo vose vophatira basa yopatulika.
22 Mobverana na Chilamulo, pafupifupi vinthu vose vichenesewa na magazi ndipo palibe kukhesa magazi, wanthu angakhululukiriwelini machimo yawo.
23 Ndipomwapa venze vofunika kuti vifaniziro vakudzulu vichenesewe mwanjira mweyi. Koma vinthu vakudzulu chaivo vimbafunika kuchenesewa na ntsembe zabwino kuposha zimwizi.
24 Khrisitu alibe kungena m’malo yochena yokonzewa na manja ya wanthu yomwe ni chifaniziro cha malo chaiyo, koma adangena kudzulu chaiko. Manjeuno iye ali kudzulu kuti ambawonekere pamaso pa Mulungu m’malo mwa isepano.
25 Iye alibe kuyenda kudzulu kumuku kuti ambakadzipereke ntsembe mobwerezabwereza ninge momwe nkulu wa antsembe achitira. Pale nkulu wa antsembe angena m’malo yochena gole iriyose ali takule magazi ya nyama, osati yake.
26 Vidakakhala teno, adakabonera mobwerezabwereza kuyambira pomwe dziko idakonzewa. Koma manje iye waonekera kabodzi kokha pamapeto ya nthawe ino kuti achose uchimo kupitira mu ntsembe yake.
27 Molingana na vomwe vichitikira wanthu kuti adikhira kufa kabodzi basi, patsogolo pake nkudzatambira chiweruzo,
28 nayembo Khrisitu adaperekewa ntsembe kabodzi kokha kuti atakule machimo ya wanthu azinji. Nthawe yachiwiri yomwe adzawonekere, adzawonekerelini na cholinga chakuti achose machimo. Ndipo omwe adzamuwone ni wanthu omwe ankumudikhirira na ntima wose kuti adzawapulumuse.
Mawu ya m’nyantsi
^ Panango kuti: “chiwaya.”
^ Panango kuti: “ng’ombe ikazi yomwe ikanati yaberekako.”
