Kwa Akolose 1:1-29
1 Inepano Paulo, ntumi wa Yesu Khrisitu mwa kufuna kwa Mulungu, niri pabodzi na Timoteyo m’bale wathu.
2 Ninkunembera wochena na abale wokhulupirika omwe ali wobverana na Khrisitu ku Kolose kuti:
Mulungu Ababa wathu akupaseni kukoma ntima kukulu na ntendere.
3 Nthawe zose tikambakupemphererani, titembeja Mulungu, Ababa wa Ambuya wathu Yesu Khrisitu.
4 Tichita vimwevi ndawa tidabva chikhulupiriro chanu mwa Yesu Khrisitu komasoti va chikondi chomwe munkuwonesa kwa wochena wose
5 ndawa ya chidikhiro chakudzatambira vinthu vomwe akusungirani kudzulu. Mudabva va chidikhiro chimwechi m’mambuyo umu pomwe mudabva ntontholo wa chonadi, womwe ni ntontholo wabwino
6 womwe udafika kwa imwepo. Ntontholo wabwino unkubala vipaso komasoti kufalikira padziko yose. Vimwevi ndivo vomwe vakhala vinkuchitikambo kwa imwepo kundoyambira pantsiku yomwe mudabva na kudziwa bwinobwino va kukoma ntima kukulu kwa Mulungu komwe ni chaiko.
7 Vimwevi ndivo vomwe mudapfunzira kwa Epafura, kapolo munzathu wapamoyo, yemwe ni ntumiki wokhulupirika wa Khrisitu m’malo mwa isepano.
8 Iye ndiye adatidziwisa pomwe va chikondi chanu chomwe mudachiwonesa mothandiziwa na mzimu wa Mulungu.
9 Ndipomwapa isembo kundoyambira pantsiku yomwe tidabva vimwevo, tiribe kuleka kukupemphererani. Takhala tinkukumbira kuti mudziwe bwinobwino vomwe Mulungu afuna komasoti kuti mukhale na nzeru zose nakuti mumbabvese vinthu vauzimu.
10 Tachita vimwevi na cholinga chakuti mukhale na khalidwe yobverana na vomwe Yahova* afuna, kuti mumbamukondwerese pa chirichose, pomwe munkupitiriza kubala vipaso pa basa iriyose yabwino na kuingizira kumudziwa bwinobwino Mulungu.
11 Tinkukumbira pomwe kuti mutambire mphanvu zikulu mobverana na mphanvu zake zochitisa mantha, na cholinga chakuti mukwanise kupirira vinthu vose modekha komasoti mokondwa,
12 ndipo mumbatembeje Ababa womwe adachitisa kuti mukhale woyenerera kutambira nawo vinthu va ochena omwe ali mukugwerewera.
13 Iye adatipulumusa ku ulamuliro wa mdima, nkutifulusira mu ufumu wa Mwana wake wapamoyo.
14 Kupitira mwa Mwana wake muyo, tidamasuliwa na malipiro ndipo machimo yathu yakhululukiriwa.
15 Iye ni chifaniziro cha Mulungu yemwe awonekalini, woyamba kubadwa wa chilengedwe chose.
16 Kupitira mwa iye, Mulungu adalenga vinthu vinango vose kudzulu na pa dziko yapasi. Adalenga vinthu vowoneka na vinthu vosawoneka, peno ni mipando yachifumu, ambuya, maboma komasoti maulamuliro. Inde, adalenga vinthu vinango vose kupitira mwa iye komasoti ndawa ya iye.
17 Komasoti iye wenzeko kale vinthu vinango vose vikanati kukhalako ndipo vinthu vinango vose vidakhalako kupitira mwa iye.
18 Iye ni msolo wa thupi, yemwe ni mpingo. Iye ni poyambira, woyamba kubadwa kuchokera kwa akufa, kuti adzakhale woyamba pa vinthu vose.
19 Viri teno ndawa yakuti Mulungu vidamukondweresa kuti makhalidwe yake yose yakhale mwa Khrisitu.
20 Komasoti kuti kupitira mwa mwana wake muyo abveranise pomwe vinthu vinango vose na iye, peno ni vinthu va padziko yapasi panango vakudzulu. Adachita vimwevi pokhazikisa ntendere kupitira m’magazi yomwe Khrisitu adakhesa pa muti wodzudzikirapo.*
21 Shuwadi, imwepo omwe kalekale mwenze kutali na Mulungu komasoti mwenze azondi wake ndawa maganizo yanu yenze pabasa zoipa,
22 manje wayamba pomwe kubverana namwe kupitira mu impfa ya mwana wake yemwe adapereka thupi yake ya nyama na cholinga chakuti akuperekeni pamaso pa Mulungu muyo, muli wopatulika na mulibe chilema komasoti mulibe chifukwa chokunenerani voipa.
23 Koma munkufunika kupitiriza kukhala mobverana na chikhulupiriro chanu, muli wokhazikika pa fundasau,* muli wolimba komasoti muli wosagunduzika pa chidikhiro cha ntontholo wabwino womwe mudabva, womwe ulalikiriwa pomwe padziko yose. Inepano Paulo nidakhala ntumiki wa ntontholo wabwino moyu.
24 Manje ninkukondwa na mabvuto yomwe ninkugumana nayo ndawa ya imwepo. Ndipo inembo ninkuwona kuti nikanati nadzudzika mokwana ninge chidzo cha thupi ya Khrisitu, yomwe ni mpingo.
25 Nidakhala mtumiki wa mpingo moyu mobverana na udindo womwe Mulungu adanipasa wakuti nilalikire mawu ya Mulungu mokwana, kuti imwepo muphindule.
26 Mawu mwayo yankuphatanidzapo chintsintsi chopatulika chomwe dziko iribe kuchidziwa komasoti chenze chobisika kwa mibadwo yakalekale. Koma manjeuno chaululiwa kwa wochena wake.
27 Mulungu vidamukondweresa kuululira wochena pakati pa wanthu wa makhaindi yanango chintsintsi chopatulika chimwechi, chomwe chinaulemerero uzinji komasoti chuma chauzimu. Chintsintsi chimwechi ni Khrisitu yemwe ni wobverana na imwepo, kutanthauza kuti munachidikhiro chodzatambira ulemerero pabodzi na Khrisitu muyo.
28 Tikulengeza, kuchenjeza na kupfunzisa munthu aliyese va iye mu nzeru zose, kuti tipereke munthu aliyese kwa Mulungu ali wolimba mwauzimu mobverana na Khrisitu.
29 Kuti nikwanise kuchita vimwevi, ninkuphata basa mwakhama ndipo ninkuyesesa maninge pakuthemba mphanvu zake zomwe zinkuphata basa mwamphanvu mwa inepano.
Mawu ya m’nyantsi
^ Onani matanthauzo ya mawu yanango.
^ Onani matanthauzo ya mawu yanango.
^ Panango kuti: “maziko.”
