Kwa Akolose 2:1-23
2 Ninkufuna kuti mudziwe mabvuto yakulu yomwe ninkugumana nayo ndawa ya imwepo na wanthu wa ku Laodikaya komasoti ndawa ya wanthu wose omwe akanati kuniwonako maso na maso.
2 Ninkuchita vimwevi kuti mitima yawo yalimbikisiwe komasoti kuti wose akhale obverana mu chikondi nakuti atambire chuma chomwe chibwera ndawa yobvesa bwino vinthu, palibe kukaikira chilichose, na cholinga chakuti adziwe bwinobwino chintsintsi chopatulika cha Mulungu, chomwe ni Khrisitu.
3 Chuma chose chobverana na nzeru komasoti kudziwa vinthu chidabisiwa mwa iye mosamala.
4 Ninkunena vimwevi kuti munthu aliyese aleke kukupusisani na mpfundo zomwe afotokoza pakufuna kuti mutengeke.
5 Olo kuti nililini kumuko, nikupitiriza kuganizira va imwepo. Nakondwa kubva kuti muchita vinthu mwadongosolo komasoti kuti munachikhulupiriro cholimba mwa Khrisitu.
6 Manje pakuti mukhulupirira Yesu Khrisitu Ambuya wathu, pitirizani kufamba mobverana naye.
7 Mobverana na vomwe mudapfunzira, chikhulupiriro chanu mwa Khrisitu chikhale na mizu yolimba, chipitirize kukula ndipo chikhale cholimba komasoti nthawe zose mumbatembeje Mulungu.
8 Samalani kuti munango osati akuyeseni kapolo,* pakuphatisa basa nzeru za wanthu na vinthu vilibe chilungamo, mobverana na miyambo ya wanthu komasoti mpfundo zomwe wanthu wamudziko iyi aphatisa basa, osati mobverana na Khrisitu,
9 ndawa iye anamakhalidwe yose ya Mulungu.
10 Munkusowalini kanthu kalikose ndawa ya iye, yemwe ni msolo wa boma iliyose na ulamuliro uliwose.
11 Pakuti munaye pa ushamwali mudachitiwa mdulidwe ndipo mdulidwe muyo wenzelini wochitiwa na manja ya wanthu koma udachitika pamudavula thupi yauchimo, ndawa mdulidwe wa atumiki wa Khrisitu ndimo mwaulili.
12 Vili teno ndawa mudaikhiwa naye pabodzi m’manda pakubatiziwa ubatizo wolingana na wake. Ndipo pakuti munaye pa ushamwali komasoti mukhulupirira vinthu vomwe Mulungu yemwe adamumukisa kwa akufa adakonza na mphanvu zake, mudamukisiwa naye pabodzi.
13 Kuingizira pamwapo, olo kuti mwenze wakufa ndawa ya machimo yanu komasoti ndawa yakuti mwenze osachitiwa mdulidwe, Mulungu adakupasani moyo kuti mukhale wobverana na Khrisitu. Pakuti Iye ni wabwino ntima adatikhululukira machimo yathu yose
14 ndipo adapfudza* Chilamulo chomwe chenze na malamulo yazinjizinji yomwe yambatitsutsa. Iye adachichosa pakuchikhomerera pamuti wodzudzikirapo.*
15 Pakuphatisa basa muti wodzudzikirapo* muyo, iye adavula maboma na olamulira nkuwasiya ali pezi* ndipo adawawonesa pachena kuti wanthu wose awone kuti wawawina nkumbafamba nawo ninge wadjeri.
16 Ndipomwapa ayi kubvuma kuti munthu aliyese akuweruzeni ndawa ya chakudya na chakumwa panango chikondwererombo chinango olo ndawa ya kusunga ntsiku yomwe mwezi unyowani wawoneka panango kusunga satade.
17 Vinthu vimwevi vimbandowonesa vinthu vomwe vimbabwera kutsogolo, koma vinthu chaivo vidakwanirisiwa na Khrisitu.
18 Ayi kubvuma kuti munthu aliyese yemwe akomedzewa na kudzichepesa konamanama komasoti kutumikira angelo akukangiseni kudzatambira malipiro. “Munthu wateno angingimira” vinthu vomwe wawona ndipo maganizo yake yochimwa yamuchitisa kuti ambadzikwize palibe chifukwa chobveka.
19 Ankutewedzeralini Khrisitu yemwe ni msolo, yemwe kupitira mwa iye, thupi yose igumana vose vomwe ifunikira ndipo vidzo vake ni volumatidzana bwino na madjowini yake komasoti uzingo ndipo ipitiriza kukula mothandiziwa na Mulungu.
20 Peno mudafa pabodzi na Khrisitu ndipo munkutewedzalini pomwe mpfundo zomwe wanthu wamudziko iyi aphatisa basa, ndawa chani mukupitiriza kukhala ninge mudakali mbali ya dziko mweyi, pakubvera pomwe malamulo yakuti:
21 “Ayi kutenga ichi, panango ayi kulawidza ichi, panango osagumirira ichi”?
22 Malamulo mwaya yakunena va vinthu vomwe vimala munthu akaviphatisa basa ndipo ni malamulo na vinthu vomwe wanthu apfunzisa.
23 Podiya kuti vinthu vimwevo viwoneka ninge ni vanzeru, amwawo omwe avichita asankhula okha njira yopempherera. Iwo adzudza thupi yawo kuti wanthu ambawawone kuti ni odzichepesa. Koma vimwevo ni vosathandiza kwa munthu yemwe ankulimbana na vomwe thupi yake ifuna kuchita.
Mawu ya m’nyantsi
^ Panango kuti: “chosenzekesa.”
^ Panango kuti: “adachosa.”
^ Onani matanthauzo ya mawu yanango.
^ Onani matanthauzo ya mawu yanango.
^ Panango kuti: “chadje.”
