Kwa Akolose 3:1-25
3 Koma olo kuti viri teno, peno mudamukisiwa pabodzi na Khrisitu, pitirizani kufagafaga vinthu vakudzulu komwe Khrisitu wakhala kudjanja yamakulu ya Mulungu.
2 Pitirizani kuganizira vinthu vakudzulu, osati vinthu va padziko yapasi.
3 Ndawa mudafa ndipo moyo wanu wabisiwa pabodzi na Khrisitu yemwe ni wobverana na Mulungu.
4 Khrisitu, yemwe ni moyo wathu akadzawonesa mphanvu zake, imwembo mudzawonese naye pabodzi mphanvu zanu mu ulemerero.
5 Ndipomwapa chitisani vidzo va thupi yanu padziko yapasi kukhala vakufa ku chigololo,* vinthu vopsyipiza, chilakolako chomwe chilamulirikalini cha kugonana, kulakalaka vinthu voipa komasoti dyera yomwe ni kutumikira mafano.
6 Mulungu adzawonese ukali wake kwa wanthu omwe ankuchita vimwevi.
7 Imwepombo mumbachita vimwevo pomwe mumbakhala na moyo wolingana na wanthu mwawo.
8 Koma manje munkufunika kuleka kuchita vose vimwevo. Muleke kukalipa, kuchita chiya, kuipa ntima, kuyankhula mawu yopweteka, ndipo pakamwa panu ayi kuti pambabule nkhani zotukwana.
9 Ayi kumbanamizana. Vulani umunthu wakalekale pabodzi na basa zake,
10 ndipo muvale umunthu unyowani womwe Mulungu apereka. Umunthu moyu ni wobverana na vomwe Mulungu afuna. Manje pamunkumudziwa bwino Mulungu, pitirizani kuchitisa umunthu wanu kukhala unyowani.
11 Mukachita teno, padzakhalelini Mgiriki panango Muyuda, wochitiwa mdulidwe panango wosachitiwa mdulidwe, mulendo, Msukuti,* kapolo panango munthu yemwe ni kapololini, ndawa Khrisitu achita vinthu vose ndipo isepano ndise obverana naye.
12 Ndipomwapa ninge wanthu ochita kusankhuliwa na Mulungu, ochena na wapamoyo, wonesani* chifundo chikulu, kukoma ntima, kudzichepesa, kupfatsa na kudekha.
13 Pitirizani kupirirana na kukhululukirana na moyo wose podi peno munango anachifukwa chodandaulira va munzake. Molingana na momwe Yahova* adakukhululukirani na moyo wose, imwembo mumbachite chibodzibodzi.
14 Koma kuingizira pa vose vimwevi, wonesani* chikondi, ndawa chibveranisa wanthu mwamphanvu maninge kuposha chinthu chirichose.
15 Komasoti bvumani kuti ntendere wa Khrisitu utonge m’mitima mwanu, ndawa mudachemerewa ku ntendere moyu ninge vidzo va thupi ibodzi. Ndipo wonesani kuti ndimwe otembeja.
16 Mawu ya Khrisitu yaphate basa mwa imwepo ndipo yakupaseni nzeru zose. Pitirizani kupfunzisa na kulimbikisana na masalimo, nyimbo zotamanda Mulungu komasoti nyimbo zauzimu zotembeja. Pitirizani kuimbira Yahova* m’mitima yanu.
17 Chirichose chomwe munkuchita mu mawu panango mu basa, mumbachite vose mudzina ya Ambuya Yesu, ndipo mumbatembeje Mulungu Ababa kupitira mwa iye.
18 Imwepo akazi, mumbabvere amuna wanu, ndawa vimwevi ni vofunika kwa wanthu otewera Ambuya.
19 Imwepo amuna, pitirizani kukonda akazi wanu ndipo ayi kumbawakalipira maninge.
20 Imwepo wana, mumbabvere azibereki wanu pa vinthu vose ndawa vimwevi vikondweresa Ambuya.
21 Imwepo ababa, ayi kumbakalipisa wana wanu kuti aleke kukhala okwinyirira.
22 Imwepo akapolo, mumbabvere wanthu omwe ni mabwana yanu pa vinthu vose, osati pokhapokha peno iwo ankukuonani pakundofuna kukondweresa wanthu, koma mwachilungamo komasoti mogopa Yahova.*
23 Chirichose chomwe munkuchita, mumbachichite na moyo wanu wose ninge kuti munkuchitira Yahova,* osati wanthu,
24 ndawa munkudziwa kuti malipiro yomwe mudzatambire ni madaliso yochokera kwa Yahova* yomwe adakusungirani. Tumikirani Ambuya wanu Khrisitu ninge akapolo.
25 Shuwadi, omwe ankuchita vophonyeka adzalangiwe ndawa ya vophonyeka mwivo vomwe ankuchita, ndawa Mulungu akonderalini.
Mawu ya m’nyantsi
^ Mu Chigriki ni porneía.
^ “Msukuti” wenze munthu yemwe alibe kupfunza.
^ Panango kuti: “valani.”
^ Onani matanthauzo ya mawu yanango.
^ Panango kuti: “valani.”
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
