Kwa Akolose 4:1-18
4 Imwepo wanthu omwe ndimwe mabwana, mumbachitire akapolo wanu vinthu vachilungamo na vabwino, ndawa munkudziwa kuti imwembo muli na Ambuya wanu kudzulu.
2 Mumbalimbikire kupemphera. Mukhale maso pankhani ya kupemphera ndipo mumbatembeje.
3 Komasoti mumbatipemperere isepano kuti Mulungu atifungulire nsuwo kuti tikwanise kulalikira mawu na kuyankhula va chintsintsi chopatulika chofotokoza va Khrisitu, chomwe chidachitisa kuti nimangiwe nkukhala mudjeri muno,
4 kuti nidzalalikire va chintsintsi chimwicho mobveka bwino ninge momwe nifunika kuchitira.
5 Pitirizani kuchita vinthu mwanzeru pomwe munkukhala na wanthu omwe atumikiralini Mulungu, ndipo mumbaphatise basa bwino nthawe yanu.*
6 Nthawe zose mawu yanu yambawonese kuti ndimwe wabwino ntima ndipo yambakhale yokoma ninge kuti mwayaikha munyu, kuti mudziwe momwe mungadawirire munthu aliyese.
7 Tukiko yemwe ni m’bale wangu wapamoyo, ntumiki wokhulupirika komasoti kapolo munzangu mwa Ambuya, adzakusimbireni momwe niliri na vomwe vinkunichitikira.
8 Ninkumutumiza kwa imwepo kuti mudziwe momwe tiliri komasoti kuti akulimbikiseni.
9 Abwere pabodzi na Onesimo, m’bale wangu wokhulupirika na wapamoyo, yemwe adachokera kumuko kwanu. Iwo adzakuuzeni vinthu vose vomwe vinkuchitika kuno.
10 Arisitako yemwe nili naye pabodzi mudjeri ati moni mose. Komasoti Maliko m’bale wake wa Baranaba, (yemwe nidakulangizani kuti mumutambire nthawe iliyose akadzafika kwa imwepo),
11 na Yesu yemwe adziwika pomwe kuti Yusito, ati moni. Iwo mwawa ali mu gulu ya wanthu omwe adachitiwa mdulidwe. Mwawa okha ni anyabasa anzangu pa vinthu va Ufumu wa Mulungu ndipo anilimbikisa* maninge.
12 Epafura, yemwe adachokera kumuko kwanu, kapolo wa Yesu Khrisitu, ati moni. Iye akupemphererani mwakhama nthawe zose kuti mupitirize kukhala olimba mwauzimu komasoti kuti osati mumbakaikire olo pang’ono vinthu vose vomwe Mulungu adzachite.
13 Ninkumuchitiradi umboni kuti adzipereka maninge ndawa ya imwepo komasoti ndawa ya abale wa ku Laodikaya na ku Herapoli.
14 Luka, mfulumero wapamoyo, ati moni mose. Dema nayembo akupereka moni.
15 Muniperekere moni kwa abale wa ku Laodikaya komasoti kwa Numfa na mpingo womwe usonkhana panyumba pake.
16 Kalata mweyi mukaiwerenga kumuko kwanu, muitumize kuti ikawerengewembo ku mpingo wa wanthu wa ku Laodikaya, ndipo imwepo mutambirembo yochokera ku Laodikaya nkuiwerenga.
17 Komasoti Arikipo mumuuze kuti: “Uwonesese kuti utumiki womwe udautambira mwa Ambuya unkuukwanirisa.”
18 Manje tambirani moni wangu wonemba nekha na djanja yangu, inepano Paulo. Pitirizani kukumbukira matcheni yomwe animanga nayo kuno kudjeri. Kukoma ntima kukulu kukhale namwe.
Mawu ya m’nyantsi
^ Mawu yake chaiyo ni yakuti: “mumbagule nthawe.”
^ Panango kuti: “anipasa mphanvu.”
