Kwa Aroma 1:1-32
1 Ine Paulo kapolo wa Yesu Khrisitu nidachemerewa kuti nikhale ntumi komasoti nidasankhuliwa kuti nilalikire ntontholo wabwino wa Mulungu.
2 Iye adapolomisa ntontholo moyu kalekale pakuphatisa basa aneneri wake m’Malemba yochena.
3 Ntontholo moyu unena va Mwana wake, yemwe ni mbadwa ya Davide,
4 ndipo Mulungu adamukisa Mwana wake moyu pakuphatisa basa mphanvu ya mzimu wake uchena. Moyu ni Yesu Khrisitu Ambuya wathu.
5 Pakuphatisira basa iye, Mulungu adatiwonesa kukoma ntima kukulu ndipo nidasankhuliwa kukhala ntumi kuti nikathandize wanthu wa makhaindi yose kuti awonese chikhulupiriro, akhale wobvera komasoti kuti alemekeze dzina yake.
6 Pagulu mwiyo ya wanthu wa makhaindi yanango palimbo imwepo womwe mudachemerewa kuti mumbatewere Yesu Khrisitu.
7 Kalata mweyi nanembera imwepo mose wokhala ku Roma omwe mukondewa na Mulungu komasoti mudachemerewa kuti mukhale wochena:
Mukhale na kukoma ntima kukulu komasoti ntendere wochokera kwa Mulungu Ababa wathu na Ambuya wathu Yesu Khrisitu.
8 Chakuyamba, ninkutembeja Mulungu wangu kupitira mwa Yesu Khrisitu ndawa ya mose imwepo, ndawa wanthu padziko yose ankunena va chikhulupiriro chanu.
9 Nthawe zose nikambapemphera nikutomolani m’mapemphero yangu ndipo Mulungu yemwe ninkumuchitira utumiki wopatulika na ntima wangu wose pakulalikira ntontholo wabwino wonena va Mwana wake, ankunichitira umboni.
10 Nimukumbira kuti peno nivokwanisika komasoti peno ankufuna, ulendo uno wokha nibwere kumuko kwanu.
11 Ndawa ninkufunisisa kukuwonani kuti nikupaseni mphaso yauzimu kuti mukhale wolimba,
12 panango kuti nidzalimbikisiwe na chikhulupiriro chanu, namwembo mudzalimbikisiwe na chikhulupiriro changu.
13 Koma abale nikufuna mudziwe kuti kwa nthawe itali nakhala ninkufuna kubwera kumuko kwanu, koma vinkukanga. Ninkufuna nidzaone phindu ya basa yathu yolalikira ninge momwe vinkuchitikira pakati pa wanthu wa makhaindi yanango yose.
14 Inepano ninachikwerete kwa Agiriki na kwa wanthu womwe ni Agirikilini* komasoti kwa wanthu wanzeru na kwa wanthu wopusa.*
15 Ndipomwapa ninkufunisisa kudzalalikira ntontholo wabwino kwa imwembo kumuko ku Roma.
16 Inepano nichitalini manyazi na ntontholo wabwino. Shuwadi, ntontholo moyu ni njira yamphanvu yomwe Mulungu ankuphatisa basa pakufuna kupulumusa aliyese yemwe anachikhulupiriro, kuyambira Ayuda nkudzabwera Agiriki.
17 Pophatisira basa ntontholo wabwino moyu, Mulungu aulula chilungamo chake kwa wanthu womwe anachikhulupiriro. Vikateno, chikhulupiriro cha wanthu mwawo chilimba mobverana na vomwe Malemba yanena kuti: “Koma wolungama adzakhale na moyo ndawa ya chikhulupiriro chake.”
18 Kuchokera kudzulu, Mulungu ankuwonesa ukali wake kwa wanthu wose osagopa Mulungu na ochita voipa omwe ankuchitisa kuti chonadi chileke kudziwika.
19 Viri teno ndawa Mulungu wawapasa umboni wokwanira wowathandiza kuti amudziwe.
20 Kundochokera pomwe dziko idalengewa, makhalidwe ya Mulungu yosawoneka na maso yankuwonekera bwino. Makhalidwe ya Mulungu mwaya, olo mphanvu zake zosamala komasoti Umulungu wake, vinkuwonekera mu vinthu vomwe adakonza mwakuti wanthu mwawo alibe pomwe chifukwa chobveka chosakhulupirira kuti kuli Mulungu.
21 Podiya kuti ambadziwa Mulungu, iwo alibe kumulemekeza ninge Mulungu komasoti alibe kumutembeja. Koma adayamba kuganiza vinthu viribe na basa ndipo mitima yawo yopusa mwayo yadachita mdima.
22 Podiya kuti anena kuti ni wanzeru, iwo ni wopusa.
23 M’malo molemekeza Mulungu yemwe angafelini, iwo alemekeza vifaniziro va wanthu womwe akufa komasoti vifaniziro va mbalani, nyama za minyendo yanayi na nyama zokwawa.
24 Ndipomwapa mobverana na vilakolako va m’mitima mwawo, Mulungu adawasiya kuti achite vonyantsa, kuti achite vochitisa manyazi na mathupi yawo.
25 Chonadi chonena va Mulungu adachinjanisa na bodza ndipo apempherera komasoti kutumikira volengewa m’malo mwa Mulengi yemwe afunika kutamandiwa mpakana kalekale. Ame.
26 Ndawa ya vimwevi Mulungu adawasiya kuti atewedze vilakolako vochitisa manyazi va kugonana, pakuti akazi adasiya njira yachibadwa ya mathupi yawo nkumbachita vosiyana na chibadwa.
27 Venzembo chibodzibodzi kwa amuna. Iwo adasiya njira yachibadwa yofuna akazi nkumbathumisana wokhawokha mwachiwawa na chilakolako choipa, amuna wokhawokha kuchitirana vonyantsa nkutambiriratu malipiro ya kuphonya kwawo.
28 Pakuti angawonalini kuti ni vofunika kudziwa Mulungu molondola, iye adawasiya kuti apitirize kuganiza voipa nkumbachita vinthu vosafunika.
29 Ndipo ambachita vinthu viribe chilungamo va khaindi iriyose, kuipa kulikose, dyera komasoti vinthu vose voipa. Ntima wawo udadzala na djerasi, kupha wanthu, ndewo, chinyengo na njiru. Ambakonda pomwe khokolo
30 komasoti kudjeda anzawo. Ambazondana na Mulungu, enze alibe ulemu, odzikwiza, wodziwonesera, ozonda anzawo, wosabvera azibereki,
31 wosazindikira, womwe asungalini mapangano, alibe chikondi chobadwa nacho komasoti alibe chifundo.
32 Olo kuti wanthu mwawa aidziwa bwino lamulo yolungama ya Mulungu, yakuti omwe achita vinthu vimwevi afunika kuphewa, apitiriza kuvichita. Kuingizira pamwapa, abverana pomwe na wanthu omwe achita vinthu vimwevi.
