Kwa Aroma 10:1-21
10 Abale, vomwe ninkufunisisa mu ntima mwangu komasoti pemphero yangu yogwigwirira kwa Mulungu ni yakuti wanthu wa khaindi yangu apulumusiwe.
2 Ndawa ninkuwachitira umboni kuti ni wodzipereka pa kutumikira Mulungu, koma ankumudziwalini bwinobwino.
3 Ndipo ndawa yosadziwa chilungamo cha Mulungu, iwo alibe kubvera chilungamo chimwicho koma adafuna kutewedza chilungamo chawo.
4 Khrisitu ndiye kumala kwa Chilamulo, kuti aliyese wokhulupirira akhale wolungama.
5 Pale Mose adanemba va momwe munthu angachitire chilungamo mobverana na Chilamulo. Iye adati: “Aliyese yemwe ankuchita vimwevi adzakhale na moyo ndawa ya malamulo.”
6 Koma va chilungamo chomwe chibwera ndawa ya chikhulupiriro, Malemba yanena kuti: “Mu ntima mwako ayi kumbanena kuti: ‘Ko ni mbani yemwe adzayende kudzulu?’ kuti akabuluse Khrisitu.
7 Panango kuti: ‘Ko ni mbani adzayende kuphompho?’kuti akamukise Khrisitu.”
8 Koma ko lemba inena chani? Inena kuti: “Mawu ya chilamulo mwaya yali pafupi na imwepo, yali nkamwa mwanu na mu ntima mwanu,’ mwaya ni mawu ya chikhulupiriro yomwe tinkulalikira.
9 Ndawa peno unkulengeza ‘mawu yomwe yali nkamwa mwako,’ yakuti Yesu ni Ambuya, ndipo mu ntima mwako ukhulupirira kuti Mulungu adamumukisa, udzapulumuke.
10 Kuti munthu akhale wolungama afunika kukhala na chikhulupiriro mu ntima mwake, koma na pakamwa pake alengeza pachena chikhulupiriro chake kuti apulumuke.
11 Pale lemba inango inena kuti: “Palibe wokhulupirira iye yemwe adzakhumudwe.”
12 Palibe kusiyana pakati pa Muyuda na Mgiriki, pakuti kwa wose mwawa Ambuya ni m’bodzi, yemwe apereka mosaumira kwa wose wochemera pa dzina yake.
13 Ndawa “aliyese wochemera padzina ya Yahova* adzapulumuke.”
14 Koma, ko angachemere tani pa dzina yake peno amukhulupiriralini? Angakhulupirire tani peno akanati wabvako va iye? Manje angabve tani va iye akaleka kulalikiriwa?
15 Ndipo angalalikire tani peno alibe kutumiwa? Vili ninge momwe Malemba yanenera kuti: “Mapazi ya wanthu wolengeza ntontholo wabwino wa vinthu vabwino, ni yokhuza maninge.”
16 Olo kuti viriteno, ni woselini womwe adatewedza ntontholo wabwino. Ndawa Yesaya adanena kuti: “Yahova,* ko ni mbani wakhulupirira vomwe adabva kwa ise?”
17 Ndipomwapa, munthu akhala na chikhulupiriro ndawa ya vomwe wabva. Ndipo vomwe wabva ivo vichokera m’mawu yonena va Khrisitu.
18 Koma nibvunze kuti: Ko kubva alibe kubva? Pale “mawu yawo yadabveka padziko yose yapasi, ndipo ntontholo wawo udabveka padziko yose yapasi komwe kuli wanthu.”
19 Komasoti, nibvunze kuti: “Ko nishuwadilini kuti Aizirayeli adadziwa? Choyamba Mose adati: “Nidzakuchitiseni ntsanje pakuphatisira basa wanthu womwe ni Aizirayelilini. Nidzakukalipiseni maninge pakuphatisira basa madzinza yopusa.”
20 Koma Yesaya adayankhula molimba ntima maninge kuti: “Wanthu womwe adanigumana ni wanthu womwe ambanifagafagalini. Nidadziwika kwa wanthu womwe alibe kubvunza va ine.”
21 Koma pakunena va Aizirayeli, iye adati: “Napfuthula manja yangu ntsiku yose kwa wanthu wosabvera komasoti wanthota.”
