Kwa Aroma 11:1-36
11 Manje nibvunze kuti, ko Mulungu adalamba wanthu wake? Neye shuwa. Pale inembo ndine m’bodzi wa Aizirayeli, mbadwa ya Abulahamu, wa dzinza ya Benjamim.
2 Mulungu alibe kulamba wanthu omwe enze woyambirira kuwabvuma. Ko munkudziwalini vomwe lemba inango inena pankhani ya Eliya, pomwe adagwigwirira Mulungu pakutsutsa Aizirayeli? Inena kuti:
3 “Yahova,* iwo apha aneneri wanu ndipo agwesa malo yanu yoperekera ntsembe mwakuti inepano nasala nekhanekha basi. Manje ayamba pomwe kunifagafaga kuti aniphe.”
4 Koma ko Mulungu adamuuza kuti tani? Adamuuza kuti: “Ine nasiya wanthu 7000 omwe nkhongono zawo zikanati kugwadirako Baala.”
5 Ndipomwapa, pa nthawembo ino alipo anango wochepa omwe adasankhuliwa ndawa ya kukoma ntima kukulu.
6 Manje peno adasankhuliwa mwa kukoma ntima kukulu, sikuti adasankhuliwa ndawa ya basa zawo neye. Ndawa vichikhala teno, kukoma ntima kumuko kungakhalelini pomwe kukoma ntima kukulu.
7 Manje viri tani pamwapa? Chomwe Aizirayeli akuchifunisisa alibe kuchigumana, koma wanthu wosankhuliwa ni omwe adachigumana. Anango adaumisa mitima yawo
8 ninge momwe Malemba yanenera kuti: “Mulungu wawapasa mzimu wa tulo tukulu, maso yosawona na matu yosabva, mpakana lero.”
9 Ndipo Davide adanenambo kuti meza yawo ikhale ukhukha, msampha, chokhukhumudwisa na chilango kwa iwo.
10 Maso yawo yachite m’dima kuti yaleke kuwona, ndipo kotamisani misana yawo nthawe zose.”
11 Manje nibvunze kuti, ko adakhukhumudwa mpakana kugweratu? Neye. Koma ndawa ya kuphonya kwawo wanthu wa makhaindi yanango agumana chipulumuso, ndipo vimwevi vachitisa kuti wophonya mwawo achite ntsanje.
12 Kuphonya kwawo kwabweresa chuma m’dziko ndipo kuchepa kwawo kwachitisa kuti wanthu wa makhaindi yanango agumane chuma. Ndipomwapa padzakhale madaliso yazinji chiwerengero chawo chikadzakwana.
13 Manje ninkuyankhula na imwepo wanthu wa makhaindi yanango. Pakuti ndine ntumi wotumiwa kwa wanthu anango, nilemekeza ntumiki wangu,
14 kuti panango ningachitise wanthu wa khaindi yangu kuchita ntsanje nkupulumusako anango pa wanthu mwawo.
15 Ndawa peno dziko yabveranisiwa na Mulungu ndawa yakuti iwo adataiwa, ndiye kuti akadzatambiriwa adzakhale kuti awamukisa.
16 Ndipomwapa, peno mbali yankati yomwe yaperekewa ntsembe ninge chipaso choyambirira iri yochena, ndiye kuti mkate wose ni wochenambo. Ndipo peno muzu uli wochena, ndiye kuti nthawimbo ni zochena.
17 Peno nthawi zinango zidagwatiwa, ndipo peno iwembo ndiwe nthawi ya muti wa maolivi wa m’thengo, udalumatidziwa pakati pa nthawi zosala ndipo udayamba kugumana vose vofunika kuchokera ku muzu wa muti wa maolivi muyo,
18 osati uyambe kudzikuza pakati pa nthawi zomwe zidagwatiwa. Peno unkudzikuza kumbukira kuti ndiwelini yemwe unkutakula muzu, koma muzu ndiye unkutakula iwepo.
19 Panango unkunena kuti: “Adagwata nthawi zinango kuti alumatidzepo inepano.”
20 Vimwevi nishuwadi. Iwo adagwatiwa ndawa enze alibe chikhulupiriro, koma iwepo udakali wolumatidziwa ku muti muyo ndawa ya chikhulupiriro. Chosa maganizo yako mwayo yodzikuza, koma khala na mantha.
21 Ndawa peno Mulungu alibe kulekerera nthawi zachilengedwe, adzakulekelerembolini iwepo.
22 Umbaganizire kukoma ntima komasoti kusalekerera kwa Mulungu. Omwe adagwa adawonesewa kusalekerera, koma iwepo udawonesewa kukoma ntima kwa Mulungu. Nkhasa undopitiriza kuchita vinthu vabwino. Apo neye, iwembo udzagwatiwe.
23 Iwombo peno angayambe kukhala na chikhulupiriro, adzalumatidziwe ku muti muyo, ndawa Mulungu angakwanise kuwalumatidza pomwe.
24 Peno iwepo udagwatiwa ku muti wa maolivi womwe mwachilengedwe umera m’thengo, ndipo mosiyana na chilengedwe ulumatidziwa ku muti wa maolivi wochita kubzaliwa, ko unkuwonalini kuti ni vosashupa kulumatidza nthawi zimwezi ku muti wazene womwe zidagwatiwa?
25 Ndawa abale ninkufunalini kuti muleke kudziwa chintsintsi chopatulika chimwechi, kugopera kuti mungadziwone kuti ndimwe wanzeru. Chintsintsi chimwecho nchakuti anango mu Izirayeli aumisa mitima yawo mpakana chiwerengero chose cha wanthu anango wochokera m’makhaindi yawo kufikira pa kukwana.
26 Aizirayeli wose adzapulumusiwe mwa njira mweyi mobverana na vomwe Malemba yanena kuti: “Mpulumusi adzachokere mu Ziyoni ndipo adzachosere Yakobo vochita vose vosalemekeza Mulungu.
27 Mweyi ni pangano yomwe nidzachite nawo nikadzawachosera machimo yawo.”
28 Nishuwadi kuti iwo ni azondi wa ntontholo wabwino ndipo vimwevi vakuthandizani imwepo. Koma Mulungu adawasankhula ndipo adawakonda ndawa ya azibereki wawo wakale.
29 Mulungu adzadzilingelini ndawa ya mphaso zake komasoti ndawa yakuti adawachemera.
30 Imwepo mwenze wosabvera Mulungu, koma manjeuno mwaonesewa chifundo ndawa ya kusabvera kwawo.
31 Mwawa manjeuno ni wosabvera ndipo Mulungu wakuwonesani chifundo. Koma angakwanise kuwawonesa pomwe chifundo ninge momwe adachitira na imwepo.
32 Mulungu wabvuma wose kuti akhale akapolo wa kusabvera kuti wose mwawo awaonese chifundo.
33 Shuwadi, madaliso yomwe Mulungu apereka ni yazinji maninge. Nzeru zake ni zapadzulu, komasoti iye ni wodziwa vinthu maninge. Viweruzo vake ni voshupa kuvibvesa, ndipo ni mbani angakwanise kuzidziwa bwinobwino njira zake?
34 “Ni mbani ankudziwa maganizo ya Yahova,* panango ni mbani angakhale mulangizi wake?
35 Panango “ni mbani adayambirira kumupasa kanthu, kuti amubwezere?”
36 Ndawa vinthu vose vichokera kwa iye, ndiye adavikonza ndipo ni vake. Ulemerero ukhale wake mpakana kalekale. Ame.
