Kwa Aroma 15:1-33
15 Isepano olimba tifunika kumbaganizira wanthu womwe anachikhulupiriro chofoka, osati kumbandodziganizira tekha.
2 Aliyese wa isepano ambayesese kukondweresa munzake ndipo ambachite vinthu volimbikisa.
3 Ndawa olo Khrisitu alibe kuchita vinthu vodzikondweresa yekha, koma adachita vomwe Malemba yanena kuti: “Choipa cha wanthu womwe ambakunyozani chanigwera.”
4 Vinthu vose vomwe vidanembewa kalekale, vidanembewa kuti vitilangize. Malemba mwaya yatithandiza kupirira komasoti yatilimbikisa na cholinga chakuti tikhale na chidikhiro.
5 Ndipomwapa, Mulungu yemwe atipasa mphanvu kuti tikwanise kupirira komasoti yemwe atinyamalisa, akuthandizeni mose imwepo kukhala na maganizo yomwe Yesu Khrisitu wenze nayo,
6 kuti mose pabodzi komasoti mobverana, mulemekeze Mulungu, Ababa wa Ambuya wathu Yesu Khrisitu.
7 Ndipomwapa mumbatambirane ninge momwe Khrisitu adatitambirira kuti ulemerero uyende kwa Mulungu.
8 Kunena shuwa, Khrisitu adakhala ntumiki wa wanthu wochitiwa mdulidwe kuti atsimikizire kuti Mulungu ni wokhulupirika powonesa kuti mapolomisi yomwe Mulungu adapasa azibereki wawo ni yotsimikizirika.
9 Komasoti kuti wanthu wa makhaindi yanango alemekeze Mulungu ndawa ya chifundo chake mobverana na vomwe Malemba yanena kuti: “Ndipomwapa nidzakulemekezeni pakati pa makhaindi ya wanthu ndipo nidzaimbe nyimbo zotamanda dzina yanu.”
10 Komasoti Malemba yanena kuti: “Imwepo wanthu wamakhaindi yanango, kondwani pabodzi na wanthu wake.”
11 Ndipo yanena pomwe kuti: “Tamandani Yahova* imwepo makhaindi yose ya wanthu ndipo wanthu wose amutamande.”
12 Komasoti Yesaya adati: “Padzakhale muzu wa Jese, munango yemwe adzabule kuti alamulire makhaindi. Chidikhiro cha wanthu anango chidzakhale pa iye.”
13 Mulungu yemwe apereka chidikhiro akuthandizeni kukhala wokondwa maninge komasoti kukhala na ntendere wose pomwe munkumukhulupirira kuti mukhale na chidikhiro champhanvu mothandiziwa na mzimu uchena.
14 Abale wangu, inepano ninkukaikiralini kuti ndimwe wokonzeka kuchita vabwino, mukudziwa vizinji komasoti mungakwanise kupasana malangizo.
15 Olo nteno, nakunemberani mpfundo zinango za sitiriti kuti nikukumbuseni pomwe. Nachita vimwevi ndawa ya kukoma ntima kukulu komwe Mulungu waniwonesa.
16 Adaniwonesa kukoma ntima kumoku kuti niphate basa yolengeza ntontholo wabwino wa Mulungu ninge nyabasa wa Yesu Khrisitu, wotumikira wanthu wa makhaindi yanango. Ninkuphata basa yapadera mweyi kuti wanthu wamakhaindi yanango mwawa akhale ninge ntsembe yobvumizika kwa Mulungu yomwe yachenesewa na mzimu uchena.
17 Ndipomwapa, ninkukondwa kukhala wotewera wa Yesu Khrisitu na kuphata basa ya Mulungu.
18 Nidzayankhulelini chilichose chomwe nachita panekha, koma vire vokha vomwe Khrisitu wachita na kuyankhula pophatisa basa inepano kuti nithandize wanthu wa makhaindi yanango kukhala wobvera.
19 Iwo akhala wobvera ndawa ya vodabwisa vamphanvu, komasoti vizindikiro vomwe mzimu wa Mulungu wachita. Ndipomwapa nalalikira mokwana ntontholo wabwino wonena va Khrisitu kuyambira ku Yerusalemu mpakana ku Iluriko.
20 Pakuchita vimwevi, natsimikiza ntima kuti osati nilengeze ntontholo wabwino komwe wanthu ambadziwa kale va Khrisitu kuchitira kuti ningaphate basa yomwe munthu munango adaiyamba kale,
21 koma nichite mobverana na vomwe Malemba yanena kuti: “Yemwe alibe kuuziwako va iye adzamuwone, ndipo yemwe alibe kubva adzazindikire.”
22 Ndawa ya vimwevi nakhala ninkukangira kubwera kwa imwepo.
23 Koma manje kulibe pomwe dera yomwe nilibe kufikako m’madera mwaya ndipo kwa magole yazinji nakhala ninkufunisisa kufika kwanu kumuko.
24 Ndipomwapa ninachikhulupiriro kuti nikambadzayenda ku Sipaniya nidzawonane namwe ndipo nikadzacheza namwe kwa nthawe ing’ono, mudzaniperekeze pa ulendo wangu moyu.
25 Koma manjeuno nasala pang’ono kuyenda ku Yerusalemu kukatumikira wochena.
26 Abale wa ku Makedoniya na wa ku Akaya apereka mokondwa mphaso kwa wochena anango wa ku Yerusalemu omwe ni wosauka.
27 Nishuwadi kuti achita vimwevo mwa kufuna kwawo, koma olo nteno iwo anachikwerete kwa ochena mwawo. Ndawa peno wanthu wamakhaindi yanango atambirako vinthu vauzimu kuchokera kwa wochena mwawo, ndiye kuti nawombo afunika kutumikira kwa wochena mwawo pakuwapasa vinthu vofunika pamoyo.
28 Ndipomwapa nikakamaliza kuwapasa vopereka vimwevi, nidzapite na kwanu kumuko pakuyenda ku Sipaniya.
29 Komasoti ninkudziwa kuti nikadzafika kwanu kumuko nidzafike na madaliso yazinji yochokera kwa Khrisitu.
30 Ndipomwapa abale, nikukukumbirani kupitira mwa Ambuya wathu Yesu Khrisitu komasoti chikondi cha mzimu, kuti mumbalimbikire kunipempherera kwa Mulungu ndipo nanembo nikulimbikira kupemphera.
31 Tilimbikire kupemphera kuti nikapulumusiwe kwa wanthu wa ku Yudeya omwe akhulupiriralini komasoti kuti wochena wa ku Yerusalemu akatambire bwino mphaso yomwe natakula.
32 Peno Mulungu angabvume, nidzabwere kwa imwepo nili wokondwa ndipo tidzalimbikisane.
33 Mulungu yemwe apereka ntendere akhale namwe mose imwepo. Ame.
Mawu ya m’nyantsi
^ Onani vakumapeto A5.
