Kwa Aroma 16:1-27
16 Ninkufuna kukudziwisani va mulongo wathu Febe, yemwe ankutumikira mu mpingo wa ku Kenkereya.
2 Mutambireni mwa Ambuya ninge momwe mutambirira wochena mwawo, komasoti kumupasa thandizo iliyose yomwe angafunikire. Ndawa iyembo adathandiza abale azinji kuphatanidzapo inepano.
3 Muniperekere moni kwa Akula na Purisika, anyabasa anzangu pakutumikira Yesu Khrisitu.
4 Iwo adaikha moyo wawo pangozi ndawa ya inepano, ndipo ndinelini nekha ninkuwatembeja, koma ankutembejewa pomwe na mipingo yose ya wanthu wa makhaindi yanango.
5 Ninkupereka pomwe moni ku mpingo womwe uchitira misonkhano m’nyumba mwawo. Moni kwa Epeneto wapamoyo wangu, yemwe ni woyambirira kubva va Khrisitu ku Ásia.
6 Moni kwa Mariya yemwe wachita vinthu vizinji pakukuthandizani.
7 Moni kwa Anduroniko na Yuniya, womwe ni azibale wangu komasoti wadjeri anzangu. Amwawa ni amuna wodziwika maninge kwa atumi komasoti akhala wobverana na Khrisitu kwa nthawe itali kuposha inepano.
8 Muniperekere moni kwa Ampiliato, wapamoyo wangu mwa Ambuya.
9 Moni kwa Uribano nyabasa munzangu mwa Khrisitu komasoti wapamoyo wangu Sitaku.
10 Moni kwa Apele, wokhulupirika mwa Khrisitu. Moni kwa wanthu wa m’banja ya Arisitobulo.
11 Moni kwa wachibale wangu Herodiona. Moni kwa wanthu wa m’banja ya Narikiso womwe ni wotewera Ambuya.
12 Moni kwa Turufena na Turufosa, azimayi wophata basa mwakhama pakutumikira Ambuya. Moni kwa Peresida, wapamoyo wathu. Mayi moyu, waphata basa mwakhama pakutumikira Ambuya.
13 Moni kwa Rufu, wosankhuliwa mwa Ambuya. Moni pomwe kwa amayi wake womwe ni amayi wangumbo.
14 Moni kwa Asunkirito, Felego, Heme, Pateroba, Heremase komasoti abale womwe ali nawo pabodzi.
15 Moni kwa Filologo na Yuliya, Nerea na m’bale wake komasoti Olumpa na wochena wose womwe ali nawo pabodzi.
16 Mupasane moni mwachikondi. Mipingo yose ya Khrisitu ikupereka moni.
17 Manje ninkukulimbikisani abale, kuti musamale na womwe ayambisa n’gawikano komasoti kuchita vinthu vokhumudwisa anango. Vimwevi ni vosiyana na vomwe mudapfunzira, ndipomwapa mumbawapewe.
18 Ndawa wanthu wateneuyu ni akapololini wa Ambuya wathu Khrisitu, koma wa mimba zawo. Ndipo aphatisa basa mawu yopumpsa komasoti yalibe chilungamo kuti apusise wanthu wa maganizo yabwino.
19 Wanthu wose akudziwa kuti ndimwe wobvera ndipo ninkukondwa namwe ndawa ya vimwevi. Koma ninkufuna kuti mukhale wanzeru pa vinthu vabwino koma wosadziwa kanthu pa vinthu voipa.
20 Mulungu yemwe apereka ntendere aphwanye Satana pasi pa mapazi yanu manjemanje. Kukoma ntima kukulu kwa Ambuya wathu Yesu kukhale na imwepo.
21 Nyabasa munzangu Timoteyo ankupereka moni, chibodzibodzimbo Lukiyo, Yasoni na Sosipato omwe ni azibale wangu.
22 Inepano Teritio, yemwe nanemba kalata mweyi, ninkupereka moni mwa Ambuya.
23 Gayo, yemwe ninkukhala kumuyi kwake komwe mpingo uchitira misonkhano, ankupereka moni. Nayembo Erasito wonyang’anira thaundi na Kwarito m’bale wake ankupereka moni.
24 * ——
25 Mulungu angakuchitiseni kukhala wolimba pophatisa basa ntontholo wabwino womwe ninkulengeza komasoti ntontholo wonena va Yesu Khrisitu womwe unkulalikiriwa. Ntontholo moyu ni wobverana na vomwe vaululiwa vonena va chintsintsi chopatulika chomwe chakhala chobisika kwa nthawe itali.
26 Koma manjeuno, chintsintsi chimwechi chaululiwa ndipo wanthu wa makhaindi yose achidziwa pophatisa basa Malemba yoneneratu vakutsogolo. Vimwevi ni vobverana na lamulo ya Mulungu yemwe adzakhaleko mpakana kalekale. Cholinga chake ni chakuti wanthu wa makhaindi yose ambamubvere na kukhala wokhulupirika.
27 Kwa Mulungu yekha wanzeru, kukhale ulemerero mpakana kalekale kupitira mwa Yesu Khrisitu. Ame.
Mawu ya m’nyantsi
^ Onani vakumapeto A3.
