Kwa Aroma 3:1-31
3 Ko kukhala Myuda kunaubwino uponi, panango mdulidwe unaphindu yanyi?
2 Ubwino wake ni uzinji. Chakuyamba, mawu yopatulika ya Mulungu yadaikhiwa m’manja mwa Ayuda.
3 Manje tani peno anango enze wosakhulupirika? Ko kusowa chikhulupiriro kwawo muko kunkutanthauza kuti Mulungu ni wosakhulupirikambo?
4 Neye. Podiya kuti munthu aliyese akhale wabodza, Mulungu angapitirize kuwonesa kuti anena chaivo mobverana na vomwe Malemba yanena kuti: “Mukambayankhula, muyankhula vachilungamo kuti muwine pomwe munkutongewa.”
5 Koma peno kusowa chilungamo kwathu kuwonesa bwino kuti Mulungu ni wachilungamo, manje tinene kuti chani? Ko tinganene kuti Mulungu alibe chilungamo akambawonesa ukali wake? (Ninkuyankhula ninge momwe ayankhulira anango.)
6 Neye! Manje Mulungu akaleka kuchita teno, ko dziko adzaiweruze tani?
7 Koma peno ndawa ya bodza yangu chonadi cha Mulungu chawonekera maninge ndipo vimwivo vamubweresera ulemerero, ndawa chani ninkuweruziwa ninge wochimwa?
8 Nilekere chani kunena vomwe anango atinamizira kuti tinena kuti: “Naboni tichite voipa kuti pakhale vinthu vabwino”? Wanthu omwe anena vimwevi adzaweruziwe mobverana na chilungamo.
9 Manje ko vikatene Ayuda ise tiri pabwino kuposha anango? Neye shuwa. Ndawa ninge momwe tanenera kale, Ayuda komasoti Agiriki, wose atongewa na uchimo
10 mobverana na vomwe Malemba yanena kuti: “Palibe munthu wolungama olo m’bodzi.
11 Palibe yemwe ali wozindikira olo pang’ono komasoti palibe yemwe ankuyesesa kufagafaga Mulungu.
12 Wanthu wose apatuka, ndipo wose akhala alibe na basa. Palibiretu olo m’bodzi yemwe ankuwonesa kukoma ntima.”
13 “Ngololo* yawo ni manda yofunguka. Iwo ayankhula vabodza na lilimi yawo.” “M’milomo yawo muli poizoni ya nyoka.”
14 “Ndipo nkamwa mwawo mwadzala na matemberero na mawu yopweteka.”
15 “Mapazi yawo yathamangira kukapha wanthu.”*
16 “Vose vomwe achita vikhala vodzonga komasoti vobweresa mabvuto,
17 ndipo njira yantendere aidziwalini.”
18 “Iwo agopalini Mulungu.”
19 Tinkudziwa kuti vinthu vose vomwe Chilamulo chifotokoza viphata basa kwa womwe atewedza Chilamulo. Cholinga chake nkuchitisa wanthu kuti asowe chonamizira komasoti kuwonesa kuti dziko yose inamulandu pamaso pa Mulungu ndipo ni yofunika kutambira chilango.
20 Ndipomwapa palibe munthu yemwe awonewa kuti ni wolungama na Mulungu ndawa yotewedza Chilamulo, pakuti Chilamulo chitithandiza kudziwa bwino uchimo.
21 Koma manje vadziwika kuti munthu angakwanise kukhala wolungama kwa Mulungu mosatewedza Chilamulo. Vimwevi vidatomolewa pomwe m’Chilamulo na vomwe aneneri adanemba.
22 Kuwonewa wolungama na Mulungu kumuku kungakwanisike kwa wose omwe awonesa kuti akhulupirira Yesu Khrisitu, ndawa palibe kusiyana.
23 Pakuti wanthu wose ni wochimwa ndipo akangira kuwonesa bwinobwino ulemerero wa Mulungu.
24 Ndipo kuwonewa wolungama ndawa ya kukoma ntima kwake kukulu komwe wakuwonesa powamasula na malipiro yolipiriwa na Yesu Khrisitu, kuli ninge mphaso ya fovolo.
25 Mulungu adamupereka ninge ntsembe yakuti wanthu abverane pomwe na Mulungu pakukhulupirira magazi yake. Adachita vimwevi pakufuna kuwonesa chilungamo chake ndawa adawonesa kuti ni wosakalipa kankulumize pa kukhululukira machimo yomwe yadachitika kale.
26 Adachita vimwevi kuti awonese chilungamo chake panthawe ino pakuwona kuti munthu yemwe akhulupirira Yesu ni wolungama.
27 Manje ko pamwapa pali pomwe chani chotichitisa kuti tidzikwize? Palibe. Ko timbadzikwize ndawa yotewedza Chilamulo? Neye shuwa, koma ndawa yotewedza lamulo ya chikhulupiriro.
28 Tawona kuti munthu akhala wolungama ndawa ya chikhulupiriro, osati ndawa yotewedza Chilamulo.
29 Panango ko iye ni Mulungu wa Ayuda wokha? Ko sikuti ni Mulungu wa wanthu wa makhaindi yanangombo? Inde, iye ni Mulungu pomwe wa wanthu wa makhaindi yanango.
30 Pakuti Mulungu ni m’bodzi, iye adzawone kuti wanthu ochitiwa mdulidwe ni wolungama ndawa ya chikhulupiriro chawo. Adzawone pomwe kuti wanthu wosachitiwa mdulidwe ni wolungama ndawa ya chikhulupiriro chawo.
31 Ko pamwapa tinkumalisa Chilamulo mwa chikhulupiriro chathu? Neye! Koma tinkulimbikisa Chilamulo.
