Kwa Aroma 4:1-25
4 Pakuti viri teno, ko tinene chani va m’bereki wathu Abulahamu?
2 Mwakulinganiza, vidakakhala kuti Abulahamu ambawonewa kuti ni wolungama ndawa ya vomwe adachita, adakakhala na chifukwa chodzikwizira, koma osati pamaso pa Mulungu.
3 Ko pale Malemba yanena kuti chani? Yanena kuti: “Abulahamu adakhulupirira vomwe Yahova* adamuuza, ndipo adawonewa kuti ni wolungama.”
4 Munthu yemwe waphata basa awonalini malipiro yake ninge kukoma ntima kukulu, koma ayawona ninge chinthu* chomwe ambafunika kutambira.
5 Koma Mulungu yemwe awona wanthu wochimwa kukhala wolungama awona kuti munthu yemwe alibe kuphata basa, koma amukhulupirira, ni wolungama.
6 Davide adanena va munthu wokondwa yemwe Mulungu amuwona kuti ni wolungama podiya kuti vomwe wachita vinkubveranalini maninge na Chilamulo. Iye adati:
7 “Wokondwa ni wanthu womwe akhululukiriwa vochita vawo vosabvera malamulo ndipo machimo yawo yakhululukiriwa.
8 Wokondwa ni munthu yemwe Yahova* adzakumbukirelini chimo yake.”
9 Manje ko kukondwa kumuku ni kwa wanthu wokha womwe adachitiwa m’dulidwe? Panango wosachitiwa m’dulidwe nawombo akhala wokondwa? Pakuti tinena kuti: “Abulahamu adawonewa kuti ni wolungama ndawa ya chikhulupiriro chake.”
10 Koma ko iye wenze wotani pomwe adawonewa kuti ni wolungama? Ko wenze wochitiwa m’dulidwe panango wosachitiwa? Iye wenze akanati kuchitiwa m’dulidwe.
11 Ndipo Mulungu adapasa Abulahamu lamulo ya m’dulidwe ninge chizindikiro chowonesa kuti Mulungu adamuwona kuti ni wolungama akanati kuchitiwa m’dulidwe ndawa ya chikhulupiriro. Adachita vimwevi kuti adzakhale baba wa wose wosachitiwa m’dulidwe omwe anachikhulupiriro, kuti wanthu mwawo adzawonewe kuti ni wolungama.
12 Kuti adzakhale pomwe baba wa wana wochitiwa m’dulidwe, osati wosachitiwa wokha, komasoti wa womwe atewedza chikhulupiriro chomwe ababa wathu Abulahamu enze nacho akanati kuchitiwa m’dulidwe.
13 Ndawa Abulahamu panango mbadwa zake alibe kubvumiziwa kuti adzatambire dziko ninge malipiro yawo ndawa ya Chilamulo neye. Adatambira polomisi ndawa yakuti Abulahamu wenze na chikhulupiriro ndipo Mulungu adamuwona kuti ni wolungama.
14 Ndawa peno wanthu womwe ankupitiriza kutewedza Chilamulo ni womwe adzatambire malipiro, ndiye kuti chikhulupiriro chilibe pomwe na basa ndipo polomisi ire yamalisiwa.
15 Chaivo vake ni vakuti, kuleka kutewedza Chilamulo kuchitisa kuti munthu alangiwe, koma pomwe palibe lamulo, palibe kuphonya.
16 Ndipomwapa iye adapasiwa polomisi mwiyo ndawa ya chikhulupiriro, kuti ikhale yobverana na kukoma ntima kukulu. Komasoti adapasiwa polomisi kuti ikhale yotsimikizika kwa wanthu wose omwe ni mbadwa zake, osati wotewedza Chilamulo wokha, komasoti wotewedza chikhulupiriro cha Abulahamu yemwe ni baba wa ise tose.
17 (Vimwevi ni vobverana na vomwe Malemba yanena kuti: “Nakusankhula kuti ukhale baba wa makhaindi yazinji.”) Ivi viri teno pamaso pa Mulungu yemwe Abulahamu ambamukhulupirira, yemwe amukisa pomwe wakufa ndipo anena vinthu vomwe vikanati kuchitika ninge kuti vachitika kale.
18 Abulahamu wenze na chidikhiro komasoti chikhulupiriro chakuti adzakhale baba wa makhaindi yazinji, olo kuti vimwevi vimbawoneka kuti ni vosakwanisika. Adakhulupirira vimwevi mobverana na vomwe vidanenewa kuti: “Momu ni momwe wana wako adzakhalire.”
19 Komasoti, olo kuti chikhulupiriro chake chiribe kufoka, ambaganizira va thupi yake, yomwe panthawe mwiyo yenze ninge yakufa (pakuti wenze na magole yothamangira 100). Ambadziwa pomwe kuti Sara ni wokalamba maninge ndipo angakwaniselini kubala mwana.
20 Koma ndawa ya polomisi ya Mulungu, chikhulupiriro chake chiribe kugunduzika ndipo chikhulupiriro chake mwicho chidamupasa mphanvu mwakuti adapereka ulemerero kwa Mulungu.
21 Iye ambakaikiralini kuti vomwe Mulungu adapolomisa wenze na mphanvu yovichita.
22 Ndipomwapa “Mulungu adamuwona kuti ni wolungama.”
23 Olo nteno, mawu yakuti “Mulungu adamuwona kuti ni wolungama” yalibe kunemberewa iye yekha.
24 Adanemberambo isepano. Nasembo tiwonewa kuti ndise wolungama ndawa tikhulupirira Mulungu yemwe adamukisa Yesu Ambuya wathu.
25 Yesu adaperekewa ndawa ya machimo yathu ndipo adamukisiwa kuti tiwonewe wolungama.
Mawu ya m’nyantsi
^ Onani matanthauzo ya mawu yanango.
^ Panango kuti: “chikwerete.”
^ Onani matanthauzo ya mawu yanango.
