Kwa Aroma 6:1-23
6 Manje tinene kuti chani? Ko tipitirize kuchimwa kuti kukoma ntima kukulu kuingizirike?
2 Neye shuwa. Pakuti tidafa ku uchimo, manje tipitirize kuchimwa ndawa chani?
3 Panango munkudziwalini kuti tose omwe tidabatiziwa ndipo manjeuno ndise wobverana na Yesu Khrisitu tidabatiziwa pomwe mu impfa yake?
4 Ndipomwapa tidaikhiwa naye pabodzi m’manda pomwe tidabatiziwa mu impfa, kuti molingana na Khrisitu yemwe adamukisiwa pophatisira basa ulemerero wa Ababa, isembo tikhale na moyo unyowani.
5 Ndawa peno tabverana naye pakufa impfa yolingana na yake, shuwa tidzabverane naye pomwe pakumukisiwa molingana na iye.
6 Pakuti umunthu wathu wakale udamanikiwa naye pabodzi pamuti na cholinga chakuti thupi yathu ya uchimo ikhale iribe mphanvu, kuti osati tikhale pomwe akapolo wa uchimo.
7 Ndawa munthu yemwe wafa akhalalini pomwe na mulandu wa machimo yake.
8 Komasoti, peno tidafa pabodzi na Khrisitu, tikhulupirira kuti tidzakhale pomwe na moyo pabodzi na iye.
9 Tinkudziwa kuti pakuti Khrisitu wamukisiwa, adzafelini pomwe ndipo impfa inkumutongalini pomwe ninge mpfumu.
10 Iye adafa kuti achose uchimo kabodzi kokha, ndipo moyo womwe anawo, alinawo kuti ambachite vomwe Mulungu afuna.
11 Namwembo mumbadziwone ninge akufa pankhani ya uchimo, koma amoyo kwa Mulungu mwa Khrisitu Yesu.
12 Ndipomwapa ayi kubvuma kuti uchimo upitirize kukulamulirani ninge mpfumu m’mathupi yanu yomwe yangafe kuti mumbatewedze vilakolako vawo.
13 Ndipo ayi kupereka mathupi yanu ku uchimo kuti yakhale vitsulo vochitira vinthu viribe chilungamo, koma dziperekeni kwa Mulungu ninge wanthu omwe amukisiwa. Mathupi yanumbo muyapereke kwa Mulungu ninge vitsulo vochitira chilungamo.
14 Uchimo ayi kuti umbakulamulireni ninge mpfumu, ndawa munkutewedzalini Chilamulo, koma munkukondwa na kukoma ntima kukulu kwa Mulungu.
15 Ko vikakhala tene ndiye kuti timbachite chimo ndawa yakuti tinkutewedzalini Chilamulo koma tinkukondwa na kukoma ntima kukulu? Neye shuwa.
16 Ko munkudziwalini kuti mukambadzipereka kwa munango ninge akapolo obvera, mukhala akapolo wa yemwe mukumubvera uyo? Mukhala akapolo wa uchimo omwe utsogolera ku impfa, panango akapolo wa kubvera komwe kutsogolera ku chilungamo.
17 Koma tinkutembeja Mulungu kuti olo kuti pakuyamba mwenze akapolo wa uchimo, mudabvera kuchokera pasi pa ntima mpfundo zinyowani zomwe mudapfunzisiwa.
18 Shuwadi, pakuti mudamasuliwa ku uchimo, mudakhala akapolo wa chilungamo.
19 Ninkuyankhula ninge munthu ndawa ya kufoka kwa mathupi yanu. Ninge momwe mudaperekera vidzo vanu kuti vikhale akapolo wa vonyantsa komasoti akapolo wa kusabvera malamulo na cholinga chakuti mumbachite vinthu vophonyesa malamulo, perekani pomwe vidzo vanu kuti mukhale akapolo wa chilungamo komasoti wochena.
20 Ndawa pemwenze akapolo wa uchimo, mwenze womasuka ku chilungamo.
21 Ko panthawe mwiyo mumbabala vipaso votani? Venze vinthu vomwe manjeuno muchita navo manyazi. Ndipo mapeto ya vinthu vimwevo ni impfa.
22 Koma manjeuno ndawa mudamasuliwa ku uchimo nkukhala akapolo wa Mulungu, munkubala vipaso vochena ndipo pamapeto pake mudzakhale na moyo wosapera.
23 Ndawa malipiro ya uchimo ni impfa, koma mphaso yomwe Mulungu apereka ni moyo wosapera pophatisira basa Yesu Khrisitu Ambuya wathu.
