Kwa Aroma 8:1-39
8 Ndipomwapa wanthu womwe ni wobverana na Yesu Khrisitu alibe mulandu.
2 Ndawa lamulo ya mzimu yomwe ipereka moyo mobverana na Yesu Khrisitu yakumasulani ku lamulo ya uchimo na impfa.
3 Chilamulo chenze chiribe mphanvu yokumasulani ndawa wanthu ni wofoka komasoti wochimwa. Koma kuti akumasuleni, Mulungu adatumiza Mwana wake anathupi ninge ya wanthu wochimwa kuti amalise uchimo. Ndipomwapa Mulungu ankugonjesa uchimo pakuphatisira basa thupi.
4 Mulungu adachita ivi kuti ise womwe tichita vinthu motewedza mzimu osati motewedza vofuna va thupi, tikwanirise vinthu volungama vomwe Chilamulo chifuna.
5 Ndawa wotewedza vofuna va thupi, maganizo yawo yose yakhala pa vinthu va thupi, koma wotewedza mzimu, maganizo yawo yose yakhala pa vinthu va mzimu.
6 Pakuti kuganizira maninge vinthu va thupi kubweresa impfa, koma kuganizira maninge vinthu va mzimu kubweresa moyo na ntendere.
7 Ndawa kuganizira maninge vinthu va thupi kuchitisa kuti timbazondane na Mulungu, pakuti thupi ibveralini lamulo ya Mulungu ndipo kunena shuwa ingabverelini.
8 Ndipomwapa, womwe atewedza vofuna va thupi angakondwereselini Mulungu.
9 Peno mzimu wa Mulungu ulidi na imwepo, ndiye kuti munkutewedza mzimu osati vofuna va thupi. Peno munango alibe mzimu wa Khrisitu, moyu ni wa Khrisitulini.
10 Koma peno ndimwe wobverana na Khrisitu, mzimu uchitisa kuti mukhale na moyo ndawa ya chilungamo olo kuti thupi ni yakufa ndawa ya uchimo.
11 Peno mzimu wa yemwe adamukisa Yesu unaimwepo, iye yemwe adamukisa Yesu Khrisitu adzachitisembo mathupi yanu yomwe yangafe kukhala na moyo, pophatisa basa mzimu wake womwe unaimwepo.
12 Ndipomwapa abale, tinachikwerete, osati na thupi kuti timbakhale motewedza vofuna va thupi.
13 Ndawa peno munkukhala motewedza vofuna va thupi, ndiye kuti mosakaika mudzafe. Koma mukabvuma kuti mphanvu ya mzimu ikuthandizeni kupha vochita va thupi, mudzakhale na moyo.
14 Wose womwe ankutsogolerewa na mzimu wa Mulungu ni wanadi wa Mulungu.
15 Ndawa mulibe kutambira mzimu wa ukapolo woyambisa pomwe mantha, koma mudatambira mzimu wakuti mukhale wana, womwe tikuwa nawo kuti: “Abba,* Ababa!”
16 Mzimu muyo uchitira umboni pabodzi na mzimu wathu kuti ndise wana wa Mulungu.
17 Ndipomwapa, peno ndise wana, ndisepomwe wotambira chuma cha banja chochokera kwa Mulungu. Komasoti ndise wotambira chuma cha banja cha anzake wa Khrisitu, peno tinkushupika naye pabodzi kuti tikatambire naye ulemerero.
18 Ninkuwona kuti mabvuto yomwe tinkugumana nayo manjeuno ni yang’ono pakulinganiza na ulemerero womwe udzawonekere pakuphatisira basa isepano.
19 Ndawa chilengedwe chinkudikhira mwachidwi nthawe yomwe ulemerero wa wana wa Mulungu udzawonekere.
20 Pakuti chilengedwe chidaweruziwa kuti chikhale chiribe basa, osati mwakufuna kwachene koma kupitira mwa yemwe adachiweruza. Ndipo adapereka pomwe chidikhiro
21 chakuti chilengedwe mwicho chidzamasuliwe ku ukapolo wa thupi yomwe idzongeka nkukhala na ufulu wa ulemerero wa wana wa Mulungu.
22 Ndawa tinkudziwa kuti chilengedwe chose chinkubuula komasoti kubva kuwawa pabodzi mpakana pano.
23 Koma ni mwevilini vokha. Ise womwe tinavipaso voyambirira vomwe ni mzimu, tinkubuula mu ntima mwathu pomwe tinkudikhira na ntima wose kuti Mulungu atitenge nkukhala wana wake, nkutimasula na malipiro ku mathupi yathu mwaya.
24 Ndawa tidapulumusiwa tiri na chidikhiro chimwechi, koma chomwe unkuchidikhira chikachitika uchidikhiralini pomwe. Ko chomwe munthu ankuchidikhirira chikachitika achidikhirira pomwe?
25 Koma peno vomwe tinkudikhira vikanati kuchitika, tidikhira mopirira.
26 Molingana na vimwevi, mzimu utithandiza pa vomwe tinkukangira kuchita. Ndawa bvuto ni yakuti tidziwalini vomwe tinkufuna kutomola pakupemphera, koma mzimu ugwigwirira m’malo mwathu na kudandaula komwe tingakwaniselini kukufotokoza.
27 Koma iye yemwe aunguza mitima adziwa vomwe mzimu utanthauza, ndawa ugwigwirira m’malo mwa wochena mobverana na vomwe Mulungu afuna.
28 Tinkudziwa manje kuti Mulungu abveranisa vochita vake vose pakufuna kuteteza womwe akonda Mulungu muyo, wanthu wochemerewa mobverana na cholinga chake.
29 Achita teno ndawa womwe adawadziwa pakuyamba adawasankhuliratu kuti adzakhale wolingana na Mwana wake, kuti akhale woyamba kubadwa pakati pa abale wake azinji.
30 Ndipo womwe adawasankhuliratu ni wale womwe adawachemera. Womwe adawachemera mwawo ni wale pomwe womwe adawawona kuti ni wolungama. Ndipo womwe adawawona kuti ni wolungama mwawo ni wale pomwe womwe adawapasa ulemerero.
31 Manje tinene chani pamwapa? Peno Mulungu ali kusaidi yathu, mbani adzatsutsane nase?
32 Pakuti alibe kutimana Mwana wake koma adamupereka m’malo mwa ise tose, angakangire tani kutipasa pomwe kukoma ntima vinthu vinango vose pabodzi na Mwana wake muyo?
33 Mbani adzanene kuti anamulandu wanthu wa Mulungu wochita kusankhuliwa? Pakuti Mulungu ni yemwe awawona kuti ni wolungama,
34 ni mbani adzawatsutse? Yesu Khrisitu ni yemwe adafa komasoti ni yemwe adamukisiwa. Iye ali kudjanja ya makulu ya Mulungu, ndipo atiyankhulira mogwigwirira.
35 Ko ni mbani yemwe adzatilekanise na chikondi cha Khrisitu? Ko ni masautso, vowawa, kudzudziwa, njala, usiwa, vogopsya panango chibemba?
36 Malemba yanena kuti: “Ndawa ya imwepo, tinkuphewa nthawe zose. Takhala ninge nkhosa zomwe zinkuyenda kukaphewa.”
37 Koma tinkuwina vinthu vose vimwevi mothandiziwa na iye yemwe adatikonda.
38 Ndawa natsimikiza ntima kuti impfa, moyo, angelo, maboma, vinthu vomwe viripo, vinthu vomwe vinkubwera, mphanvu,
39 msinkhu, kunoka panango cholengewa chirichose, vidzakwaniselini kutilekanisa na chikondi cha Mulungu chomwe chiri mwa Yesu Khrisitu Ambuya wathu.
Mawu ya m’nyantsi
^ Muchiheberi panango Muchiaramu, mawu mwaya yatanthauza kuti: “Ababa!”
