Kwa Aroma 9:1-33
9 Ninkunena chaivo mobverana na Khrisitu, ninkunamalini neye. Ndipo chikumbuntima changu chinkunichitira umboni mwa mzimu uchena,
2 kuti ninkubva ntsisi maninge ndipo ntima uniwawa nthawe zose.
3 Nidakakonda kuti inepano nisiyanisiwe na Khrisitu ninge wotembererewa m’malo mwa abale wangu, wanthu wa khaindi yangu,
4 omwe ni Aizirayeli. Mulungu adawatenga kuti akhale wana wake ndipo adawapasa ulemerero, mapangano, Chilamulo, utumiki wopatulika komasoti mapolomisi.
5 Iwo ni wana wa azibereki wathu wakale. Komasoti Khrisitu adabadwa ninge munthu kuchokera kwa iwo. Mulungu yemwe ni nkulu pa vinthu vose, atamandike mpakana kalekale. Ame.
6 Olo kuti viriteno, ninkutanthauzalini kuti mawu ya Mulungu yalibe kukwanirisiwa. Ndawa ni woselini omwe ni mbadwa za Aizirayeli womwe ni “Aizirayelidi.”
7 Ndipo sikuti wose ni wana ndawa yakuti ni mbadwa za Abulahamu. Koma Malemba yanena kuti: “Mbadwa zomwe nidakupolomisa zidzachokere mwa Isaki.”
8 Vimwevi vinkutanthauzalini kuti wana wose wa Abulahamu ni wana chaiwo wa Mulungu, koma wana wobadwa mobverana na polomisi ni womwe achemerewa kuti mbadwa za Abulahamu.
9 Pakuti polomisi ire idati: ‘Nidzabwere pomwe nthawe ninge ino, ndipo Sara adzakhale na mwana mwamuna.”
10 Polomisi mwiyo ilibe kuperekewa pa nthawe mweyi yokha. Idaperekewa pomwe panthawe yomwe Rabeka ambadikhirira kubereka wana wa mapasa wa Isaki m’bereki wathu ule.
11 Mapasa mwaya yakanati kubadwa komasoti yakanati kuchita chabwino panango choipa chilichose, Mulungu adawonesa kuti cholinga chake chidzathembe iye yemwe achemera, osati vochita va munthu.
12 Ndipomwapa adauza Rabeka kuti: “Nkulu adzakhale kapolo wa mng’ono wake.’
13 Mobverana na vomwe Malemba yanena kuti: “Nidakonda Yakobo, koma Esau nidazondana naye.”
14 Manje tinene chani pamwapa? Ko Mulungu alibe chilungamo? Neye shuwa.
15 Ndawa iye adauza Mose kuti: “Yemwe ninkufuna kumukomera ntima nidzamukomere ntima, ndipo yemwe ninkufuna kumuwonesa chifundo nidzamuwonese chifundo.”
16 Ndipomwapa, vithembalini kufuna kwa munthu panango khama yake, koma Mulungu yemwe ni wachifundo.
17 Pakunena va Farao, lemba inango idati: “Nakusiya na moyo kuti nikuwonese mphanvu zangu komasoti kuti dzina yangu ilengezewe padziko yose yapasi.”
18 Ndipomwapa iye achitira chifundo munthu yemwe wafuna kumuchitira chifundo, koma abvuma wanthu anango kuti aumise mitima yawo.
19 Panango unganibvunze kuti: “Ndawa chani Mulungu agumanira vifukwa wanthu? Ko ni mbani ankutsutsa vomwe iye akufuna?”
20 Munthu iwe, ndiwe mbani kuti umbatsutsane na Mulungu? Ko chinthu choumbiwa chingauze munthu yemwe adachiumba kuti: “Udanikonzeranyi tene?”
21 Ko mudziwalini kuti woumba mbiya anaufulu woumba chinthu chinango cha basa yolemekezeka, chinango cha basa yonyozeka kuchokera pa dongo ibodzi?
22 Manje tani peno Mulungu adafuna kuwonesa ukali wake kuti mphanvu zake zidziwike ndipo adalekerera modekha maninge wanthu wofunika kudzongewa womwe adamukalipisa?
23 Ndipo tani peno adachita vimwevo kuti awonese kukula kwa ulemerero wake kwa wanthu wofunika kuwachitira chifundo womwe adawakonzeratu kuti atambire ulemerero,
24 ndipo wanthu wake ndisepano womwe adatichemera osati kuchokera kwa Ayuda wokha komasoti ku makhaindi yanango?
25 Nivolinganambo na vomwe adanena m’bukhu ya Hoseya kuti: “Wanthu womwe ni wanthulini wangu, nidzawachemere kuti ‘wanthu wangu,’ ndipo nkazi yemwe ambakondewalini nidzamutomole kuti ‘wokondewa.’
26 Komwe ambauziwa kuti: ‘Ndimwelini wanthu wangu,’ adzauziwe kuti: ‘Ndimwe wana wa Mulungu wamoyo.’”
27 Komasoti Yesaya adalengeza pa nkhani ya Izirayeli kuti: “Olo kuti wana wa Izirayeli adzakhale azinji ninge mchenga wa mnyanja, ang’onong’ono ndiwo womwe adzapulumuke.
28 Ndawa Yahova* adzatonge milandu padziko yapasi nkuyamaliza mwakankulumize.”
29 Komasoti mobverana na vomwe Yesaya adaneneratu kuti: “Yahova* wa magulu yankhondo yakudzulu, adakaleka kutisiyira mbadwa, tidakhala ninge Sodomu ndipo tidakalingana na Gomora.”
30 Manje pamwapa tinene kuti chani? Olo kuti wanthu wa makhaindi yanango alibe kutewedza chilungamo, iwo adagumana chilungamo chomwe chibwera ndawa ya chikhulupiriro.
31 Koma podiya kuti Aizirayeli ambatewedza lamulo ya chilungamo, alibe kukwanisa kutewedza lamulo mwiyo.
32 Ndawa chani? Ndawa yakuti angaganiza kuti angatewedze mwa vochita vawo, osati mwa chikhulupiriro. Iwo adakhukhumudwa “pamwala wokhukhumudwisa”
33 mobverana na vomwe Malemba yanena kuti: “Inepano ninkuikha mwala wokhukhumudwisa komasoti chidwale chokhukhumudwisa mu Ziyoni, koma munthu wokhulupirira mwala moyu adzakhumudwelini.”
