Chivumbuluso chomwe Yohani adatambira 1:1-20
1 Chivumbuluso* chomwe Yesu Khrisitu adapereka. Mulungu adamupasa Chivumbuluso chimwechi kuti awonese akapolo wake vinthu vomwe vikufunika kuchitika manjemanje. Yesu adatumiza mngelo wake kuti adzapereke Chivumbuluso chimwecho kwa kapolo wake Yohani pophatisira basa vizindikiro.
2 Yohani muyo adachitira umboni mawu yomwe Mulungu adapereka na umboni womwe Yesu Khrisitu adapereka, kutanthauza vose vomwe adawona.
3 Wokondwa ni munthu yemwe awerenga mokuwa na wanthu omwe akubva mawu mwayo yonena vakutsogolo, komasoti omwe akutewedza vonembewa mumo, ndawa nthawe yoikhiwiratu yafendera.
4 Inepano Yohani, ninkunembera mipingo 7 yomwe yali muchigawo cha Ásia kuti:
Kukoma ntima kukulu na ntendere vikhale namwe kuchokera kwa “Iye yemwe alipo, yemwe wenzepo, na yemwe akubwera,” komasoti kuchokera kwa mizimu 7 yomwe yali pamaso pa mpando wake wachifumu.
5 Komasoti kuchokera kwa Yesu Khrisitu, “Mboni Yokhulupirika,” “woyamba kubadwa kuchokera kwa akufa” na “Wolamulira mafumu yadziko yapasi.”
Kwa iye yemwe atikonda na kwa yemwe adatimasula kumachimo yathu pophatisira basa magazi yake,
6 nkutichitisa kukhala mafumu na antsembe kuti titumikire Mulungu wake na Ababa wake, kwa iye kukhale ulemerero na mphanvu mpakana kalekale. Ame.
7 Onani! Akubwera na mitambo ndipo diso iriyose idzamuwone, olo wanthu omwe adamulasa. Ndipo madzinza yose yapadziko yapasi yadzadzigugudze pachifuwa pakubva ntsisi ndawa ya iye. Inde, vimwevi vidzachitikedi. Ame.
8 “Ine ndine Alefa na Omega,”* wanena teno Yahova* Mulungu, “Iye yemwe alipo, wenzepo na yemwe akubwera, Wamphanvu zose.”
9 Ine Yohani m’bale wanu, molingana na imwepo nikupirira, ninkugumana na masautso ndipo tidzalamulire pabodzi mu ufumu ninge wotewera wa Yesu, nenze pantsuwa ya Patimo ndawa yoyankhula va Mulungu na kuchitira umboni va Yesu.
10 Panidadzadziwa na mzimu uchena nidagumanika kuti niri mu ntsiku ya Ambuya, ndipo kumbuyo kwangu nidabva mawu yamphanvu ninge kulira kwa lupenga.
11 Mawu mwayo yenze yakuti: “Vomwe unkuwona, uvinembe mu mpukutu na kuutumiza ku mipingo 7 aya: Wa ku Efeso, ku Simuna, ku Pegamo, ku Tiyatira, ku Sade, ku Filadefiya na wa ku Laodikaya.”
12 Nidacheuka kuti niwone kuti ni mbani yemwe ambaniyankhula. Panidacheuka, nidawona voikhapo kandyero 7 va golide.
13 Pakati pa vinthu vimwevo voikhapo kandyero, penze munango wooneka ninge mwana wa munthu ali vale chovala chofika kumapazi ndipo wenze adamanga bande ya golide pachifuwa.
14 Komasoti msolo na tsitsi yake venze vichena ninge ukuse uchena wa nkhosa, venze vochena maninge, ndipo maso yake yenze ninge moto wangandanganda.
15 Mapazi yake yenze ninge kobre* wokonzewa bwino omwe unkung’anima mu uvuni ndipo mawu yake yambabveka ninge zungo ya madzi yazinji.
16 Djanja yake yamakulu yenze na nyenyezi 7. Nkamwa mwake mumbabula chibemba chitali, chakuthwa kosekose. Nkhope yake yenze yogaka ninge dzuwa yomwe inkugaka maninge.
17 Panidamuwona, nidagwera pa mapazi yake ninge kuti nafa.
Ndipo adaniphata na djanja yake yamakulu nkuniuza kuti: “Ayi kuchita mantha. Ine ndine Woyamba na Womaliza,
18 komasoti wamoyo. Nenze wakufa, koma wona, niri na moyo ndipo nidzakhale na moyo mpakana kalekale, komasoti ninamakhiyi ya impfa na ya manda.*
19 Ndipomwapa nemba vomwe waona, vomwe vikuchitika manjeuno na vomwe vichitike patsogolo pa vimwevi.
20 Koma va chintsintsi chopatulika cha nyenyezi 7 zomwe waona mu djanja yangu yamakulu na vachintsintsi cha voikhapo kandyero 7 va golide, tanthauzo yake ni iyi: Nyenyezi 7 zikuimira angelo wa mipingo 7, ndipo voikhapo kandyero 7 vikuimira mipingo 7.”
Mawu ya m’nyantsi
^ Panango kuti: “kuulula.”
^ Panango kuti “ndine A na Z.” Alefa ni letra yoyambirira ya alfabeto ya Chigiriki ndipo Omega ni letra yomalizira.
^ Onani vakumapeto A5.
^ Panango kuti: “kobre; nkuwa.”
^ Mwaya ni manda ya wanthu wose.
