Chivumbuluso chomwe Yohani adatambira 10:1-11
10 Patsogolo pake nidawona mngelo munango wamphanvu akubuluka kuchokera kudzulu ndipo wenze ali vale ntambo.* Kumsolo kwake kwenze utawaleza* ndipo nkhope yake yenze ninge dzuwa. Mendo* yake yenze ninge vipilala va moto.
2 M’manja mwake, wenze na mpukutu ung’ono wopfuthula. Iye adaponda panyanja na phazi yake ya kumakulu koma na phazi yake ya kumadzere adaponda kuntunthu.
3 Patsogolo pake adayankhula mokuwa ninge kubangula kwa mphondolo. Padakuwa teno, padabveka mawu yogunda maulendo 7.
4 Manje kugunda kokwana 7 kule pakudayankhula, nimbafuna kunemba. Koma nidabva mawu yochokera kudzulu yakuti: “Usunge mwachintsintsi vomwe kugunda kokwana 7 kwayankhula ndipo ayi kuvinemba.”
5 Mngelo yemwe nidamuwona aliyimirire panyanja na pa ntunthu ule, adakwiza djanja yake yamakulu kudzulu.
6 Iye adalumbira mudzina ya Mulungu yemwe adzakhale na moyo mpakana kalekale, yemwe adakonza kudzulu na vinthu vose vomwe viri mumo, dziko yapasi na vinthu vose vomwe viri mumo komasoti nyanja na vinthu vose vomwe viri mumo. Adalumbira kuti: “Nthawe yodikhira yamala.
7 Zikadzakhala pang’ono kukwana ntsiku zakuti mngelo wa 7 alize lupenga, chintsintsi chopatulika chomwe Mulungu adalengeza kwa akapolo wake aneneri, ninge ntontholo wabwino, chidzakwanirisike.”
8 Patsogolo pake nidabva mawu yochokera kudzulu yakuyankhula pomwe na inepano kuti: “Yenda, katenge mpukutu wopfuthula womwe uli mudjanja ya mngelo yemwe waima pa nyanja ule.”
9 Pamwapo nidayenda kwa mngelo muyo nkumuuza kuti anipase mpukutu ung’ono. Iye adaniuza kuti: “Tenga mpukutu muyo udye. Ukumonye m’mimba, koma nkamwa mwako ukhale wotapira ninge uchi.”
10 Nidatengadi mpukutu ung’ono muyo mu djanja ya mngelo muyo nkudya. Nkamwa mwangu umbatapira ninge uchi, koma panidaudya m’mimba mwangu mudayamba kumonya.
11 Pamwapo nidauziwa kuti: “Ukufunika kunena pomwe vomwe vidzachitikire makhaindi ya wanthu, madziko, viyankhulo, na mafumu yazinji.”
Mawu ya m’nyantsi
^ Panango kuti: “ali kukutidziwe na ntambo.”
^ Panango kuti: “chitawaleza.”
^ Mu chiyankhulo choyambirira adaphatisa basa mawu yakuti “mapazi.”
