Chivumbuluso chomwe Yohani adatambira 11:1-19
11 Manje nidapasiwa ntsanga yokhala ninge mpsyimbo* ndipo nidauziwa kuti: “Yenda ukapime nyumba yopatulika ya pa kachisi wa Mulungu, guwa ya ntsembe na omwe akutumikira Mulungu mumo.
2 Koma malo yomwe yali kunja kwa nyumba yopatulika ya pakachisi uyasiye, ayi kuyapima ndawa yaperekewa kwa wanthu wa makhaindi yanango. Ndipo iwo adzapondeponde thaundi yochena kwa minyezi 42.
3 Koma nidzachitise kuti mboni zangu ziwiri ziyankhule va kutsogolo kwa ntsiku 1260, ziri vale masakha.”
4 Mboni zimwezi zinkuimiriwa na miti yawiri ya maolivi komasoti voikhapo kandyero viwiri ndipo zaimirira pamaso pa Ambuya wa dziko yapasi.
5 Peno munango akufuna kuzidzonga, moto ubula nkamwa mwawo nkunyekesa azondi wawo. Peno munango angafune kuzidzonga, afunika kuphewa mwa njira mweyi.
6 Mboni zimwezi ziri na mphanvu yofunga kudzulu* kuti nvula ileke kugwa muntsiku zose zomwe zinkuneneratu vakutsogolo. Ziri pomwe na mphanvu yosandusa madzi kukhala magazi komasoti mphanvu yobweresa muliri wa khaindi iriyose padziko yapasi maulendo yazinji momwe zikufunira.
7 Zikadzamaliza kuchitira umboni wawo, chilombo chomwe chabula kuphompho chidzachite nazo nkhondo ndipo chidzawine mboni mwizo nkuzipha.
8 Vitanda vawo vidzagone pansewu ukulu wa mu thaundi ikulu, womwe mophiphirisira uchemerewa Sodomu na Iguputo, kumuko pomwe Ambuya wawo adaphewa pakumanikiwa pamuti.
9 Makhaindi ya wanthu azinji, madzinza, viyankhulo na madziko, adzanyang’anisise vitanda vawo mu ntsiku zitatu na hafu ndipo adzabvumelini kuti vitanda vimwivo viikhiwe m’manda.
10 Omwe ankukhala padziko yapasi adzakondwe ndawa ya impfa yawo. Iwo adzatumizirane mphaso ndawa aneneri awiri mwawa adadzudza omwe ankukhala padziko yapasi.
11 Ntsiku zitatu na hafu zire pazidamala, mzimu wa moyo wochokera kwa Mulungu udangena mwa mboni zire. Pamwapo mboni zire zidaimirira ndipo omwe adaziona adachita mantha maninge.
12 Patsogolo pake mboni mwizo zidabva mawu yokuwa kuchokera kudzulu yankuziuza kuti: “Bwerani kuno.” Ndipo zidakwira kudzulu mu ntambo azondi wawo ankuwona.
13 Nthawe mwiyoletu, kudachitika chivomezi chikulu ndipo gawo ibodzi pa magawo 10 ya thaundi mwiyo idagwa. Wanthu 7000 adaphewa na chivomezi mwicho ndipo wanthu wose adachita mantha nkupereka ulemerero kwa Mulungu wakudzulu.
14 Tsoka yachiwiri yapita. Koma tsoka yachitatu ikubwera mwakankulumize.
15 Mngelo wachi 7 adaliza lupenga yake. Pamwapo kudzulu kudabveka mawu yosiyanasiyana yakunena mokuwa kuti: “Ufumu wadziko wakhala Ufumu wa Ambuya wathu na wa Khrisitu wake ndipo iye adzatonge ninge mpfumu mpakana kalekale.”
16 Ndipo akulu 24 omwe enze adakhala pa mipando yawo yachifumu pamaso pa Mulungu ule, adagwada nkujolima mpakana nkhope zawo pasi ndipo adatumikira Mulungu.
17 Iwo ambanena kuti: “Tinkukutembejani imwepo Yahova,* Mulungu Wamphanvu zose, imwepo womwe mulipo na womwe mwenzepo, ndawa mwatenga mphanvu zanu zizinji nkuyamba kutonga ninge mpfumu.
18 Koma makhaindi ya wanthu yadakalipa ndipo imwepo mudawonesa ukali wanu. Manje nthawe yoikhiwiratu idafika yakuti wakufa aweruziwe nkupereka malipiro kwa akapolo wanu aneneri komasoti kwa ochena na omwe agopa dzina yanu, na wonyozeka. Komasoti nthawe yakuti mudzonge omwe ankudzonga dziko yapasi.”
19 Nyumba yopatulika ya pakachisi wa Mulungu kudzulu yafunguliwa ndipo likasa ya pangano yake yawonekera iri m’nyumba yake ya pakachisi. Manje kudachita tuphaliwali,* kudabveka mawu, kudabveka kugunda, kudachita chivomezi ndipo kudagwa matalala yazinji.
Mawu ya m’nyantsi
^ Panango kuti: “mpsyimbo yopimira.”
^ Panango kuti: “kudedza.”
^ Onani vakumapeto A5.
^ Panango kuti: “tumpheni.”