Chivumbuluso chomwe Yohani adatambira 12:1-17
12 Patsogolo pake kudzulu kudawoneka chizindikiro chikulu. Kudawoneka nkazi ali vale dzuwa ndipo mwezi wenze pasi pa mapazi yake. Kumsolo kwake kwenze chisote chachifumu chokonzewa na nyenyezi 12.
2 Nkazi muyo wenze na mimba ndipo ambalira ndawa ya ululu womwe ambabva pomwe adasala pang’ono kubereka.
3 Kudzulu kudawoneka chizindikiro chinango. Kudawoneka chinyoka chikulu chifuwira chomwe chenze na misolo 7 na nyanga 10 ndipo pamisolo mwayo penze visote vachifumu vokwana 7.
4 Nchira wake udakokolola gawo ibodzi mwa magawo yatatu ya nyenyezi zakudzulu nkuzigwesera padziko yapasi. Ndipo chinyoka mwicho chidandoima pamaso pa nkazi yemwe wenze adasala pang’ono kubereka ule, kuti akabereka chidye mwana wake muyo.
5 Nkazi muyo adabereka mwana mwamuna, mulumbwana yemwe adzabuse makhaindi yose ya wanthu na mpsyimbo ya simbi. Ndipo mwana wake muyo adatengewa mwakankulumize nkuyendesewa kwa Mulungu na ku mpando wake wachifumu.
6 Koma nkazi muyo adathawira kuchipululu. Komwe Mulungu adamukonzera malo, kumuko pomwe akadyesewe kwa ntsiku 1260.
7 Ndipo kudzulu kudayambika nkhondo: Mikayeli* na angelo wake adamenyana na chinyoka. Chinyoka mwicho na angelo wake chidamenya nkhondo,
8 koma chiribe kuwina ndipo malo yawo yalibe kugumanika pomwe kudzulu.
9 Pamwapo chinyoka mwicho chidaponyewa pasi, nyoka yakale ire, yomwe idziwika kuti Ndyerekezi komasoti Satana, yemwe akusokeresa dziko yose yapasi komwe kuli wanthu. Iye adaponyewa padziko yapasi ndipo angelo wakembo adaponyewa naye pabodzi.
10 Nidabva mawu yokuwa kudzulu yakuti:
“Manje chipulumuso, mphanvu, Ufumu wa Mulungu wathu na ulamuliro wa Khrisitu wake vafika, ndawa ule yemwe anamizira abale wathu waponyewa pasi. Iye awanamizira usiku na masikati pamaso pa Mulungu wathu.
11 Iwo adamugonjesa ndawa ya magazi ya Mwanawankhosa komasoti ndawa ya ntontholo womwe ambalalikira ndipo enze wokonzeka kufa.
12 Ndipomwapa, kudzulu kukondwe na wose omwe akhala kumuko! Tsoka dziko yapasi na nyanja, ndawa Ndyerekezi wabulukira kwa imwepo ndipo ali na ukali ukulu ndawa ankudziwa kuti wandosala na kanthawe kang’onong’ono.”
13 Manje chinyoka chire pachidawona kuti achigwesera padziko yapasi, chidadzudza nkazi yemwe adabala mwana mwamuna ule.
14 Koma nkazi muyo adapasiwa maphaphiro yawiri ya mphungu ikulu kuti ambululukire kuchipululu, ku malo yake yale, komwe akufunika kudyesewa kwa nthawe ibodzi, nthawe ziwiri na hafu ya nthawe, kutali na chinyoka chire.
15 Patsogolo pake chinyoka mwicho chidalavula madzi ninge kamadzi kuchokera nkamwa mwake. Chidalavulira nkazi ule kuti amire mukamadzi mwako.
16 Koma dziko yapasi idathandiza nkazi muyo. Dziko idafungula pakamwa pake nkumeza kamadzi komwe chinyoka chire chidalavula kuchokera nkamwa mwake.
17 Patsogolo pake chinyoka mwicho chidakalipa na nkazi ule, mwakuti chidayenda kukachita nkhondo na mbadwa zake zomwe zidasala, zomwe zitewedza lamulo ya Mulungu ndipo ziri na basa yochitira umboni va Yesu.
Mawu ya m’nyantsi
^ Dzina mwiyi itanthauza kuti: “ni mbani angalingane na Mulungu.”
