Chivumbuluso chomwe Yohani adatambira 13:1-18
13 Manje chinyoka mwicho chidandoima panchenga wa m’mphepete mwa nyanja.
Patsogolo pake nidawona chilombo chinkubula munyanja. Chenze na nyanga 10 na misolo 7. Pa nyanga yake iriyose penze chisote chachifumu. Koma pamisolo yake penze madzina yonyoza Mulungu.
2 Chilombo chomwe nidawona mwicho chenze ninge nyalugwe koma mapazi yake yenze ninge ya chimbalangondo ndipo pakamwa pake penze ninge pa mphondolo. Chinyoka chire chidapasa chilombo mwicho mphanvu yake, mpando wake wachifumu komasoti ulamuliro ukulu.
3 Nidawona kuti msolo wake ubodzi umbawoneka kuti wenze udachenekewa maninge. Koma chilonda mwicho chidapola podiya kuti chidakachitisa kuti chife nacho ndipo dziko yose yapasi idatewedza chilombo mwicho ndawa yochita nacho chidwi.
4 Iwo adatumikira chinyoka chire ndawa chidapereka ulamuliro kwa chilombo. Ndipo adatumikira chilombo mwicho na mawu yakuti: “Ni mbani ali ninge chilombo ndipo ni mbani angamenyane nacho?”
5 Chilombo mwicho chidapasiwa pakamwa poyankhula vinthu vodzikwiza na vonyoza Mulungu. Chidapasiwa pomwe mphanvu yochita vomwe chikufuna kwa minyezi 42.
6 Chilombo mwicho chidafungula pakamwa pake nkumbanyoza Mulungu. Chimbanyoza dzina yake, malo yake yokhala komasoti omwe akukhala kudzulu.
7 Chidabvumiziwa kumenyana na ochena mwawo nkuwagonjesa. Chidapasiwa pomwe ulamuliro pa wanthu wa dzinza iriyose, khaindi iriyose, chiyankhulo chirichose, na dziko iriyose.
8 Wanthu omwe akukhala padziko yapasi adzachitumikire. Kuchokera pomwe dziko idakonzewa, wanthu mwawa madzina yawo yalibe kunembewa mu mpukutu wa moyo wa Mwanawankhosa yemwe adaphewa.
9 Aliyese yemwe anamatu abve.
10 Peno munango akufunika kutengewa nkuyenda ku ukapolo, adzayendedi ku ukapolo muko. Aliyese wakupha munthu na chibemba, nayembo adzaphewe na chibemba. Apa manje ni pomwe wochena afunika kupirira komasoti kukhala na chikhulupiriro.
11 Patsogolo pake nidawona chilombo chinango chinkubula pasi pa dziko yapasi. Chenze na nyanga ziwiri ninge mwana wa nkhosa, koma chidayamba kuyankhula ninge chinyoka.
12 Chilombo mwicho chidalamulira na mphanvu zolingana na za chilombo choyamba chire, chilombo choyamba mwicho chikuwona. Chidachitisa kuti dziko yapasi na omwe akukhala mumo atumikire chilombo choyamba chire, chomwe chilonda chake chomwe chidakafunika kufa nacho, chidapola.
13 Chidachita pomwe vizindikiro vikuluvikulu, mwakuti chidachitisa kuti moto ugwere padziko yapasi kuchokera kudzulu, wanthu ankuwona.
14 Chilombo mwicho chidasokeresa wanthu omwe ankukhala padziko yapasi ndawa ya vizindikiro vomwe chidabvumiziwa kuchita pamaso pa chilombo choyamba chire. Chidauza pomwe omwe akukhala padziko yapasi kuti akonze chifaniziro cha chilombo chomwe chenze na chilonda cha chibemba chire, koma chilibe kufa.
15 Ndipo chidabvumiziwa kupereka mphuwe kwa chifaniziro cha chilombo chire, kuti chifaniziro cha chilombo mwicho chikwanise kuyankhula na kuchitisa kuti wose omwe ankulamba kutumikira chifaniziro cha chilombo mwicho aphewe.
16 Chilombo mwicho chidachichimiza wanthu wose, wolemekezeka na onyozeka, olemera na osauka, akapolo na omwe ni akapololini, kuti aikhiwe chizindikiro padjanja yawo yamakulu panango pankuma pawo.
17 Chidachita vimwevi kuti aliyese osati akwanise kugula panango kugulisa, kuchosapo peno anachizindikiro mwicho, dzina ya chilombo, panango namba ya dzina yake.
18 Apa manje mpofunika nzeru. Yemwe ananzeru awerenge namba ya chilombo mwicho, ndawa ni namba ya munthu. Namba yake ni 666.
