Chivumbuluso chomwe Yohani adatambira 14:1-20
14 Patsogolo pake nidanyang’ana ndipo nidawona Mwanawankhosa ali imirire pa phiri ya Ziyoni. Iye wenze pabodzi na anango okwana 144 000 omwe adanembewa dzina yake na dzina ya Ababa wake pa mikuma yawo.
2 Pamwapo nidabva zungo yochokera kudzulu ninge kuunga kwa madzi yazinji komasoti ninge zungo yamphanvu ya kugunda kwa dedza. Zungo mwiyo yanidabva yenze ninge ya woimba omwe ankuimba pakuphatisa basa azeze wawo.
3 Iwo ambaimba nyimbo yomwe imbabveka ninge nyimbo inyowani pamaso pa mpando wachifumu, pamaso pa angelo 4 na pamaso pa akulu. Palibe yemwe adakwanisa kupfunzira nyimbo mwiyo koma wa 144 000 wokha omwe adaguliwa padziko yapasi.
4 Mwawa ni omwe alibe kudzipsyipiza na akazi ndipo ali ninge anamwali. Iwo ni omwe atewera Mwanawankhosa kulikose komwe akuyenda. Iwo adaguliwa pakati pa wanthu ninge vipaso voyambirira voperekewa kwa Mulungu na kwa Mwanawankhosa.
5 Nkamwa mwawo mulibe kugumanika vinthu viribe chilungamo ndipo ni osapunduka.
6 Nidawona mngelo munango akumbululuka pafupi munlengalenga. Iye wenze na ntontholo wabwino wosapera wakuti aulengeze kwa wanthu omwe akukhala padziko yapasi, kudziko iriyose, dzinza iriyose, chiyankhulo chirichose na khaindi iriyose.
7 Iye ambanena mokuwa kuti: “Gopani Mulungu na kumupasa ulemerero ndawa nthawe yakuti apereke chiweruzo yafika. Ndipomwapa, tumikirani iye yemwe adakonza kudzulu, dziko yapasi, nyanja na ntsantsa za madzi.”
8 Patsogolo pake mngelo wachiwiri adamulondola ndipo adati: “Wagwa! Babulo Nkulu wagwa, yemwe achitisa kuti makhaindi yose ya wanthu yamwe vinyu wa chilakolako cha* chigololo* chake!”
9 Mngelo munango wachitatu adawalondola ndipo ambanena mokuwa kuti: “Peno munango watumikira chilombo na chifaniziro chake ndipo watambira chizindikiro pankuma panango padjanja yake,
10 adzamwe pomwe vinyu wosasungunula wa ukali wa Mulungu womwe unkuthiriwa mu khapu ya ukali wake. Ndipo adzadzudziwe na moto na sulufule pamaso pa angelo ochena komasoti pamaso pa Mwanawankhosa.
11 Ndipo utsi wa kudzudziwa kwawo udzalekelini kuchita lotoloto mpakana kalekale. Omwe ankutumikira chilombo na chifaniziro chake komasoti aliyese yemwe watambira chizindikiro cha dzina yake, adzadzudziwe usiku na masikati osapumula.
12 Apa manje ni pomwe ochena mwawo, omwe akutewedza malamulo ya Mulungu na kutewedza chikhulupiriro cha Yesu, akufunika kupirira.”
13 Patsogolo pake nidabva mawu yochokera kudzulu yakuti: “Nemba kuti: Okondwa ni wanthu omwe akufa ali obverana na Ambuya kuyambira panthawe ino kuyenda kutsogolo. Mzimu ukunena kuti alekeni apumule ku basa yawo yomwe adaiphata mwakhama, ndawa vomwe adachita vikuyenda nawo pabodzi.”
14 Patsogolo pake nidanyang’ana ndipo nidawona ntambo wochena. Pa ntambo mwapo penze padakhala munango wooneka ninge mwana wa munthu, ali vale chisote chachifumu cha golide kumsolo kwake ndipo mudjanja yake mwenze djeko wakuthwa.
15 Mngelo munango adabula m’nyumba yopatulika ya kachisi akuyankhula mokuwa kwa yemwe adakhala pa ntambo ule kuti: “Bulusa djeko wako nkuyamba kumweta, ndawa nthawe yomweta yafika ndipo vokolola va padziko yapasi vakhuma.”
16 Pamwapo yemwe adakhala pampando ule adabulusira djeko wake ule padziko yapasi mwamphanvu ndipo adamweta vokolola va padziko yapasi.
17 Mngelo munango adabula m’nyumba yopatulika yapakachisi yemwe wenze kudzulu, nayembo wenze na djeko wakuthwa.
18 Mngelo munango adabula ku guwa ya ntsembe ndipo wenze na ulamuliro pa moto. Iye adayankhula mokuwa na mngelo yemwe wenze na djeko wakuthwa ule kuti: “Bulusa djeko wako wakuthwa muyo nkumweta uva wa padziko yapasi ndipo uwuunganidze pabodzi ndawa uva muyo wapsa.”
19 Mngelo muyo adabulusira djeko wake padziko yapasi mwamphanvu nkumweta uva wa padziko yapasi. Patsogolo pake adauponya mu chopsinyiramo uva chikulu cha ukali wa Mulungu.
20 Adapondaponda mopsinyiramo uva mumo kunja kwa thaundi ndipo magazi yadabula mu chopsinyira uva mumo mpakana kufika muntsagwada za makavalo, nkuyerera nsenga wa mashitadiyo 1600.*
Mawu ya m’nyantsi
^ Panango kuti: “imwe ukali wa.”
^ Onani matanthauzo ya mawu yanango.
^ Shitadiyo ni chinthu chomwe kalekale ambaphatisa basa pakupima nsenga. Mashitadiyo 1600 ni yathamangira 296 kilometro. Shitadiyo ibodzi ni yolingana na 185 metro. Onani vakumapeto B14.
