Chivumbuluso chomwe Yohani adatambira 15:1-8
15 Nidawona chizindikiro chinango kudzulu, chikulu na chodabwisa. Chizindikiro chimwechi chenze angelo 7 omwe enze na miliri 7. Miliri mwaya ni yomalizira ndawa yakamala, ukali wa Mulungu udzakhalembo wamala.
2 Patsogolo pake nidawona chinthu chinango chowoneka ninge nyanja ya girazi yosanganisana na moto. Ndipo yemwe adagonjesa chilombo chire, chifaniziro chake na namba ya dzina yake wenze imirire pambali pa nyanja yagirazi mwiyo, ali nyamule azeze wa Mulungu.
3 Iwo ambaimba nyimbo ya Mose kapolo wa Mulungu na nyimbo ya Mwanawankhosa yakuti:
“Basa zanu ni zikulu na zodabwisa, imwepo Yahova* Mulungu Wamphanvu zose. Njira zanu ni zolungama komasoti chaizo, imwepo Mpfumu yokhalapo mpakana kalekale.
4 Pakuti imwepo mwekha Yahova* ndimwe wokhulupirika, ni mbani yemwe adzakugopenilini na kulemekeza dzina yanu? Wanthu wa makhaindi yose adzabwere kudzatumikira pamaso panu, ndawa iwo adziwa malamulo yanu yolungama.”
5 Vimwevi pavidamala, nidawona malo yopatulika ya muchitenti cha umboni yali funguliwe kudzulu.
6 Ndipo angelo 7 omwe enze na miliri 7 wale adabula kumalo yopatulika mwayo, ali vale vovala vochena na vogaka komasoti ali mange mabande yagolide pachifuwa pawo.
7 Manje m’bodzi pa angelo 4 wale adapereka kwa angelo 7 mwawo mbale* zagolide 7 zodzala na ukali wa Mulungu, omwe adzakhale na moyo mpakana kalekale.
8 M’malo yopatulika mwayo mudadzala utsi ndawa ya ulemerero wa Mulungu komasoti ndawa ya mphanvu zake. Palibe yemwe adakwanisa kungena m’malo yopatulika mwayo mpakana kumala kwa miliri 7 ya angelo 7 wale.
