Chivumbuluso chomwe Yohani adatambira 16:1-21
16 Patsogolo pake nidabva mawu yokuwa kuchokera m’malo yopatulika yankuuza angelo 7 wale kuti: “Yendani, kathireni mbale 7 za ukali wa Mulungu mwizo padziko yapasi.”
2 Mngelo woyamba adayenda nkukathira mbale yake padziko yapasi. Padateno, wanthu omwe enze na chizindikiro cha chilombo komasoti omwe ambatumikira chifaniziro chake, adaphatiwa na miliri ya vilonda vowawa komasoti vopasa mantha.
3 Mngelo wachiwiri adathira mbale yake m’nyanja. Nyanja mwiyo idasanduka magazi ninge ya munthu wakufa, mwakuti chamoyo chirichose m’nyanja mumo chidafa.
4 Mngelo wachitatu adathira mbale yake pa tukamadzi na pa ntsantsa za madzi ndipo vose vidasanduka magazi.
5 Manje nidabva mngelo yemwe ali na ulamuliro pamadzi akunena kuti: “Imwepo Mulungu yemwe mulipo na yemwe mwenzepo, imwepo Wokhulupirika, ndimwe wachilungamo ndawa mwapereka viweruzo vimwevi,
6 ndawa iwo adakhesa magazi ya ochena na ya aneneri ndipo imwepo mwawapasa magazi kuti amwe. Iwo ankufunikadi kutambira chiweruzo chimwechi.”
7 Patsogolo pake nidabva guwa yantsembe ikunena kuti: “Inde, Yahova* Mulungu, imwepo Wamphanvu zose, viweruzo* vanu ni chaivo komasoti vachilungamo.”
8 Mngelo wa 4 adathira mbale yake padzuwa ndipo dzuwa mwiyo idabvumiziwa kushoka wanthu na moto.
9 Wanthu adapsa ndawa yakuti kumbatentha maninge. Iwo adanyoza dzina ya Mulungu yemwe anaulamuliro pa miliri mwiyi ndipo alibe kulapa nkumupasa ulemerero.
10 Mngelo wa 5 adathira mbale yake pampando wachifumu wa chilombo. Ufumu wa chilombo mwicho udachita mdima ndipo wanthu adayamba kudziluma malilimi ndawa ya ululu.
11 Koma iwo adanyoza Mulungu wakudzulu ndawa ya ululu womwe ambabva komasoti ndawa ya vilonda vawo ndipo alibe kulapa basa zawo.
12 Mngelo wa 6 adathira mbale yake pa kamadzi kakulu ka Firate ndipo madzi yake yadauma, kuti njira ya mafumu yochokera kobulira dzuwa* ikonzewe.
13 Patsogolo pake nidawona mitontholo yatatu yonyantsa* youziriwa, yomwe yambawoneka ninge achule. Mitontholo mwayo yambabula nkamwa mwa chinyoka, nkamwa mwa chilombo na nkamwa mwa mneneri wabodza.
14 Makamaka mwaya ni mitontholo youziriwa na viwanda ndipo yachita vizindikiro. Mitontholo mwaya yankuyenda kwa mafumu ya dziko yose yapasi komwe kuli wanthu, kuti yawaunganidzire pabodzi kunkhondo ya ntsiku ikulu ya Mulungu Wamphanvu zose.
15 “Ona! Ninkubwera ninge mbava. Wokondwa ni yemwe ankupitiriza kukhala maso na yemwe ankupitiriza kukhala alivale malaya yake yakunja, kuti osati ayende alipezi nkuwonerewa na wanthu.”
16 Ndipo adawaunganidzira pabodzi, kumalo yomwe m’Chiheberi yachemerewa kuti Arumagedo.*
17 Mngelo wa 7 adakhuthulira mbale yake pa mphuwe. Padateno, padabveka mawu yokuwa kuchokera m’malo yopatulika, kuchokera kumpando wachifumu, yakuti: “Vachitika!”
18 Manje kudachita tuphaliwali, kudabveka mawu, dedza adagunda komasoti kudachita chivomezi chikulu chomwe chenze chikanati kuchitikako kuyambira pomwe munthu adalengewa padziko yapasi. Chivomezi mwicho chenze champhanvu maninge komasoti chikulu.
19 Thaundi ikulu idagawikana vigawo vitatu ndipo mathaundi ya makhaindi ya wanthu yadagwa. Manje Mulungu adakumbukira Babulo Nkulu, kuti amupase khapu yomwe yenze na vinyu wa ukali wake ukulu.
20 Komasoti ntsuwa iriyose idamira ndipo mapiri yalibe kugumanika.
21 Patsogolo pake matalala yakuluyakulu, iriyose yolemera kuthamingira 20 kilo,* yadagwera wanthu kuchokera kudzulu. Wanthu mwawo adanyoza Mulungu ndawa ya muliri wa matalala mwayo, ndawa muliri muyo wenze ukulu modabwisa.
Mawu ya m’nyantsi
^ Onani vakumapeto A5.
^ Panango kuti: “vigemulo.”
^ Panango kuti: “ku este.”
^ Mawu yake chaiyo niyakuti, “mizimu yoipa.”
^ Mu Chigiriki ni, Haramagedo, kuchokera ku mawu ya Chiheberi yomwe yatanthauza, “Phiri ya Megido.”
^ Mu chiyankhulo choyambirira, ni “matalente 8.”
