Chivumbuluso chomwe Yohani adatambira 17:1-18
17 M’bodzi pa angelo 7 omwe enze na mbale 7 wale, adabwera nkuniuza kuti: “Bwera, nikuwonese chiweruzo cha hule ikulu yomwe yakhala pamadzi yazinji,
2 yomwe mafumu ya dziko yapasi adachita nayo chigololo,* ndipo idaledzeresa wanthu omwe ankukhala padziko yapasi na vinyu wa uhule* wake.”
3 Mu mphanvu ya mzimu, mngelo muyo adaniyendesa kuchipululu. Ndipo nidawona nkazi alikhale pachilombo chifuwira maninge, chomwe chenze na madzina yonyoza Mulungu palipose komasoti chenze na misolo 7 na nyanga 10.
4 Nkazi muyo adavala vovala vifuwira maninge ndipo adadzikhuzisa na golide, minyala yodula na usanga wodula. Kudjanja kwake, wenze na khapu yagolide yodzala na vonyantsa na vinthu vopsyipiziwa vobverana na uhule* wake.
5 Pankuma pake padanembewa dzina yachintsintsi yakuti: “Babulo Nkulu, mayi wa mahule komasoti mayi wa vonyantsa vapadziko yapasi.”
6 Nidawona kuti nkazi muyo wenze adaledzera na magazi ya ochena komasoti magazi ya mboni za Yesu.
Panidamuwona, nidadabwa maninge.
7 Manje mngelo ule adanibvunza kuti: “Ndawa chani unkudabwa? Nikuuze chintsintsi cha nkazi moyu komasoti cha chilombo chomwe wakwirapo, chomwe chinamisolo 7 na nyanga 10.
8 Chilombo chawawona, chenzepo, koma manjeuno palibe, koma olo nteno chasala pang’ono kubula kuphompho, ndipo chiyende kukadzongewa. Wanthu omwe ankukhala padziko yapasi, omwe madzina yawo yalibe kunembewa mumpukutu wa moyo kuyambira pomwe dziko idakonzewa, adzadabwe maninge akadzawona kuti chilombo mwicho chenzepo, manjeuno kulibe, koma chidzabwere pomwe.
9 “Apa manje pafunika kuchenjera* komasoti kukhala na nzeru. Misolo 7 yankuimira mapiri 7, yomwe nkazi ule wakhala padzulu pake.
10 Pali pomwe mafumu 7. Mafumu 5 yagwa, ibodzi idakalipo, inango iyo ikanati yafika. Koma ikafika, ikufunika kukhala kanthawe kang’ono.
11 Ndipo chilombo chomwe chenzepo, koma manjeuno kulibe, ni chire pomwe chomwe ni mpfumu ya 8, koma yabula mwa mafumu 7 yale ndipo ikuyenda kukadzongewa.
12 “Nyanga 10 zomwe waziwona zire, zikuimira mafumu 10 yomwe yakanati kutambira ufumu wawo. Koma yadzatambire ulamuliro ninge mafumu ndipo yadzatonge pabodzi na chilombo kwa ora ibodzi.
13 Mafumu mwaya yanamaganizo yolingana, ndipomwapa yadzapereke mphanvu zawo na ulamuliro wawo kwa chilombo mwicho.
14 Iwo adzamenyane na Mwanawankhosa, koma ndawa yakuti iye ni Mbuya wa ambuya na Mpfumu ya mafumu, Mwanawankhosa muyo adzawawine. Komasoti ochemerewa wale, omwe ni osankhuliwa mwapadera komasoti okhulupirika, nawombo adzawine naye pabodzi.”
15 Mngelo ule adaniuza kuti: “Madzi yomwe yawawona yale, pomwe hule ire yakhala, yankuimira makhaindi ya wanthu, magulu ya wanthu, madziko komasoti viyankhulo.
16 Nyanga 10 zomwe waziwona zire komasoti chilombo, zidzazondane nayo hule mwiyo. Zidzatenge vinthu vake vose nkuisiya pezi ndipo zidzadye minyompfu yake nkuyanyekesa na moto.
17 Ndawa Mulungu adaikha pulani m’mitima yawo kuti vichite mobverana na maganizo yake komasoti kuti vikwanirise maganizo yawo yobverana yale, pakupereka ufumu wawo kwa chilombo mpakana mawu ya Mulungu yakwanirisiwe.
18 Ndipo nkazi yemwe wamuwona ule ankuimira thaundi ikulu yomwe inkutonga mafumu ya dziko yapasi.”
Mawu ya m’nyantsi
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
^ Panango kuti: “kukhala maso.”
