Chivumbuluso chomwe Yohani adatambira 18:1-24
18 Vimwevi pavidamala, nidawona mngelo munango ankubuluka kuchokera kudzulu ali na ulamuliro ukulu ndipo dziko yapasi idagwerewera na ulemerero wake.
2 Iye adakuwa mwamphanvu kuti: “Wagwa! Babulo Nkulu wagwa, ndipo wakhala malo yomwe viwanda vikhala. Wakhala pomwe malo yomwe mzimu uliwose wonyantsa* komasoti mbalani iriyose yonyantsa na yomwe izondewa vibishala.
3 Iye wamwesa makhaindi yose ya wanthu vinyu wochokera ku chilakolako chake cha* chigololo.* Ndipo mafumu ya dziko yapasi yadachita naye chigololo. Wamalonda* wa padziko yapasi adalemera ndawa ya vinthu vodula vomwe nkazi muyo adadziunjikira mosowa manyazi.”
4 Nidabva mawu yanango kuchokera kudzulu yakuti: “Bulani mwa iye wanthu wangu, peno munkufunalini kugawana naye machimo yake komasoti peno munkufunalini kutambira nawo yanango ya miliri yake.
5 Ndawa machimo yake yaunjikana mpakana kudzulu, ndipo Mulungu wakumbukira vochita vake viribe chilungamo.*
6 Mubwezereni volingana na vomwe iye adachitira anango. Mubwezereni kuingizira kawiri pa vinthu vomwe iye adachita. Mu khapu yomwe adaikhamo chakumwa chosanganisa, ikhanimo chakumwa chake chimwicho kuingizira kawiri.
7 Ninge momwe adadzigumanira ulemerero na kukondwa na chuma mosowa manyazi, mumuchitirembo vimwevo mumudzudze na kumulirisa. Ndawa muntima mwake ankunena kuti: ‘Ine ndine nkazi wa mpfumu. Ndinelini nkazi wamasiye ndipo nidzalirelini.’
8 Ndipomwapa ntsiku ibodzi, miliri yake idzafike. Miliri yake ni impfa, kulira komasoti njala ndipo adzanyeke na moto ndawa Yahova* Mulungu, yemwe adamuweruza ni wamphanvu.
9 “Mafumu yadziko yapasi yomwe yadachita naye chigololo* nkumbakondwa na chuma mosowa manyazi, yadzalire na kudzigugudza pachifuwa pa kumubvera ntsisi, yakadzawona utsi uli lotoloto ndawa ya kupsa kwake.
10 Iwo adzaimirire patali ndawa ya mantha pakuwona momwe akudzudzikira ndipo adzanene kuti: ‘Vobvesa ntsisi! Vobvesa ntsisi! Iwepo thaundi ikulu, iwepo Babulo thaundi yamphanvu! Ndawa mu ora ibodzi yokha, chiweruzo chako chafika!’
11 “Komasoti wanthu ochita malonda wa padziko yapasi adzamulilire na kubva ntsisi, ndawa palibe pomwe munango yemwe adzawagule katundu wawo wose.
12 Katundu wawo muyo ni golide, siliva, minyala yodula, usanga wodula, nguwo zabwino maninge, nguwo zifuwira, nguwo za psupsupsu, na nguwo zifuwira maninge. Palibe yemwe ankuwagula chirichose chokonzewa kuchokera ku muti wonunkhira bwino vinthu vosiyanasiyana vokonzewa na minyanga, muti wabwino, kobre, chisimbi na mwala wa bololindo.
13 Komasoti palibe omwe ankuwagula sinamoni, vonunkhirisa vochokera ku Índia, vopukiza, mafuta yonunkhira, lubani, vinyu, mafuta ya maolivi, ufa wabwino maninge, tirigu, ng’ombe, nkhosa, makavalo, ngolo, akapolo na wanthu anango.
14 Shuwadi chipaso chabwino chomwe umbachifunisisa chire palibe, ndipo vinthu vako vose vabwino komasoti vokhuza vadzongeka ndipo wanthu adzakugumanelini pomwe.
15 “Wamalonda omwe ambagulisa vinthu vimwevi, omwe adalemera ndawa ya iye, adzaime patali ndawa ya mantha pakuwona momwe ankudzudzikira ndipo adzamulire na kubva ntsisi.
16 Iwo ambadzanene kuti: ‘Ni vobvesa ntsisi! Ni vobvesa ntsisi! Iwepo thaundi ikulu, yemwe umbavala vovala vapadzulu, vifuwira na vifuwira maninge. Iwepo thaundi yomwe udakhuzisiwa mochitisa chidwi na vodzikhuzisira va golide, mwala wodula na usanga wodula.
17 Ni vobvesa ntsisi, kuwona kuti mu ora ibodzi basi, chuma chose chizinji chimwechi chadzongeka!’
“Wofambisa barko aliyese, munthu aliyese wofamba panyanja, wophata basa mu barko na wanthu wose omwe afamba panyanja nkumbachita malonda, adaimirira patali.
18 Ndipo padawona utsi womwe umbalotoka ndawa ya kunyeka kwake, adakuwa kuti: ‘Ni thaundi iponi yomwe ingalingane na thaundi ikulu imweyi?’
19 Iwo adathira pfumbi pamisolo pawo na kukuwa, kulira na kukwinyirira, ndipo adati: ‘Ni vobvesa ntsisi kuti vimwevi vachitikira thaundi mweyi ikulu. Wanthu wose omwe enze m’barko panyanja adalemera ndawa ya chuma chake. Vakwanisika tani kuti thaundi mweyi idzongewe mu ora ibodzi.’
20 “Kondwani kudzulu kumuko ndawa ya vomwe vamuchitikira. Imwembo ochena, atumi na aneneri, kondwani ndawa Mulungu wamupasa chilango ndawa ya vomwe adakuchitirani.”
21 Manje mngelo wamphanvu adatakula mwala wooneka ninge mphero ikulu nkuuponya m’nyanja, ndipo adati: “Thaundi ikulu ya Babulo idzaponyewe pasi mwakankulumize na mwamphanvu tene, ndipo idzagumanikelini pomwe.
22 Kuimba kwa woimba pophatisa basa zeze, kwa woimba vinonje, kwa woimba malupenga, na kwa woimba anango kudzabvekelini pomwe mwa iwepo. Mwa iwepo mudzagumanikelini pomwe m’misiri wa basa iriyose, komasoti zungo ya mphero idzabvekelini pomwe mwa iwepo.
23 Kugwerewera kwa kandyero kudzavunikelini pomwe mwa iwepo. Mawu ya mwamuna yemwe ankulowola na ya nkazi yemwe ankulowodwa yadzabvekelini pomwe mwa iwepo, ndawa wamalonda wako enze wanthu wapadzulu padziko yapasi, komasoti makhaindi yose ya wanthu yadasokeresewa na vochita vako vamizimu.
24 Mwa iye mudagumanika magazi ya aneneri, ya ochena na ya wose omwe adaphewa padziko yapasi.”
Mawu ya m’nyantsi
^ Mabaibolo yanango yanena kuti, “mphuwe; mawu youziriwa.”
^ Panango kuti: “ukali wake wa.”
^ Onani matanthauzo ya mawu yanango.
^ Panango kuti: “wamalonda ofambafamba.”
^ Panango kuti: “vochita vake vauchigananga.”
^ Onani vakumapeto A5.
^ Onani matanthauzo ya mawu yanango.
