Chivumbuluso chomwe Yohani adatambira 19:1-21
19 Pavidamala vimwevi, nidabva mawu kudzulu yomwe yambabveka ninge mawu yokuwa ya gulu ikulu yakuti: “Tamandani Yahova!* Mulungu wathu apulumusa wanthu ndipo ali na mphanvu zikulu komasoti ulemerero,
2 ndawa viweruzo vake ni chaivo na vachilungamo. Iye waweruza hule ikulu yomwe idaipisa dziko yapasi na chigololo* chake, ndipo waibwezera ndawa ya magazi ya akapolo wake, omwe hule mwiyo idapha.”
3 Nthawe mwiyo adanena pomwe kachiwiri kuti: “Tamandani Yahova!”* Utsi womwe uli lotoloto ndawa ya kushokewa kwake upitirize kuchita lotoloto mpakana kalekale.”
4 Manje akulu 24 na angelo 4 wale, adagwada pasi nkujolima ndipo adatumikira Mulungu yemwe wakhala pampando wachifumu, nkunena kuti: “Ame! Tamandani Yahova!*
5 Komasoti ku mpando wachifumu kudabveka mawu yakuti: “Mumbatamande Mulungu wathu, imwepo mose akapolo wake omwe mumugopa, olemekezeka na onyozeka.”
6 Patsogolo pake nidabva mawu yomwe yambabveka ninge mawu ya gulu ikulu, ninge kuunga kwa madzi yazinji komasoti ninge kugunda kwamphanvu. Mawu mwayo yenze yakuti: “Tamandani Yahova!* Ndawa Yahova* Mulungu wathu, Wamphanvu zose, wayamba kutonga ninge mpfumu!
7 Naboni tikondwe maninge ndipo timupase ulemerero, ndawa ukwati wa Mwanawankhosa wafika ndipo nkazi wake wadzikhuzisa.
8 Iye wabvumiziwa kuti avale vovala vapadzulu, voyetima na vochena bwino, ndawa vovala vapadzulu mwivo vikuimira basa zachilungamo za ochena.”
9 Mngelo muyo adaniuza kuti: “Nemba kuti: Okondwa ni omwe achemerewa ku chakudya cha maulo cha phwando ya ukwati wa Mwanawankhosa.” Adaniuza pomwe kuti: “Yamwaya ni mawu chaiyo ya Mulungu.”
10 Pavidateno nidagwada pasi nkujolika patsogolo pa mapazi yake kuti nimutumikire. Koma iye adaniuza kuti: “Samala! Ayi kuchita vimwevo! Ine nandokhala munzako na wa abale wako omwe anabasa yochitira umboni va Yesu. Tumikira Mulungu, ndawa cholinga cha mawu yofotokoza vakutsogolo ni kuchitira umboni va Yesu.”
11 Nidawona kudzulu kwafunguka, patsogolo pake nidawona kavalo nchena. Yemwe wenze adapakira pa kavalo muyo dzina yake yenze yakuti Wokhulupirika na Chaiye. Iye aweruza mwachilungamo ndipo ankumenya nkhondo mwachilungamo.
12 Maso yake yenze ninge moto wangandanganda ndipo pa msolo pake penze visote vachifumu vizinji. Iye adanembewa dzina yomwe palibe munango yemwe ankuidziwa koma iye yekha.
13 Iye adavala malaya yakunja yomwe yadadontherewa* na magazi, ndipo adziwika na dzina yakuti Mawu ya Mulungu.
14 Komasoti magulu ya nkhondo yakudzulu yambamulondola yali kwire pa makavalo yachena, alivale vovala vapadzulu, vochena bwino, va mbee!
15 Nkamwa mwake mumbabula chibemba chitali chakuthwa, chakuti aphere makhaindi ya wanthu ndipo adzawapese na mpsyimbo ya simbi. Komasoti iye ambapondaponda mu chopsyinyira uva cha ukali ukulu wa Mulungu Wamphanvu zose.
16 Pa malaya yake yakunja na pa ntchafu yake, padanembewa dzina yakuti: Mpfumu ya mafumu na Mbuya wa ambuya.
17 Nidawona pomwe mngelo ali imirire padzuwa. Iye adakuwa nkuchemera mbalani zose zombululuka pafupi munlengalenga kuti: “Bwerani kuno, dzasonkhaneni ku phwando ikulu ya Mulungu ya chakudya chamaulo,
18 kuti mudzadye minyompfu ya mafumu, ya akuluakulu wa masocha, ya amuna wa mphanvu, ya makavalo na ya yemwe wapakira pamakavalo mwayo, minyompfu ya wose, ya akapolo na omwe ni akapololini, ya olemekezeka na ya onyozeka.”
19 Manje nidawona chilombo, mafumu ya dziko yapasi na masocha yawo ali unganidziwe pabodzi kuti amenyane na yemwe adapakira pa kavalo ule na gulu yake yankhondo.
20 Koma chilombo mwicho chidaphatiwa pabodzi na mneneri wabodza ule, yemwe adachita vizindikiro pamaso pa chilombo mwicho. Vizindikiro vimwevi adasokeresa navo omwe adatambira chizindikiro cha chilombo komasoti omwe ambatumikira chifaniziro chake. Wose awiri adakali na moyo, adaponyewa mu nyanja ya moto yogaka na sulufule.
21 Koma anango wose adaphewa na chibemba chitali chomwe chimbabula nkamwa mwa yemwe adakwira pa kavalo ule. Ndipo mbalani zose zidakhuta minyompfu yawo.
Mawu ya m’nyantsi
^ Panango kuti: “aleluya.” Mabaibolo yanango m’malo mwa dzina yantero yakuti Yahova, adaphatisa basa dzina yachigwato yakuti Ya.
^ Onani matanthauzo ya mawu yanango.
^ Panango kuti: “aleluya.” Mabaibolo yanango m’malo mwa dzina yantero yakuti Yahova, adaphatisa basa dzina yachigwato yakuti Ya.
^ Panango kuti: “aleluya.” Mabaibolo yanango m’malo mwa dzina yantero yakuti Yahova, adaphatisa basa dzina yachigwato yakuti Ya.
^ Onani vakumapeto A5.
^ Onani vakumapeto A5.
^ Mabaibolo yanango yanena kuti, “yadawaziriwa.”
