Chivumbuluso chomwe Yohani adatambira 2:1-29
2 “Kwa mngelo wa mpingo wa ku Efeso nemba kuti: Ivi ni vomwe ankunena wotakula nyenyezi 7 ku djanja yake ya makulu, yemwe akufamba pakati va voikhapo kandyero 7 va golide:
2 ‘Ninkudziwa basa zako, khama yako na kupirira kwako komasoti kuti ungalekelerelini wanthu woipa. Nikudziwa pomwe kuti udayesa wanthu omwe ambadziwona ninge ni atumi pomwe enzelini atumi, ndipo udagumana kuti ni wabodza.
3 Ukuwonesa pomwe kupirira ndipo walimbana na mabvuto yosiyanasiyana ndawa ya dzina yangu, koma ulibe kufoka.
4 Olo kuti viriteno, nakugumana na mulandu wakuti waleka kuwonesa chikondi ninge momwe ungachitira pakuyamba.
5 Ndipomwapa kumbukira malo yomwe wenze ukanati wagwa ndipo ulape na kuchita basa zomwe ungachita pakuyamba. Peno uchitelini vimwevi, nibwere kwa iwepo ndipo nidzachose choikhapo kandyero chako pamalo yake peno ulapelini.
6 Koma olo nteno, pali chinthu chibodzi chomwe ukuchita bwino: Uzonda vochita va mpatuko wa Nikolao, vomwembo inepano nizondana navo.
7 Yemwe anamatu abve vomwe mzimu ukunena ku mipingo: Yemwe wawina pankhondo, nidzamubvumize kudya vipaso va m’muti wamoyo womwe uli mparadaiso wa Mulungu.’
8 Kwa mngelo wa mpingo wa ku Simuna nemba kuti: Ivi ni vomwe akunena ‘Woyamba na Womaliza,’ yemwe adafa nkukhala pomwe na moyo:
9 ‘Nikudziwa masautso yako na umphawi wako, koma ndiwe wolemera. Nikudziwa pomwe kuti panawanthu omwe anena kuti ni Ayuda ndipo akunyoza. Koma sikuti iwo ni Ayuda, koma iwo ni sunagoge wa Satana.
10 Ayi kuchita mantha na mabvuto yomwe ugumane nayo. Ona! Ndyerekezi apitirize kuikha mudjeri anango wa imwepo kuti muyesewe mpakana pamapeto, ndipo mudzakhale m’masautso kwa ntsiku 10. Wonesa kukhulupirika kwako mpakana impfa ndipo nidzakupase malipiro ya moyo.
11 Yemwe anamatu abve vomwe mzimu ukunena ku mipingo kuti: Yemwe wawina pankhondo impfa yachiwiri idzamufikelini.’
12 Kwa mngelo wa mpingo wa ku Pegamo nemba kuti: Ivi ni vomwe akunena yemwe anachibemba chitali, chakuthwa kosekose:
13 ‘Nikudziwa komwe ukukhala. Ukukhala komwe kuli mpando wachifumu wa Satana. Koma ukupitiriza kuphata mwamphanvu dzina yangu ndipo ulibe kulamba kuti unikhulupirira. Ulibe kulamba podiya mu ntsiku za Antipa, mboni yangu yokhulupirika, yemwe adaphewa mu thaundi yanu, komwe Satana ankukhala.
14 Olo kuti viriteno, pali milandu yomwe nakugumana nayo. Iwepo kumuko unawanthu omwe ankupitiriza kutewedza chipfunziso cha Balamu, yemwe adapfunzisa Balaki kuti aikhire wana wa Izirayeli chokhukhumudwisa kuti adye voperekewa ntsembe kwa mafano na kuchita chigololo.*
15 Kuingizira pamwapo, uli pomwe na wanthu omwe ankupitiriza kutewedza chipfunziso cha mpatuko cha Nikolao.
16 Ndipomwapa ulape. Peno ulapelini, nibwere kwa iwepo mwakankulumize, ndipo nidzamenyane nawo na chibemba chitali cha nkamwa mwangu.
17 Yemwe anamatu abve vomwe mzimu ukunena ku mipingo kuti: Yemwe wawina pa nkhondo nidzamupase mana yanango yobisika komasoti nidzamupase mwala wochena. Pamwala wochena muyo padanembewa dzina inyowani yomwe palibe aliyese yemwe akuidziwa kuchosapo iye yekha wotambira.’
18 Kwa mngelo wa mpingo wa ku Tiyatira nemba kuti: Ivi ni vomwe Mwana wa Mulungu akunena, iye yemwe maso yake yali ninge moto wangandanganda ndipo mapazi yake yali ninge kobre* wokonzewa bwino:
19 ‘Ninkudziwa basa zako, chikondi chako, chikhulupiriro chako, utumiki wako na kupirira kwako. Nikudziwa pomwe kuti manjeuno basa zako ni zizinji kuposha zomwe ungachita pakuyamba.
20 Podiya viritene, nakugumana na mulandu wakuti unkulekerera mayi ule Yezebeli, yemwe adziwona ninge mneneri. Iye ankupfunzisa na kusokeresa akapolo wangu kuti ambachite chigololo* komasoti kuti ambadye vinthu voperekewa ntsembe kwa mafano.
21 Namupasa nthawe kuti alape, koma akufunalini kulapa chigololo* chomwe ankuchita.
22 Ona! Nakhala pang’ono kumudwalisa maninge, ndipo omwe akuchita naye chigololo nidzawabweresere masautso yakulu, kuchosapo peno alapa basa zawo zolingana na za mayi muyo.
23 Wana wake nidzawaphe na miliri yopasa mantha, ndipo mipingo yose yadzadziwe kuti inepano ndiye yemwe niunguza maganizo na mitima, ndipo aliyese payekha nidzamubwezere mobverana na basa zake.
24 Olo nteno, anango mose imwepo omwe muli ku Tiyatira, imwepo omwe mutewedzalini chipfunziso chimwechi, omwe mukudziwalini chirichose chobverana na vinthu vomwe anena kuti ni “vinthu vapadzulu va Satana,” nikukuuzani kuti: Nifunalini kukusenzesani* ntolo uliwose wolemera.
25 Koma phatani mwamphanvu vinthu vabwino vomwe muli navo mpakana inepano nidzabwere.
26 Ndipo yemwe wawina pankhondo nkumbatewedzera basa zangu mpakana mapeto, nidzamupase ulamuliro pa makhaindi ya wanthu.
27 Ulamuliro wake udzakhale wolingana na womwe inepano natambira kuchokera kwa Ababa wangu. Iye adzapese wanthu na mpsimbo ya simbi ndipo wanthu mwawo adzaphwanyiwephwanyiwe ninge mbiya za dothi.
28 Ndipo nidzamupase nthanda.*
29 Yemwe anamatu abve vomwe mzimu ukunena ku mipingo.’”
Mawu ya m’nyantsi
^ Onani matanthauzo ya mawu yanango.
^ Panango kuti: “nkuwa.”
^ Onani matanthauzo ya mawu yanango.
^ Onani matanthauzo ya mawu yanango.
^ Panango kuti: “kukutakulisani.”
^ “Nthanda” ni nyenyezi yomalizira kubula yomwe iwonekera dzuwa ikandosala pang’ono kubula.
