Chivumbuluso chomwe Yohani adatambira 20:1-15
20 Ndipo nidawona mngelo ankubuluka kuchokera kudzulu ali na khiyi ya kuphompho na tcheni ikulu kumanja kwake.
2 Patsogolo pake adaphata chinyoka, nyoka yakalekale ire, yemwe ni Ndyerekezi komasoti Satana, nkumumanga kwa magole 1000.
3 Ndipo adamuponyera m’phompho nkufunga pansuwo pa phompho mwiyo patsogolo pake adaikhapo chidindo kuti osati asokerese pomwe makhaindi ya wanthu mpakana yamale magole 1000. Patsogolo pake, adzamasuliwe kwa kanthawe kang’onong’ono.
4 Patsogolo pake nidawona mipando yachifumu ndipo omwe enze khale pamipando mwayo adapasiwa mphanvu zoweruza. Nidawona magazi ya wanthu omwe adaphewa ndawa yochitira umboni va Yesu komasoti ndawa yoyankhula va Mulungu. Inde, nidawona magazi ya wanthu omwe alibe kutumikira chilombo panango chifaniziro chake ndipo alibe kutambira chizindikiro pamikuma yawo na padjanja yawo. Iwo adakhala pomwe na moyo ndipo adalamulira ninge mafumu pabodzi na Khrisitu kwa magole 1000.
5 (Wakufa anango mwawo alibe kukhala pomwe na moyo mpakana kumala kwa magole 1000.) Kumuku ni kumuka koyamba kwa wakufa.
6 Wokondwa komasoti wochena ni aliyese yemwe ankumuka nawo pa kumuka koyamba. Impfa yachiwiri iribe ulamuliro pa wanthu mwawa. Koma adzakhale antsembe wa Mulungu na wa Khrisitu, ndipo adzalamulire ninge mafumu pabodzi na Khrisitu kwa magole 1000.
7 Manje magole 1000 mwaya yakandodzati yamala, Satana adzamasuliwe mudjeri yake,
8 ndipo adzabule kukasokeresa makhaindi ya wanthu kumakhona yose 4 ya dziko yapasi. Makhaindi mwayo ni Gogi komasoti Magogi ndipo adzayaunganidze pabodzi kuti amenye nkhondo. Iwo ni azinji ninge nchenga wa kunyanja.
9 Iwo adzafalikire padziko yose yapasi ndipo adzazungulire msasa wa ochena komasoti thaundi yapamoyo. Koma moto udzabuluke kuchokera kudzulu nkuwanyekesa.
10 Ndyerekezi, yemwe ambawasokeresa, adzaponyewe m’nyanja yamoto na sulufule, momwe muli kale chilombo na mneneri wabodza ule. Ndipo iwo adzadzudziwe usiku na masikati* mpakana kalekale.
11 Patsogolo pake nidawona mpando wachifumu ukulu wochena komasoti Mulungu alikhale pampando muyo. Dziko yapasi na kudzulu vidathawa pamaso pake ndipo viribe kugumanika pomwe.
12 Manje nidawona wakufa, olemekezeka na onyozeka, ali imirire pamaso pa mpando wachifumu muyo, ndipo mipukutu yadapfuthuliwa. Koma penze mpukutu unango womwe udapfuthuliwa, womwe ni mpukutu wa moyo. Wakufa adaweruziwa pakutengera vomwe vidanembewa mumpukutu muyo, mobverana na basa zawo.
13 Nyanja idapereka wakufa omwe enze mumo. Impfa komasoti Manda* vidapereka wakufa omwe enze mumo. Aliyese payekha adaweruziwa mobverana na basa zake.
14 Ndipo impfa na Manda* vidaponyewa munyanja yamoto. Nyanja yamoto mweyi inkuimira impfa yachiwiri.
15 Komasoti, aliyese yemwe dzina yake iribe kunembewa m’bukhu ya moyo adaponyewa munyanja yamoto.
Mawu ya m’nyantsi
^ Panango kuti: “iwo adzaikhiwe mudjeri.”
^ Panango kuti: “Hade,” kutanthauza manda ya wanthu wose.
^ Panango kuti: “Hade,” kutanthauza manda ya wanthu wose.
